1. ‘Maganunniwa shinqummoro,ˈ maa afiˈneemmo?

YIHOWA isira soqqantannore baxanno. Yihowa magansiˈrattoha ikkiro, isi xaano ikko konni kaˈa maassiˈrannohe. Qullaawu Maxaafi togo yaanno: ‘Maganunniwa shiqqe; isino kiˈnewa shiqannona.ˈ—Yaaqoobi 4:8.

2. Maganunniwa shiqa dandiineemmohu hiittoonniiti? Isiwa shinqummoro, huuccattonke maa afidhanno?

² Maganunniwa shiqate Qaalesi xiinxallanna loosu aana hosiisa hasiissannohe. Yihowa fajjo ledo sumuu yaanno garinni huucciˈrattoha ikkiro, isi huuccattokki macciishshe dawaro qolannohe. Kiristaanchu hawaariya Yohaannisi togo yee borreessino: ‘Ayee coyeno isi fajjo gede huucciˈnummoro macciishshannonke yine ammaneemmo. Huucciˈneemmore macciishshannonke gede anfummoro, isiwiinni huucciˈneemmore duucha xaanni adhinoommo gede anfoommo.ˈ—1 Yohaannisi 5:14, 15.

3-7. Maganuwiinni afiˈnanni hayyo afiˈra dandiineemmohu hiittoonniiti? Tini hayyo mayi kaaˈlo uyitannonke?

³ Hakkiinni saeno Maganunniwa shiqattoha ikkiro, isi heeshshokki giddo addi addi hajo tirate kaaˈlitannohe hayyo aannohe. Qullaawu Maxaafi, “Kiˈne mereero egenno [“hayyo,” NW] xeˈinosi manchi heeˈriro Magano huucciˈro” yaanno.—Yaaqoobi 1:5.

⁴ Maganuwiinni afiˈratto hayyo mayi kaaˈlo uyitannohe? Umihunni, Magano hagiirsiisannokki coye badde afatto gede kaaˈlitannohe. Qoleno togoori soˈro ikkinohu mayiraatiro huwatatto gedenna togooriwiinni xeertiˈrate maa assa hasiissannohero afatto gede kaaˈlitannohe. Togoo egenno, batinye manna gawajjanni noohunni lowo qarrinni gatissahera dandiitanno. Lawishshaho amanyootunni xuru noonkekkire ikkineemmo gede Maganu uyinonke hajajo ayirrisa, Maganu manna baana godowatenni, hattono siimu xaadinni taraawanno xibbinni agartannonsa; qoleno maatensa hagiirraame ikkitanno gede woyi diigantannokki gede kaaˈlitannonsa.

⁵ Maganuwiinni afiˈratto hayyo wole mayi kaaˈlo uyitannohe? Heeshshokki roore woyyino garinni marraiˈratto gede kaaˈlitannohe. Tini hayyo heeshshokki giddo addi addi coye danchu garinni wossaˈnatto gede kaaˈlitannohe, lawishshaho woxe amaxxatto gara rosiissannohe. Qolteno dancha mixo harunsatto gedenna hegere horo afidhinokki mixo harunsattokki gede assitannohe.

⁶ Maganuwiinni afiˈratto hayyo mannu ledo salaametenni heeˈratto gedeno kaaˈlitannohe. Maatekki albinni roore hagiirraame ikkitanno. Mannu ledo halaalaanchonna geedanno jaalooma kalaqiˈratto; hattono Maganoho soqqamannokki manni nafa ayirrisannohe.

⁷ Hakkiinni saeno, Maganuwiinni afiˈratto hayyo heeshshote gara ikkitino lao heedhannohe gede assitannohe. Heeshshokki giddo qarrunna hexxo mursiisannori tuncu yiihero, hakkoye dandiite saˈˈatto gede kaaˈlitannohe. Qoleno konni kaˈi yanna hexxotenninna hagiirrunni agadhatto. Togoo lao qolte, surretenna bisu fayyimmara kaaˈlo ikkitannohe.—Lawishsha 14:30; Isayyaasi 48:17.

8. Maganoho soqqamattoha ikkiro, maa maa diwaajjatto?

⁸ Halaalaanchu Maganira soqqamattoha ikkiro, isira soqqamannokki manni waajjannori diwaajjishannohe. Reyitinori heeshshote nookkitanna waamante noota afootto daafira, reyino manna waajjitanni diqarramatto.  Maganu reyitinore kayisate eino qaale ammanatto daafira reyo diwaajjatto. Qolteno Maganu duuchunkura aliidiha ikkinota afootto daafira, diginte woyi bita diwaajjatto.—Yohaannisi 8:32.

9-11. Gannatete heeˈrannohu hiittoo mannaati? Heeˈrannokkihuna?

⁹ Maganunniwa shiqattoha ikkiro, albillittete yanna diwaajjatto. Albaanni laˈnummonte gede, xa yannankera uullate aana nooha batinye qarra Qullaawu Maxaafi balaxe masaalino. Yihowa kuni qarri baalunku yannate geeshsha calla keeshshannota kulinonke; Maganu Mangiste muli yanna giddo tenne uulla gannate assitanno.—Luqaasi 21:10, 11, 31; 23:43.

¹⁰ Yihowawa shiqqannorinna isira soqqantannori calla Gannatete heedhanno. Qullaawu Maxaafi togo yaanno: “Boode yanna ikkinnina, bushu manchi digeedanno; noowa afate hixamanyite hasatto, kayinni diafatto. Shooshaqootu kayinni uulla ragidhanno; keeru batiˈranno daafira lowo geeshsha tashshi yaannonsa.”—Faarso 37:10, 11.

¹¹ Haxo kaajjite Maganunnita xalallete doogo harunsa gimbi yitannori hegerera baˈanno. (2 Teselonqe 1:8, 9) Insa layinkita diheedhanno. Insa Sheexaanunna agaanintesi gede hegere reyo reyitanno. (Ajuuja 20:10, 14) Yihoware tamaarannohunna isira soqqamanno manni kayinni uullate aana Gannatete giddo lowo hagiirre afiˈranno.

12. Qullaawu Maxaafi konni kaˈi heeshsho hiittoota ikkitanno yaanno?

¹² Yihowa iso baxxannorira albillittete lowo atoote qixxeesse no! Hanni Gannate ikkitanno uullara heeshsho hiittoota ikkitannoro Qaalisi yaannore laˈno:

• Sagale woˈmitanno: “Uullate aana gidu woˈmanno; ilaallate sammorano dayyaˈˈanno.”—Faarso 72:16.

• Injiino mini heeˈranno: “Mannu minna miˈnanno, hatte minnarano heeˈranno.”—Isayyaasi 65:21.

• Hagiirsiisanno loosi heeˈranno: “Ani doodhoommo manni angansa loosinni woˈma xiqime afiˈranno. Beebba didaafuranno.”—Isayyaasi 65:22, 23.

• Xiwanu diheeˈranno: “Hakko heeˈrannohu, ‘Xiwamoommoˈ diyaanno.”—Isayyaasi 33:24.

• Bisu xeˈne diheedhanno: “Hatte yannara ballootu ille faˈnantanno; hattono danqootu macca macciishshitanno. Hatte yannara naafichu bullichi gede kubbanno; danqichu arrawi hagiirrunni faarsanno.”—Isayyaasi 35:5, 6.

• Xisso, dadillunna reyo diheedhanno: ‘[Maganu] hindiiddo duucha illensa aaninni feyanno; reyo woyi dadillu woyi wiˈla woyi dhibbu qarri konni kaˈa diheeˈranno. Hakkuno mayiraati? Albi coyi budi sainohuraati.ˈ—Ajuuja 21:4.

• Olu diheeˈranno: “[Maganu] uullate qaccenni uullate qacce geeshsha ola hunanni no.”—Faarso 46:9.

• Hegere heeshsho: “Keeraano uulla ragidhanno; ise aanano hegerera heedhanno.”—Faarso 37:29.

13. Tenne uulla gannate assa dandaannohu aye callaati? Mayira?

¹³ Mannu ooso togoo atoote abba horonta didandiitanno; Yihowa kayinni asseemmo yiino coye baala assanno wolqa noosi. Isi assara hasiˈrinore assa hoolannosiri mitturino dino. Qullaawu Maxaafi, “Maganu assate dandaannokkiri dino” yaanno.—Luqaasi 1:37.

14. Hegere heeshshowa massitanno doogo aana haˈra dandaattohu hiittoonniiti?

¹⁴ Yihowa Farciˈraasinesi horoonsiˈre, basete baala noo manni “ruukkashsho waalcho” eanno gedenna hegere heeshshowa massitanno doogo aana haˈranno gede kaayyo aanni no. Ateno hatte kaayyo afiˈre hagiidhanno manni wido assohe. Halaalaancho ammaˈno harunsite, Yihowa hegerera dirrisanno atootinni hagiidhatto gede halchonkeeti!—Maatewoosi 7:13, 14.