ROSO 38
Maganu Elto Asse Uyinohe Heeshsho Ayirrisi
Heeshshote heeꞌrankenni hagiidhineemmo gede assannonkehu bacu coyi no. Qarru amadannonke woyite nafa, hagiidhineemmo gede assannonke coyi dihooganno. Yihowa elto asse uyinonke heeshsho ayirrinseemmota leellisha dandiineemmohu hiittoonniiti? Qoleno hatto assineemmo gede kakkayisannonkehu qaru coyi maati?
1. Heeshsho naadanna ayirrisa hasiissannonkehu mayiraati?
Heeshsho naadanna ayirrisa hasiissannonkehu baxillaanchu Anninke Yihowa uyinonke elto ikkitino daafiraati. Isi “heeshshote buichooti”; heeshsho baala kalaqinohu isooti. (Faarso 36:9) “Heeshshonna foole, qoleno wolere manna baalaho aannohu [isooti].” (Soqqamaasinete Looso 17:25, 28) Yihowa heeꞌrate hasiisannonkere aannonkeha calla ikkikkinni, hagiidhinanni heeꞌneemmo gede assannonkeha batinye coye kalaqino.—Soqqamaasinete Looso 14:17 nabbawi.
2. Heeshsho ayirrinseemmota leellisha dandiineemmohu hiittoonniiti?
Yihowa, amakki godobbuhe saatenni kayise egenninohe. Maganu soqqamaanchi Daawiti, qullaawu ayyaaninni Magano togo yiino: “Ilamammora albaanni afoottoe.” (Faarso 139:16) Heeshshokki Yihowa albaanni ayirradote. (Maatewoosi 10:29-31 nabbawi.) Mittu manchi afanni heeꞌrenni mannu heeshsho wole agurina isonooto shiiro Yihowa lowo geeshsha dadillanno. a (Fulo 20:13) Qoleno hasiisikkinni heeshshonke gawajjannore assinummoro woy ninke qoropha bunsheenna wolu manni heeshsho gawajjanturo isi dadillanno. Ninkeneeto towaaxxineemmohanna wolu manni heeshsho ayirrinseemmoha ikkiro, Maganu elto asse uyinonke heeshsho naandeemmota leellinsheemmo.
LEDDE XIINXALLI
Heeshsho ayirrisattota leellisha dandaattota mite doogga rosi.
3. Fayyimmakki towaaxxi
Woꞌmanka woyite Yihowa fajjo wonshate qaale eꞌnoommo daafira, heeshshonke woꞌmatenni isira soqqammeemmo. Kiristaanu ‘mannimmansa Maganoho kakkalo’ asse shiqishanno daafira, fayyimmansa towaaxxa hasiissannonsa. Roomu Sokka 12:1, 2 nabbabbe; hakkiinni aante noo xaꞌmuwa hasaabbe:
-
Fayyimmakki towaaxxatto gede kakkayisannoheri maati?
-
Hatto assa dandaattoti mite doogga hiikkuriiti?
4. Dano woy reyo abbara dandaannore qorophi
Qullaawu Maxaafi dano abbara dandaanno coye qorophineemmo gede amaalannonke. Dano abbannore gargadhate assa dandiinanniha mito coye afate, VIIDIYO laꞌe.
Lawishsha 22:3 nabbabbe; hakkiinni ateno wole mannano gawajjannore qoropha dandaatto gara hasaabbe:
-
mini giddo
-
loosatto bayicho
-
ispoortete yannara
-
hodhishshu uduunne seekkatto woy gulufatto woyite
5. Godowa noo qaaqqi heeshsho ayirrisi
Daawiti, mittu qaaqqi amasi godowira heeꞌreenna ikkannorenna lophanno gara Yihowa seekke afinota xawisino. Faarso 139:13-15, 17 nabbabbe; hakkiinni tenne xaꞌmo hasaabbe:
-
Yihowa hedo garinni, mittu manchi heeꞌra hanafannohu ilamanno woyiteetinso, amasi godobbannosi woyiteeti?
Yihowa hundi Israeelera uyino seeri, amateno godowa noo qaaqqiserano agarooshshe ikkannoho. Fulo 21:22, 23 lekkaalliidi qaagiishshinni nabbabbe; b hakkiinni aante noo xaꞌmuwa hasaabbe:
-
Yihowa hundi waro, godowa noo qaaqqo hedeweelcho shiino mancho ma garinni laꞌꞌanno?
-
Hatto ikkiro, mittu manchi afanni heeꞌrenni tenne assiro Yihowara mayi macciishshamannosi? c
-
Yihowara tenne daafira noosi lao hedatto woyite mayyaatto?
Mitte mancho heeshsho ayirrissannota ikkituro nafa, godowu gato huna agurranna woluri assa dandiitannori nookkiha lawasera dandaanno. Isayaasi 41:10 nabbabbe; hakkiinni aante noo xaꞌmuwa hasaabbe:
-
Mitte mancho godowu gato huntanno gede xixxiimbannise woyite, kaaꞌlannose gede aye huucciꞌra hasiissannose? Mayira?
MITU MANNI TOGO YAANNO: “Mitte mancho godobbinoti ise ikkitu geeshsha, godowu gato huntannoronna teꞌee umise doodha dandiitanno.”
-
Amatenna godowa noo qaaqqise heeshsho Yihowa albaanni ayirrado ikkitinota ammanatto gede assinoheri maati?
XAPHISHSHA
Qullaawu Maxaafi, Yihowa elto asse uyinonke heeshsho banxeemmo gede, ayirrinseemmo gedenna gawajjannorinni agarreemmo gede amaalannonke. Uminketano ikko wolu manni heeshsho konni garinni laꞌꞌa hasiissannonke.
Kageeshsha Rosoottore
-
Mannu heeshsho Yihowa albaanni ayirrado ikkitinohu mayiraati?
-
Mittu manchi afanni heeꞌrenni lubbo shiiro Yihowara mayi macciishshamannosi?
-
Ati heeshsho ayirrisatto? Mayira?
EGENNO LEXXI
Elto ikkitino heeshshora Yihowa galata dandiineemmohu hiittoonniiti?
‘Godowu gato huntino mancho Maganu maaranno?’ yitanno xaꞌmora dawaro nabbawi.
“Godowu Gato Hunate Daafira Qullaawu Maxaafi Mayyaanno?” (Webisayitenkera fultino borro)
Heeshsho Maganu albaanni ayirrado ikkitinota afanke dancha boohaarsha doodhate kaaꞌlitannonke gara rosi.
“Ispoorte Loosate Yite Akkimale Ikka Hasiissannohe?” (Baqqi Yiiyye!, Birra 8, 2000)
Mittu manchi isonooto shaate hedanni nooha ikkirona? Qullaawu Maxaafi kaaꞌlannosi gara wodanchi.
a Yihowa dadillunni hiiqqantinore lowo geeshsha mararanno. (Faarso 34:18) Mittu manchi xissiisiꞌre reyo halchanno gede assinosi qarri Yihowara leellannosi; qoleno isi togoo manna kaaꞌla hasiꞌranno. Maganu kaaꞌlo togoo hedo gargadhate jawaante ikkitanno gara afate, konni rosira Egenno Lexxi yaanno gafira qummi assinoonniha “Aneneeto Shaate Hedanni Noommoha Ikkiro Qullaawu Maxaafi Kaaꞌlannoe?” yaanno birxicho nabbawi.
b Fulo 21:22, 23 (NW): “Mannu mimmitu ledo sharramanni heeꞌre godowinni noo mancho gawajjeenna ise barru iillikkinni ilturo, kayinni reyinohu hoogiro, gawajji manchi minaannise kuꞌlannore baata hasiissannosi; geerru baati yaannosire baata hasiissannosi. Reyinohu heeꞌriro kayinni, lubbote bayicho lubbo qollanni gede assi.”
c Konni albaanni godowu gato hunino meenti, Yihowa gatona yaansara dandaanno daafira quwa sae insaneeto bushiisha dihasiissannonsa. Ledde afate, konni rosira Egenno Lexxi yaanno gafi hunda qummi assinoonniha “Godowu Gato Hunate Daafira Qullaawu Maxaafi Mayyaanno?” yaanno birxicho nabbawi.
Kurino Lai
DUUCHU MANNI XAꞌMANNO XAꞌMO
Yihowa Farciꞌraasine Qullaawa Maxaafa Xiinxallissannohu Hiittoonniiti?
Yihowa Farciꞌraasine ledo Qullaawa Maxaafa woxe baaxxittokkinni xiinxallatto woyite, baxoottota Qullaawu Maxaafi tiro horoonsiꞌra dandaatto. Xiinxallokkira maatekki gudisse woy jaallakki koyisa dandaatto.
