ROSO 09
Huuccattotenni Maganunniwa Shiqi
Mitto coye assattora kaꞌeenna biddishshu hasiise egenninohe? Dawaro afiꞌra hasiꞌrattoti huluullitannohe xaꞌmuwa no? Shesho woy jawaante hasiissinohe? Albinni roore Yihowawa shiqa hasiꞌratto? Huuccatto tenne baalantera kaaꞌlitannohe. Ikkina huuccatto assiꞌra hasiissannonketi gara ikkitino doogo hiitteeti? Maganu baalanta huuccatto macciishshanno? Maganu huuccattokki macciishshanno gede maa assa dandaatto? Hanni laꞌno.
1. Huucciꞌra hasiissannonkehu ayeti? Mayi daafira huucciꞌra dandiineemmo?
Yesuusi iimi Annanke calla huucciꞌra hasiissannonketa rosiisino. Yesuusi umisi Yihowa huucciꞌrino. Isi togo yiino: “Kunnira kiꞌne, ‘Annanke Gordoho heeꞌrattohu . . . ’ yitine huuccidhe.” (Maatewoosi 6:9) Yihowa huucciꞌneemmo woyite, isi ledo noonke jaaloomi lexxanno.
Huucciꞌneemmo coyi Maganu fajjo ledo sumuu yaannoha ikki geeshsha, aye coyeno huucciꞌra dandiineemmo. Qullaawu Maxaafi, “[Maganu] isi hedino garinni huucciꞌneemmore baala macciishshannonke” yaanno. (1 Yohaannisi 5:14) Yesuusi huucciꞌra hasiissannonkeha mito coye rosiisino. (Maatewoosi 6:9-13 nabbawi.) Uminke hajo daafira huucciꞌneemmotano agurranna, assinonkerira Magano galatanna wolu manni daafirano huucca hasiissannonke.
2. Huucciꞌra hasiissannonkehu ma garinniiti?
Qullaawu Maxaafi ‘wodaninkera noore coꞌo assine Maganoho kuꞌlineemmo’ gede amaalannonke. (Ermiyaasi Qurto 2:19) Konni daafira huucciꞌneemmo woyite, giddonketa fushshine hasaapha hasiissannonke. Qoonqonke macciishshantanno gede assine, woy coyiꞌnummokkinni wodaninkenni calla huucciꞌra dandiineemmo. Guluphine, uurrine woy ofolline huucciꞌra dandiineemmo; qaru coyi Yihowa ayirrinseemmota leellishanno garinni huucciꞌrate. Aye yannarano hattono aye bayichono heeꞌne huucciꞌra dandiineemmo.
3. Maganu huuccattonkera dawaro qolannohu hiittoonniiti?
Huuccattonkera dawaro babbaxxitino doogganni qolanno. Yihowa Qaalesi Qullaawa Maxaafa uyinonke; duucha woyite xaꞌmuwankera Qullaawu Maxaafi giddonni dawaro afiꞌneemmo. Faarso 19:7 kultannonte gede, Maganu Qaale nabbawa “hawanya mancho egennaamo assitanno.” (Yaiqoobi 1:5 nabbawi.) Qarru amadannonke woyite Yihowa giddiidi keere aannonke. Qoleno kaaꞌlo hasiissannonke woyite soqqamaasinesi kaaꞌlitannonke gede assara dandaanno.
LEDDE XIINXALLI
Magano hagiirsiissanno huuccatto assiꞌra dandaatto garanna huuccatto kaaꞌlitannohe gara rosi.
4. Maganu huuccattonke macciishshanno gede, assa hasiissannonkeri no
Maganu huuccattonke macciishshanno gede woy macciishshannokki gede assara dandaannori maati? VIIDIYO laꞌe.
Yihowa iso huucciꞌnammora hasiꞌranno. Faarso 65:2 nabbabbe; hakkiinni aante noo xaꞌmuwa hasaabbe:
-
‘Huuccatto macciishshanno’ Magani ati huuccatto assiꞌrattora hasiꞌrannoha dilawannohe? Mayira?
Maganu huuccattonke macciishshanno gede seerisi garinni heeꞌrate sharrama hasiissannonke. Mikiyaasi 3:4 nna 1 Pheexiroosi 3:12 nabbabbe; hakkiinni aante noo xaꞌmo hasaabbe:
-
Yihowa huuccattonke macciishshanno gede maa assa hasiissannonke?
Olu yannara, lamenti garo tiꞌi teꞌee qeelate huuccatto assidhanno. Maganu tenne huuccattora dawaro qolannoha lawannohe?
5. Huucciꞌneemmo woyite Yihowara giddonketa hasaapha hasiissannonke
Mitu manni yiinota yaanni huucciꞌranno gede rosiinsoonninsa. Ikkina Maganu hakko garinni huucciꞌnammora hasiꞌranno? Maatewoosi 6:7 nabbabbe; hakkiinni aante noo xaꞌmo hasaabbe:
-
Huuccatto assiꞌratto woyite ‘yoottota calla yaattokki gede’ maa assa dandaatto?
Barru barrunku Yihowa galaxxatto gede assannoheha mitto baxxino coye hedi. Mitte lamala geeshsha barru baala hatto assittoro, yoottota calla yiittokkinni lamalu babbaxxino coyi daafira huucciꞌritto yaate.
Danchu anni qaaqqisi giddosita kuꞌlasira hasiꞌranno. Hatteente gede, Yihowano giddonketa hasaaphinammosira hasiꞌranno
6. Huuccatto Maganu eltooti
Huuccatto qarru yannarano ikko faffote yannara jawaante uyitannonkehu hiittoonniiti? VIIDIYO laꞌe.
Qullaawu Maxaafi huuccatto wodanaaꞌmineemmo gede kaaꞌlitannonketa kulanno. Filiphisiyusi Sokka 4:6, 7 nabbabbe; hakkiinni aante noo xaꞌmuwa hasaabbe:
-
Huuccatto qarranke baala hooltanno yaa ikka hoogirono, kaaꞌlitannonkehu hiittoonniiti?
-
Yihowa mayi mayi daafira huucciꞌra hasiꞌratto?
Ati tenne afootto?
“Hamiiꞌni” yaa “ikkona” woy “eewanni” yaate. Hundi warinni kayise, mannu huuccatto assiꞌre kaꞌꞌanno woyite “hamiiꞌni” yaanno.—1 Duduwo 16:36.
7. Huuccatto assiꞌratto yanna heedhohe
Mito woyite loosu batiꞌrannonke daafira huuccatto assiꞌra hambammora dandiineemmo. Yesuusi huuccatto assiꞌrate mageeshshi geeshsha diinaggaawino? Maatewoosi 14:23 nna Maarqoosi 1:35 nabbabbe; hakkiinni aante noo xaꞌmuwa hasaabbe:
-
Yesuusi huuccattote yanna afiꞌrate maa assino?
-
Ati hiittee hiittee saatera huucciꞌra dandaatto?
MITU MANNI TOGO YAANNO: “Huuccatto assiꞌnannihu mulla beedho afiꞌrateetilla ikkiina macciishshannohu heeꞌreenna diꞌꞌikkino.”
-
Tennera ati mayite qolatto?
XAPHISHSHA
Woꞌma giddonni assiꞌneemmo huuccatto Maganunniwa shinqeemmo gede, giddiidi keere afiꞌneemmo gedenna Yihowa hagiirsiisate jawaante afiꞌneemmo gede kaaꞌlitannonke.
Kageeshsha Rosoottore
-
Huucciꞌra hasiissannonkehu ayeti?
-
Huucciꞌra hasiissannonkehu ma garinniiti?
-
Huuccatto maa maaho kaaꞌlitannonke?
EGENNO LEXXI
Huuccattote daafira duuchu manni xaꞌmanno xaꞌmuwara qolloonni dawaro nabbawi.
“Huuccattote Daafira Afa Hasiissannoheha Lamala Coye” (Agarooshshu Shae, Birra 1, 2010)
Huuccatto assiꞌra hasiissannohehu mayiraatironna huuccattokki woyyeessiꞌra dandaatto gara rosi.
“Huuccatto Assiꞌra Hasiissannoehu Mayiraati?” (Webisayitenkera fultino borro)
Qullaawu Maxaafi aye huucciꞌra hasiissannonketa kulannoro wodanchi.
“Qullaawoota Huucciꞌra Hasiissannoe?” (Webisayitenkera fultino borro)
Tenne muuziiqu viidiyo giddo, huucciꞌneemmo bayichinna yanna daafira qarrama hasiissannonkeronna teꞌee wodanchi.
Kurino Lai
DUUCHU MANNI XAꞌMANNO XAꞌMO
Yihowa Farciꞌraasine Qullaawa Maxaafa Xiinxallissannohu Hiittoonniiti?
Yihowa Farciꞌraasine ledo Qullaawa Maxaafa woxe baaxxittokkinni xiinxallatto woyite, baxoottota Qullaawu Maxaafi tiro horoonsiꞌra dandaatto. Xiinxallokkira maatekki gudisse woy jaallakki koyisa dandaatto.
