ROSO 07
Yihowa Hiittoo Maganooti?
Yihowa daafira hedatto woyite, isi hiittoo Magano lawannohe? Isi lowo geeshsha maalaꞌlinanniha ikkirono mannuwiinni xeertiꞌrinoho? Woy banqote gede wolqaataamo ikkirono umisi ayimma noosikkiho? Yihowa isi addinta hiittooho? Qullaawu Maxaafi Yihowara hiittoo akatta noosiro kulannonke; qoleno Isi ninke daafira hedannoha ikkinota rosiisannonke.
1. Magano laꞌꞌa dandiineemmokkihu mayiraati?
“Maganu Ayyaanaho.” (Yohaannisi 4:24) Yihowa ninke gede maalu biso uddiꞌrinoha diꞌꞌikkino. Isi Ayyaanaho; heeꞌrannohuno ninke laꞌꞌa dandiineemmokkiwa iima gordohooti.
2. Yihowa akatta giddo mite hiikkuriiti?
Yihowa laꞌꞌa dandiineemmokkiha ikkirono, dancha akatta noosi daafira banxeemmosi. Qullaawu Maxaafi togo yaanno: “Kaaliiqi [“Yihowa,” NW] halaale baxanno daafira, keeraano dihunanno.” (Faarso 37:28) Isi hakko iso qarru giddo noore “mararanno” Maganooti. (Yaiqoobi 5:11) “Kaaliiqi dadillunni hiiqqantinorira mule noonsa; hexxo hoogginore gatisannonsa.” (Faarso 34:18) Qoleno assootinke Yihowa hagiirsiisara woy dadillisara dandaannota afootto? Bushare assanno manchi Yihowa koffi assanno hattono dadillisanno. (Faarso 78:40, 41) Gara ikkinore assanno manchi kayinni iso hagiirsiisanno.—Lawishsha 27:11 nabbawi.
3. Yihowa baxannonketa leellishinohu hiittoonniiti?
Yihowahu qaru akati baxilleho. Isinni “Maganu baxilleho.” (1 Yohaannisi 4:8) Yihowa baxannonketa leellishinohu Qullaawu Maxaafi widoonni calla diꞌꞌikkino; kalaqino coyino baxillesi leellishanno. (Soqqamaasinete Looso 14:17 nabbawi.) Hanni lawishshaho isi kalaqinonke gara hendo. Isi biifado kuula laꞌꞌa, baxisanno muuziiqa macciishsha, hattono coommitanno sagale qamasa dandiineemmo gede asse kalaqinonke. Isi hagiidhinanni heeꞌnammora hasiꞌranno.
LEDDE XIINXALLI
Yihowa dhagge ikkanno coye assannohu hiittoonniitiro rosi. Hakkiinni Yihowa baxissanno akattasi ninkera leellishannohu hiittoonniitiro huwati.
4. Qullaawu ayyaani Maganu wolqaati
Ninke mitore loosate anganke horoonsiꞌneemmo gede, Yihowa loososi loosate qullaawa ayyaanasi horoonsiꞌranno. Qullaawu Maxaafi, qullaawu ayyaani umisi biso afiꞌrino yee dirosiisanno; hatteentenni Maganu loosisira horoonsiꞌranno wolqa ikkinota kulanno. Luqaasi 11:13 nna Soqqamaasinete Looso 2:17 nabbabbe; hakkiinni aante noo xaꞌmuwa hasaabbe:
-
Maganu huuccidhannorira qullaawa ayyaanasi ‘dunanno.’ Hatto ikkiro, qullaawu ayyaani umisi ayimma noosihonso, Maganu wolqaati? Hatto yoottohu mayiraati?
Yihowa qullaawu ayyaanisinni dhaggete coye assanno. Iyyoobi 33:4 nna 2 Pheexiroosi 1:20, 21 nabbabbe; hakkiinni aante noo xaꞌmo hasaabbe:
-
Yihowa qullaawa ayyaanasi horoonsiꞌrino doogga giddo mite hiikkuriiti?
5. Yihowara baxissanno akatta noosi
Muse Maganoho ammaname soqqamanno manchooti; ikkirono isi Kalaqaanchosi lede afa hasiꞌrino. Hakko daafira Muse Magano, “Hedoottori [woy, doogokki] maatiro kulie” yee huucciꞌrino. (Fulo 33:13) Hakkiinni Yihowa hiittoo Maganootiro Musera kulinosi. Fulo 34:4-6 nabbabbe; hakkiinni aante noo xaꞌmuwa hasaabbe:
-
Yihowa Musera hiikkuri akattasi kulinosi?
-
Yihowa akatta giddo roore baxisannohehu hiikkoyeti?
6. Yihowa mannu daafira hedanno
Hundihu Maganu manni Ibiraawootu Gibitsete gobbara borojje ikke heeꞌrino. Mannisi qarrami woyite Yihowara mayi macciishshaminosi? QADDAꞌNOONNI QOONQO fantine macciishshe; woy Fulo 3:1-10 nabbabbe. Hakkiinni aante noo xaꞌmuwa hasaabbe.
-
Tini xagge, mannu qarramanno woyite Yihowa hiitto ikkannota leellishshanno?—Kiiro 7 nna 8 lai.
-
Yihowa addinta manna kaaꞌla hasiꞌrannoha lawannohe? Qoleno kaaꞌla dandaannoha lawannohe? Mayira?
7. Kalaqama laꞌne Yihowa akatta daafira rosa dandiineemmo
Yihowa kalaqino coyi widoonni isi hiittoo Maganootiro kulinonke. VIIDIYO laꞌe. Hakkiinni Roomu Sokka 1:20 nabbabbine, aante noo xaꞌmo hasaabbe.
-
Kalaqama laꞌe hiikkuri Yihowa akatta wodanchootto?
MITU MANNI TOGO YAANNO: “Maganu woꞌmankawa no.”
-
Ati tennera mayyaatto?
-
Hatto yite ammanattohu mayiraati?
XAPHISHSHA
Yihowa illete leellannokki Maganooti; isira batinye kaajja akatta, roorenkanni baxillu noosi.
Kageeshsha Rosoottore
-
Yihowa laꞌꞌa dandiineemmokkihu mayiraati?
-
Qullaawu ayyaani maati?
-
Yihowa akatta giddo mite hiikkuriiti?
EGENNO LEXXI
Yihowate shoole qara qara akatta daafira ledde rosi.
“Maganoho Hiitti Akatta Noosi?” (Agarooshshu Shae Kiiro 1 2019)
Yihowa woꞌmankawa heeꞌrannoha ikkinokkita leellishshanno taje nabbawi.
“Maganu Woꞌmanka Bayicho Heeꞌranno?” (Webisayitenkera fultino borro)
Qullaawu Maxaafi qullaawa ayyaana Maganu angaati yaannohu mayiraatiro nabbawi.
Mittu ille ballino manchi Maganu dibaxannoe yee hedanni keeshshino. Isi hatto yee heda aguranno gede kaaꞌlinosiri maatiro huwatate woꞌnaali.
“Xa Manna Kaaꞌla Dandeemmo Yee Hedeemmo” (Agarooshshu Shaera fulino birxicho)
Kurino Lai
DUUCHU MANNI XAꞌMANNO XAꞌMO
Yihowa Farciꞌraasine Qullaawa Maxaafa Xiinxallissannohu Hiittoonniiti?
Yihowa Farciꞌraasine ledo Qullaawa Maxaafa woxe baaxxittokkinni xiinxallatto woyite, baxoottota Qullaawu Maxaafi tiro horoonsiꞌra dandaatto. Xiinxallokkira maatekki gudisse woy jaallakki koyisa dandaatto.
