1. ‘Maganunniwa shinqummoro,ˈ maa afiˈneemmo?

 YIHOWA isira soqqantannore baxanno. Yihowa magansiꞌrattoha ikkiro, isi xaano ikko konni kaꞌa maassiꞌrannohe. Qullaawu Maxaafi togo yaanno: ‘Maganunniwa shiqqe; isino kiꞌnewa shiqannona.ˈ—Yaaqoobi 4:8.

2. Maganunniwa shiqa dandiineemmohu hiittoonniiti? Isiwa shinqummoro, huuccattonke maa afidhanno?

² Maganunniwa shiqate Qaalesi xiinxallanna loosu aana hosiisa hasiissannohe. Yihowa fajjo ledo sumuu yaanno garinni huucciꞌrattoha ikkiro, isi huuccattokki macciishshe dawaro qolannohe. Kiristaanchu hawaariya Yohaannisi togo yee borreessino: ‘Ayee coyeno isi fajjo gede huucciꞌnummoro macciishshannonke yine ammaneemmo. Huucciꞌneemmore macciishshannonke gede anfummoro, isiwiinni huucciꞌneemmore duucha xaanni adhinoommo gede anfoommo.ˈ—1 Yohaannisi 5:14, 15.

3-7. Maganuwiinni afiˈnanni hayyo afiˈra dandiineemmohu hiittoonniiti? Tini hayyo mayi kaaꞌlo uyitannonke?

³ Hakkiinni saeno Maganunniwa shiqattoha ikkiro, isi heeshshokki giddo addi addi hajo tirate kaaꞌlitannohe hayyo aannohe. Qullaawu Maxaafi, “Kiꞌne mereero egenno [“hayyo,” NW] xeꞌinosi manchi heeꞌriro Magano huucciꞌro” yaanno.—Yaaqoobi 1:5.

⁴ Maganuwiinni afiˈratto hayyo mayi kaaꞌlo uyitannohe? Umihunni, Magano hagiirsiisannokki coye badde afatto gede kaaꞌlitannohe. Qoleno togoori soꞌro ikkinohu mayiraatiro huwatatto gedenna togooriwiinni xeertiꞌrate maa assa hasiissannohero afatto gede kaaꞌlitannohe. Togoo egenno, batinye manna gawajjanni noohunni lowo qarrinni gatissahera dandiitanno. Lawishshaho amanyootunni xuru noonkekkire ikkineemmo gede Maganu uyinonke hajajo ayirrisa, Maganu manna baana godowatenni, hattono siimu xaadinni taraawanno xibbinni agartannonsa; qoleno maatensa hagiirraame ikkitanno gede woyi diigantannokki gede kaaꞌlitannonsa.

⁵ Maganuwiinni afiˈratto hayyo wole mayi kaaꞌlo uyitannohe? Heeshshokki roore woyyino garinni marraiꞌratto gede kaaꞌlitannohe. Tini hayyo heeshshokki giddo addi addi coye danchu garinni wossaꞌnatto gede kaaꞌlitannohe, lawishshaho woxe amaxxatto gara rosiissannohe. Qolteno dancha mixo harunsatto gedenna hegere horo afidhinokki mixo harunsattokki gede assitannohe.

⁶ Maganuwiinni afiˈratto hayyo mannu ledo salaametenni heeꞌratto gedeno kaaꞌlitannohe. Maatekki albinni roore hagiirraame ikkitanno. Mannu ledo halaalaanchonna geedanno jaalooma kalaqiꞌratto; hattono Maganoho soqqamannokki manni nafa ayirrisannohe.

⁷ Hakkiinni saeno, Maganuwiinni afiˈratto hayyo heeshshote gara ikkitino lao heedhannohe gede assitannohe. Heeshshokki giddo qarrunna hexxo mursiisannori tuncu yiihero, hakkoye dandiite saꞌꞌatto gede kaaꞌlitannohe. Qoleno konni kaꞌi yanna hexxotenninna hagiirrunni agadhatto. Togoo lao qolte, surretenna bisu fayyimmara kaaꞌlo ikkitannohe.—Lawishsha 14:30; Isayyaasi 48:17.

8. Maganoho soqqamattoha ikkiro, maa maa diwaajjatto?

⁸ Halaalaanchu Maganira soqqamattoha ikkiro, isira soqqamannokki manni waajjannori diwaajjishannohe. Reyitinori heeshshote nookkitanna waamante noota afootto daafira, reyino manna waajjitanni diqarramatto.  Maganu reyitinore kayisate eino qaale ammanatto daafira reyo diwaajjatto. Qolteno Maganu duuchunkura aliidiha ikkinota afootto daafira, diginte woyi bita diwaajjatto.—Yohaannisi 8:32.

9-11. Gannatete heeꞌrannohu hiittoo mannaati? Heeꞌrannokkihuna?

⁹ Maganunniwa shiqattoha ikkiro, albillittete yanna diwaajjatto. Albaanni laꞌnummonte gede, xa yannankera uullate aana nooha batinye qarra Qullaawu Maxaafi balaxe masaalino. Yihowa kuni qarri baalunku yannate geeshsha calla keeshshannota kulinonke; Maganu Mangiste muli yanna giddo tenne uulla gannate assitanno.—Luqaasi 21:10, 11, 31; 23:43.

¹⁰ Yihowawa shiqqannorinna isira soqqantannori calla Gannatete heedhanno. Qullaawu Maxaafi togo yaanno: “Boode yanna ikkinnina, bushu manchi digeedanno; noowa afate hixamanyite hasatto, kayinni diafatto. Shooshaqootu kayinni uulla ragidhanno; keeru batiꞌranno daafira lowo geeshsha tashshi yaannonsa.”—Faarso 37:10, 11.

¹¹ Haxo kaajjite Maganunnita xalallete doogo harunsa gimbi yitannori hegerera baꞌanno. (2 Teselonqe 1:8, 9) Insa layinkita diheedhanno. Insa Sheexaanunna agaanintesi gede hegere reyo reyitanno. (Ajuuja 20:10, 14) Yihoware tamaarannohunna isira soqqamanno manni kayinni uullate aana Gannatete giddo lowo hagiirre afiˈranno.

12. Qullaawu Maxaafi konni kaꞌi heeshsho hiittoota ikkitanno yaanno?

¹² Yihowa iso baxxannorira albillittete lowo atoote qixxeesse no! Hanni Gannate ikkitanno uullara heeshsho hiittoota ikkitannoro Qaalisi yaannore laꞌno:

•   Sagale woꞌmitanno: “Uullate aana gidu woꞌmanno; ilaallate sammorano dayyaꞌꞌanno.”—Faarso 72:16.

•   Injiino mini heeꞌranno: “Mannu minna miꞌnanno, hatte minnarano heeꞌranno.”—Isayyaasi 65:21.

•   Hagiirsiisanno loosi heeꞌranno: “Ani doodhoommo manni angansa loosinni woꞌma xiqime afiˈranno. Beebba didaafuranno.”—Isayyaasi 65:22, 23.

•   Xiwanu diheeꞌranno: “Hakko heeꞌrannohu, ‘Xiwamoommoˈ diyaanno.”—Isayyaasi 33:24.

•   Bisu xeꞌne diheedhanno: “Hatte yannara ballootu ille faꞌnantanno; hattono danqootu macca macciishshitanno. Hatte yannara naafichu bullichi gede kubbanno; danqichu arrawi hagiirrunni faarsanno.”—Isayyaasi 35:5, 6.

•   Xisso, dadillunna reyo diheedhanno: ‘[Maganu] hindiiddo duucha illensa aaninni feyanno; reyo woyi dadillu woyi wiꞌla woyi dhibbu qarri konni kaꞌa diheeꞌranno. Hakkuno mayiraati? Albi coyi budi sainohuraati.ˈ—Ajuuja 21:4.

•   Olu diheeꞌranno: “[Maganu] uullate qaccenni uullate qacce geeshsha ola hunanni no.”—Faarso 46:9.

•   Hegere heeshsho: “Keeraano uulla ragidhanno; ise aanano hegerera heedhanno.”—Faarso 37:29.

13. Tenne uulla gannate assa dandaannohu aye callaati? Mayira?

¹³ Mannu ooso togoo atoote abba horonta didandiitanno; Yihowa kayinni asseemmo yiino coye baala assanno wolqa noosi. Isi assara hasiꞌrinore assa hoolannosiri mitturino dino. Qullaawu Maxaafi, “Maganu assate dandaannokkiri dino” yaanno.—Luqaasi 1:37.

14. Hegere heeshshowa massitanno doogo aana haꞌra dandaattohu hiittoonniiti?

¹⁴ Yihowa Farciꞌraasinesi horoonsiꞌre, basete baala noo manni “ruukkashsho waalcho” eanno gedenna hegere heeshshowa massitanno doogo aana haꞌranno gede kaayyo aanni no. Ateno hatte kaayyo afiˈre hagiidhanno manni wido assohe. Halaalaancho ammaꞌno harunsite, Yihowa hegerera dirrisanno atootinni hagiidhatto gede halchonkeeti!—Maatewoosi 7:13, 14.