ROSO 37
Qullaawu Maxaafi Loosunna Woxu Daafira Mayyaanno?
Loosu woy woxu daafira yaadde egennootto? Hasiisannore afiꞌrate loonsanni heeꞌnenni Yihowara woꞌma lubbonkenni soqqama shota ikka hooggara dandiitanno. Qullaawu Maxaafi tennera kaaꞌlitannonketa kaajja amaale aannonke.
1. Qullaawu Maxaafi loosu daafira mayyaanno?
Maganu loosinkenni hagiidhinammora hasiꞌranno. Qullaawu Maxaafi, “Mannaho daafure loosiꞌrinohunni [hagiidhate] . . . kaꞌaanni woliri kaaꞌlannosiri dino” yaanno. (Rosiisaancho 2:24) Yihowa diinaggaawe loosanno. Ninkeno isi lawishsha harunsine diinaggaambe loonseemmoha ikkiro, iso hagiirsiinseemmo, ninkeno hagiidhineemmo.
Loosu hasiisanno coyeeti. Kayinni looso roorsiꞌne Yihowa magansiꞌra lashshi assa dihasiissannonke. (Yohaannisi 6:27) Heeshshonke giddo Yihowara soqqama roorsiꞌneemmoha ikkiro, isi maalaamittete hasiisannonkere aannonke.
2. Qullaawu Maxaafi woxu daafira mayyaanno?
Qullaawu Maxaafi woxu “caale” ikkannonketa kulannoha ikkirono, woxu callu hagiirraamma assannonkekkitano xawise kulanno. (Rosiisaancho 7:12) Hakko daafira, noonkerinni kassi yine heeꞌra hasiissannonke ikkinnina woxe baxa dihasiissannonke. (Ibiraawoota 13:5 nabbawi.) Noonkerinni kassi yine heeꞌneemmoha ikkiro, woꞌmanka woyite lexxate hagaaganno manna amaddanno yaaddonni ganteemmo. Qoleno hasiisannokki asalinni ganteemmo. (Lawishsha 22:7) Hakkiinni saeno, kasaarunna harancho yanna giddo duroonsitanno yinanniti qarru giddo tuggara dandiitanno loossa woshshaado diꞌꞌikkitannonke.
3. Wolootaho shaqqadda ikka dandiineemmohu hiittoonniiti?
Yihowa shaqqado Maganooti; ninkeno “aatenna [afiꞌnoommore] woleho iillishiꞌrate” sharrammeemmo woyite isi faale haꞌnanni heeꞌnoommo. (1 Ximootewoosi 6:18) Songo woxunni kaaꞌline, hattono qarrantinore hakko iso ammanate roduuwanke kaaꞌline shaqqille leellisha dandiineemmo. Yihowa illachishannohu uyinoommo woxi batinye ikkikkinni uyineemmo gede kakkayisinonkereeti. Woꞌma giddonkenni shaqqillunni uyineemmoha ikkiro, hagiirraamma ikkineemmo; Yihowano hagiirsiinseemmo.—Soqqamaasinete Looso 20:35 nabbawi.
LEDDE XIINXALLI
Loosoho quwa saꞌꞌa hooganna noonkerinni kassi yaa kaaꞌlitanno gara ledde rosi.
4. Loosatto loosinni Yihowa ayirranno gede assi
Yihowa ledo noonke jaaloomi loosoho gara ikkitino lao heedhannonke gede kaaꞌlannonke. VIIDIYO laꞌe; hakkiinni aante noo xaꞌmuwa hasaabbe.
-
Viidiyote giddo, Jeeseni loosu bayicho leellishino amanyoote hedatto woyite dhagge ikkannoheri maati?
-
Isi loosoho quwa saꞌꞌannokkita leellishinohu hiittoonniiti?
Qolasiyaasi Sokka 3:23, 24 nabbabbe; hakkiinni tenne xaꞌmo hasaabbe:
-
Woꞌma giddonkenni loosa hasiissannonkehu mayiraati?
Loosu hasiisanno coyeeti. Kayinni looso roorsiꞌne Yihowa magansiꞌra lashshi assa dihasiissannonke
5. Noonkerinni kassi yee heeꞌra kaaꞌlitannonke
Batinyu manni woxe cibbiꞌrate helli buufi yaanno. Qullaawu Maxaafi kayinni hakkiinni baxxitino amaale aannonke. Umi Ximootewoosi 6:6-8 nabbabbe; hakkiinni aante noo xaꞌmo hasaabbe:
-
Qullaawu Maxaafi ma assineemmo gede amaalannonke?
Noonkeri garire ikka hoogiro nafa, hagiirraamma ikka dandiineemmo. VIIDIYO laꞌe; hakkiinni, aante noo xaꞌmo hasaabbe.
-
Tini maate gari woxi noonsakkiha ikkirono, hagiirraamma ikkitanno gede assinonsari maati?
Kayinni lowori heeꞌreennanke xaano lexxa hasiꞌneemmoha ikkirona? Yesuusi tini gawajjitanno gara leellishanno lawishsha coyiꞌrino. Luqaasi 12:15-21 nabbabbe; hakkiinni aante noo xaꞌmo hasaabbe:
-
Yesuusi coyiꞌrino lawishshinni maa rosootto?—Kiiro 15 lai.
Lawishsha 10:22 nna 1 Ximootewoosi 6:10 nabbabbe. Hakkiinni, aante noo xaꞌmuwa hasaabbe:
-
Yihowa ledo jaalooma kalaqiꞌratenna lowo woxe afiꞌrate giddo roore hasiisannohu hiikkoye lawannohe? Mayira?
-
Woxeho hagaaga mayi qarra abbitanno?
6. Yihowa hasiisannonkere wonshannonke
Loosunna woxu qarri Yihowa addaxxineemmoronna teꞌee leellishara dandaanno. Togoo qarri tuncu yaannonke woyite maa assa dandiineemmoro afate, VIIDIYO laꞌe; hakkiinni aante noo xaꞌmuwa hasaabbe.
-
Viidiyote giddo, rodoonke amadino qarri maati?
-
Isi konne qarra qeelate maa assino?
Maatewoosi 6:25-34 nabbabbe; hakkiinni aante noo xaꞌmo hasaabbe:
-
Heeshshonsa giddo Yihowara soqqama roorsidhannorira isi maa asseemmo yiino?
MITU MANNI TOGO YAANNO: “Maateꞌya towaaxxate seekke loosa hasiissannoe. Hakko daafira, lamalate kiiro songote gambooshshe haꞌra didandeemmo.”
-
Heeshshokki giddo ayewoteno Yihowa magansiꞌra balaxisiisa woyyitannota ammanatto gede assinohe qummeeshshi hiikkoyeti?
XAPHISHSHA
Maalaamittete looso loosanna woxu hasiisanno coyeeti; ikkirono Yihowara soqqammeemmokki gede guficho ikkankera wodha dihasiissannonke.
Kageeshsha Rosoottore
-
Loosoho quwa saꞌꞌattokki gede kaaꞌlahera dandaannori maati?
-
Nooherinni kassi yite heeꞌra kaaꞌlitannohehu hiittoonniiti?
-
Yihowa mannisira hasiisannonsare aara qaale eino. Ati isi eino qaale addaxxattota leellisha dandaattohu hiittoonniiti?
EGENNO LEXXI
Qullaawu Maxaafi woxu bushaho yaanno?
“Woxu Bunshe Baalate Buichooti?” (Webisayitenkera fultino borro)
Maganu hagiidhannohu ma garinni uyinummorooti?
“Qullaawu Maxaafi Aate Daafira Mayyaanno?” (Webisayitenkera fultino borro)
Kasaaru gawajjannori nookki coyeeti?
“Qullaawu Maxaafi Yaannore—Kasaara” (Baqqi Yiiyye!, Badheessa 2015)
Alba kasaara gaꞌnannohunna mooranno manchi heeshshosi biddi assiꞌranno gede kakkayisinosiri maatiro nabbawi.
“Farado Gulunfe Qolchammanni Qolchansho Baasa Baxeemmo” (Agarooshshu Shae, Bocaasa 1, 2011)
Kurino Lai
DUUCHU MANNI XAꞌMANNO XAꞌMO
Yihowa Farciꞌraasine Qullaawa Maxaafa Xiinxallissannohu Hiittoonniiti?
Yihowa Farciꞌraasine ledo Qullaawa Maxaafa woxe baaxxittokkinni xiinxallatto woyite, baxoottota Qullaawu Maxaafi tiro horoonsiꞌra dandaatto. Xiinxallokkira maatekki gudisse woy jaallakki koyisa dandaatto.
