ROSO 40
Maganu Albaanni Xuru Nookkire Ikka Dandiineemmohu Hiittoonniiti?
Hanni barru barrunku buxuqqante qaaqqisera sagale worte uyitanno ama hedi. Ise sagale wortanno woyite baalunkuri lawishshaho sagale, saane, dissitenna boosaallu ishinannokki gede qorophitanno. Hatto assase, qaaqqise fayyimmara lowore kaaꞌlitanno; qoleno laꞌꞌanno manni, konne qaaqqo annisinna amasi seekke towaaxxannota afanno gede assitanno. Hatteente gede, baxillaanchu Anninke Yihowa bisinkenna qooxeessinke hattono amanyootinke xuru nookkiha ikkara hasiꞌranno. Xuru nookkire ikkanke uminkera kaaꞌlitannonke; hattono Yihowa ayirranno gede assitanno.
1. Bisinkenna qooxeessinke xuru nookkiha ikkanno gede assiꞌra dandiineemmohu hiittoonniiti?
Yihowa “Qullaawoota ikke!” yiinonke. (1 Pheexiroosi 1:16) Qullaawoota ikkate, bisinke, qooxeessinkenna amanyootinke xuru nookkiha ikka hasiissannosi. Bisinkenna qooxeessinke xuru nookkiha ikkanno gede, bisonkenna uduunnenke ganyine hayishshiꞌra, minenkenna uduunnichonke ishinu nookkihanna qucuꞌmi assiꞌra hasiissannonke. Gambooshshu Addaraashenke feyano kaaꞌla dandiineemmo. Bisinkenna qooxeessinke xuru nookkiha ikkiro, Yihowa ayirranno.—2 Qorontoosi 6:3, 4.
2. Xuru noonkekkire ikkate, hiittoo rosichonna gade giwa hasiissannonke?
Qullaawu Maxaafi, “manninatenna ayyaana batteessannori baaluwiinni umonke [keereensiꞌneemmo]” gede amaalannonke. (2 Qorontoosi 7:1) Konni daafira, manninatenkenna surrenke daafanno coye baalanka giwa hasiissannonke. Hendeemmori Yihowa hagiirsiisannore ikka hasiissannosi; hakko daafira gara ikkitinokki hedo hooꞌlate sharrama hasiissannonke. (Faarso 19:14) Qoleno maaeela coye coyiꞌneemmokki gede qoropha hasiissannonke.—Qolasiyaasi Sokka 3:8 nabbawi.
Manninatenkenna amanyootenke batteessannohu wolu coyi hiikkoyeti? Mite coyibba manninatenke daaffara dandiitanno. Hakko daafira, sijaara diangeemmo, caate diꞌꞌinteemmo, jingilli assitanno xagga doogimale diadhineemmo. Kuri coyibbawiinni xeertiꞌranke roore fayyuulle ikkineemmo gede kaaꞌlitannonke; hattono heeshsho ayirrinseemmota leellishshanno. Qoleno amanyootinke xuru nookkiha ikkanno gede, maasterbeeshiinenna a teeda baꞌino misilla (pornogiraafe) laꞌꞌa qoropha hasiissannonke; kuni batteessanno rosichooti. (Faarso 119:37; Efesooni Sokka 5:5) Konne rosicho qeeꞌla shota ikka hooggara dandiitanno; Yihowa kaaꞌlonni kayinni qeeꞌla dandiinanni.—Isayaasi 41:13 nabbawi.
LEDDE XIINXALLI
Bisinkenna qooxeessinke xuru nookkiha ikkasi Yihowa ayirranno gede assitanno garanna batte ikkino rosicho qeeꞌla dandiinanni gara huwati.
3. Bisinkenna qooxeessinke xuru nookkiha ikkiro Yihowa ayirranno
Yihowa hundi Israeelera uyino seera xiinxallanke, isi mannisi xuru nookkiha ikkara hasiꞌrannota huwanteemmo gede kaaꞌlitannonke. Fulo 19:10 nna 30:17-19 nabbabbe; hakkiinni aante noo xaꞌmuwa hasaabbe:
-
Tini qummeeshshuwa Yihowa manninatinke hiittooha ikkara hasiꞌrannota leellishshanno?
-
Bisikkinna qooxeessikki woꞌmanka woyite xuru nookkiha ikkanno gede maa assa dandaatto?
Bisinkenna qooxeessinke xuru nookkiha ikkanno gede assiꞌrate yannanna sharro hasiissanno. Ikkollana, heeꞌneemmo qarqari woy maalaamittetenni noonkeri ikki geeshshihano ikkiro, xuru noonkekkire ikka dandiineemmo. VIIDIYO laꞌe; hakkiinni aante noo xaꞌmo hasaabbe.
-
Noonke uduunnicho xuru nookkihanna qucuꞌmi assiꞌranke, mannu sabbakate loosonke ayirrisanno gede assitannohu hiittoonniiti?
4. Busha rosicho qeeꞌli
Yihowa busha rosicho baala qeelleemmo gede kaaꞌlannonke
Sijaara agattoha woy jingilli assitanno xagga doogimale adhattoha ikkiro, togoo rosicho qeeꞌla mageeshshi geeshsha qarrissannoro afoottoha ikkara dandaanno. Togoo rosicho qeeꞌlate kaaꞌlannori maati? Togoo rosichi gawajjahera dandaannohu hiittoonniitiro hedi. Maatewoosi 22:37-39 nabbabbe; hakkiinni, sijaara aganna jingilli assitanno xagga adha konni woroonni noore gawajjitanno gara hasaabbe:
-
Yihowa ledo noonke jaalooma
-
togoo gade noosi manchi maatenna qooxeessisira noo manna
Busha rosicho qeelate mixo fushshiꞌri. b VIIDIYO laꞌe.
Layinki Qorontoosi 4:7 nabbabbe; hakkiinni aante noo xaꞌmo hasaabbe:
-
Ganyine huuccatto assiꞌra, Qullaawa Maxaafa xiinxallanna gambooshshe haꞌra busha gade qeeꞌlate wolqa ikkitannohu hiittoonniiti?
5. Maaeela hedonna assoote qeeꞌlate sharrami
Qolasiyaasi Sokka 3:5 nabbabbe; hakkiinni aante noo xaꞌmuwa hasaabbe:
-
Teeda baꞌino misilla laꞌꞌa, sekistingenna c maasterbeeshiine Yihowa albaanni batte ikkitinota mayinni anfeemmo?
-
Yihowa amanyootunni xuru nookkire ikkinammora hasiꞌrasi gara labbannohe? Mayira?
Maaeela hedo gargadha dandiinanni gara wodanchi. VIIDIYO laꞌe.
Yesuusi, amanyootunni xuru noonkekkire ikkine heeꞌrate murciꞌre kaꞌꞌa hasiissannonketa lawishshunni rosiisino. Maatewoosi 5:29, 30 nabbabbe; hakkiinni tenne xaꞌmo hasaabbe:
-
Yesuusi hatto yiinohu mannimmanke gawajja hasiissannonketa kulate ikkikkinni, qaafo adha hasiissannonketa rosiisateeti. Mittu manchi maaeela hedo qeeꞌlate hiittoo qaafo adha hasiissannosi? d
Maaeela hedo qeeꞌlate sharrantanni noottoha ikkiro, Yihowa sharrokki naadanno. Faarso 103:13, 14 nabbabbe; hakkiinni aante noo xaꞌmo hasaabbe:
-
Maaeela hedo qeeꞌlate sharrantanni noottoha ikkiro, kuni qummeeshshi sharrokki agurattokki gede jawaachishannohehu hiittoonniiti?
Uwa qeelama diꞌꞌikkitino!
‘Xaano qeelamoommo. Ma assiꞌrayi shelleggameemmo?’ yee heda rakkankera dandiitanno. Ikkirono hanni konni garinni hedate woꞌnaali: Mittu qolchamanno manchi gufichu ganeennasi uwiro, qeelamino yaa diꞌꞌikkino; woy badhera haꞌre qolchansho wirro hanafa hasiissannosi yaano diꞌꞌikkino. Hatteente gede, bushu rosichi wirro kaihero, konne rosicho qeeꞌlate sharramatto sharrora qeelamootto yaa diꞌꞌikkino. Qoleno kageeshsha woyyeessiꞌrootto coyinni hagiidha dandaatto. Busha rosicho qeeꞌlate sharrammanni woyite uwanni kaꞌꞌa nooreentilla. Hakko daafira, hexxo mudhitooti! Yihowa kaaꞌlonni, busha rosicho qeeꞌla dandaatto.
MITU MANNI TOGO YAANNO: “Bushu rosichi wolqaꞌyara aleenni ikkinoe. Qeeꞌla dandeemmoha dilawannoe.”
-
Hatto yaanno manchi Yihowa kaaꞌlonni busha gadesi qeeꞌla dandaannota kulate hiikkonne qummeeshsha horoonsiꞌra dandaatto?
XAPHISHSHA
Bisinke, surrenkenna amanyootinke xuru nookkiha ikkiro, Yihowa hagiidhanno.
Kageeshsha Rosoottore
-
Xuru noonkekkire ikka lowo geeshsha hasiissannota ikkitinohu mayiraati?
-
Bisikkinna qooxeessikki xuru nookkiha ikkanno gede assiꞌra dandaattohu hiittoonniiti?
-
Hedokkinna amanyootikki xuru nookkiha ikkanno gede assiꞌra dandaattohu hiittoonniiti?
EGENNO LEXXI
Maalaamittetenni nooheri garire ikka hoogiro nafa, bisikkinna qooxeessikki xuru nookkiha ikkanno gede maa assa dandaatto?
Sijaara aga agurate maa maa assa dandaatto?
“Sijaara Aga Agura Dandiinanni Gara” (Baqqi Yiiyye!, Onkoleessa 2010)
Teeda baꞌino misilla laꞌꞌa gawajjitanno gara wodanchi.
“Teeda Baꞌino Misilla Qarra Diafidhinonso Gawajjitanno?” (Agarooshshu Shae, Woxawaajje 1, 2013)
Mittu manchi teeda baꞌino misilla araado qeeꞌla dandiinohu hiittoonniitiro nabbawi.
“Duucha Hige Qeelamoommoha Ikkirono Jeefote Qeeloommo” (Agarooshshu Shaera fulino birxicho)
a Maasterbeeshiinete yaa siimu xaadooshshi hasatto wonshiꞌrate yine meessiha sirote biso amammaxxate rosichooti.
b Egenno Lexxi yaanno gafi hunda qummi assinoonnihu “Sijaara Aga Agura Dandiinanni Gara” yaanno birxichi sijaaru araado qeeꞌlate assa dandiinannire xawisanno.
c Sekistingete yaa siimu xaadooshshi yorto kakkayissanno sokka, foto, woy viidiyo silketenni woy kompiyuterete widoonni soyate.
d Maasterbeeshiinete gade qeeꞌlate kaaꞌlitanno amaale afiꞌrate, Wedellu Xaꞌmanno Xaꞌmonna Mala Ikkitanno Dawaro, Xiraaze 1 yaanno maxaafira noota, “Maasterbeeshiinete Gade Qeeꞌla Dandeemmohu Hiittoonniiti?” yitannota fooliishsho 25 nabbawi.
Kurino Lai
DUUCHU MANNI XAꞌMANNO XAꞌMO
Yihowa Farciꞌraasine Qullaawa Maxaafa Xiinxallissannohu Hiittoonniiti?
Yihowa Farciꞌraasine ledo Qullaawa Maxaafa woxe baaxxittokkinni xiinxallatto woyite, baxoottota Qullaawu Maxaafi tiro horoonsiꞌra dandaatto. Xiinxallokkira maatekki gudisse woy jaallakki koyisa dandaatto.
