ROSO 50
Maate Hagiirru Noota Assiꞌra Dandaatto Gara—Gafa 2
Ooso Yihowa eltooti. Yihowa annuwunna amuuwu tenne elto seekkite towaattara hasiꞌranno. Isi annuwunna amuuwu oosonsa towaattanno gede kaaꞌlitannota kaajja amaale uyino. Yihowa aanno amaale, oosono maate hagiirru noota ikkitanno gede assa dandiitanno gara kultannote.
1. Yihowa annuwanna amuuwa mayyee amaalino?
Yihowa, annuwunna amuuwu oosonsa baxxaranna dandaami deerrinni insa ledo lowo yanna sayissara hasiꞌranno. Qoleno oosonsa gawajjanno coyiwiinni agartansaranna Qullaawu Maxaafi biddishshi garinni qajeelsitansara hasiꞌranno. (Lawishsha 1:8) Isi annuwate togo yaanno biddishsha uyino: “Oosoꞌne Mootichu amaalenni seejjitinanni lossensa.” (Efesooni Sokka 6:4 nabbawi.) Annuwunna amuuwu oosonsa qajeelsitanno woyite Yihowa biddishsha harunsitannoha ikkironna konne qeechansa wolu mannira sayisse aantenni insa uminsa wonshitannoha ikkiro isi hagiidhanno.
2. Yihowa ooso mayyee amaalino?
Yihowa ooso “Iltinoꞌnerira hajajammensa” yee amaalino. (Qolasiyaasi Sokka 3:20 nabbawi.) Ooso annansanna amansa ayirrissannohanna hajajantannonsaha ikkiro, Yihowa hagiirsiissanno; anninsanna amansano hagiidhanno. (Lawishsha 23:22-25) Yesuusi shiinqu noo yannara oosote dancha lawishsha ikkino. Isi guuta ikkirono, annisiranna amasira hajajamino hattono ayirrisinonsa.—Luqaasi 2:51, 52.
3. Maatete deerrinni Yihowawa shiqa dandiitinannihu hiittoonniiti?
Ooso iltinoonniha ikkiro, oosoꞌne kiꞌnente gede Yihowa baxxannore ikkitara hasidhinanniti dihuluullissannote. Oosoꞌne Yihowa baxxannore ikkitanno gede kaaꞌla dandiitinannihu hiittoonniiti? Aante noota Qullaawu Maxaafi amaale harunsatenniiti: “Oosoꞌnerano [Yihowa qaale] rosiissensa. Mineꞌne ofoltinanni woyite, doogo hadhinanni woyiteno . . . hajajoꞌyare kula agurtinoonte.” (Marro 6:7) Oosoꞌne mitto coye qaaggara hasidhiniro, hakkoye coye marro marro higgine kultinanninsati egennantinote. Kuni qummeeshshi, oosoꞌnera Yihoware ganyitine kultinanninsa faro duuchanka woyite hasiꞌra hasiissannoꞌneta kulannoho. Lamalate kiiro maateꞌne ledo Yihowa magansidhinanni yanna gaaꞌma danchate. Ooso iltinoonnikkiha ikkirono, lamalate kiiro Maganu Qaale mitteenni xiinxallate yanna gaaꞌmaꞌne kaaꞌlitannoꞌne.
LEDDE XIINXALLI
Maate hagiirru noota ikkitanno gedenna teesse heedhanno gede kaaꞌlitanno amaale xiinxalli.
4. Oosoꞌne baxillunni qajeelsensa
Ooso qajeelsa shota ikka hooggara dandiitanno. Qullaawu Maxaafi tennera kaaꞌlannohu hiittoonniiti? Yaiqoobi 1:19, 20 nabbabbe; hakkiinni aante noo xaꞌmuwa hasaabbe:
-
Annuwunna amuuwu oosonsa ledo hasaabbanno woyite baxxannonsata leellisha dandiitannohu hiittoonniiti?
-
Annu woy ama hanqite heedhe oosonsa seejja hasiissannonsakkihu mayiraati? a
5. Oosoꞌne gawajjannonsa coyiwiinni agarre
Oosoꞌne gawajjanno coyiwiinni agarate, mittu mittunku qaaqqira siimu xaadooshshi daafira rosiisaꞌne lowo geeshsha hasiissannote. Hatto assa saalfachishshannoꞌneha ikkara dandaanno. VIIDIYO laꞌe; hakkiinni aante noo xaꞌmuwa hasaabbe.
-
Mitu annuwiranna amuuwira oosonsara siimu xaadooshshi daafira kula qarra ikkitannonsahu mayiraati?
-
Mite annuwanna amuuwi oosonsara siimu xaadooshshi daafira kula dandiitinohu hiittoonniiti?
Balanxe masaalloonninte gede, Sheexaanu alame roore bushshanni hadhino. Layinki Ximootewoosi 3:1, 13 nabbabbe; hakkiinni tenne xaꞌmo hasaabbe:
-
Kiiro 13 kulloonnihu bushu manni giddo mitootu qaaqquulle bushiishshannoreeti. Tenne hendiro, annuwunna amuuwu qaaqquullinsara siimu xaadooshshi daafira kulanna insaneeto togoo manniwiinni agadhitanno gara rosiisa hasiissannonsahu mayiraati?
Ati tenne afootto?
Yihowa Farciꞌraasine, annuwunna amuuwu oosonsara siimu xaadooshshi daafira rosiissanno gedenna bushiishannonsa manniwiinni agartannonsa gede kaaꞌlannoha batinye uduunne qixxeessitino. Lawishshaho:
-
Qaaqquulleꞌne Gawajjannorinni Agarre (viidiyo)
-
Bayiru Rosiisaanchi Yaannore Macciishshi (Amaaru Afoo), fooliishsho 10 hattono 32
-
“Qaaqqiꞌnera Siimu Xaadooshshire Rosiisa” (Baqqi Yiiyye! (Amaaru Afoo) Kiiro 5 2016)
6. Annakkinna amakki ayirrisi
Qaaqquulluno wedellootuno annansanna amansa hasaawissanno woyite ayirrissannonsata leellisha dandiitanno. VIIDIYO laꞌe; hakkiinni aante noo xaꞌmuwa hasaabbe.
-
Wedellootu annansanna amansa ayirrinyunni hasaawisansa dancha ikkitinohu mayiraati?
-
Mittu wedellichi annasinna amasi ayirrisannonsata leellishanno garinni hasaawisa dandaannohu hiittoonniiti?
Lawishsha 1:8 nabbabbe; hakkiinni tenne xaꞌmo hasaabbe:
-
Mittu wedellichi annisinna amasi biddishsha uyitannosi woyite maa assa hasiissannosi?
7. Yihowa maateꞌne ledo mitteenni magansidhe
Yihowa Farciꞌraasine ikkitino maate lamalate kiiro Yihowa mitteenni magansiꞌrate yanna gaaꞌmitanno. Maatete magansiꞌra yannara maa maa assa dandiinanni? VIIDIYO laꞌe; hakkiinni aante noo xaꞌmuwa hasaabbe.
-
Maatete Magansiꞌra agurrikkinni assiꞌra dandiinannihu hiittoonniiti?
-
Annuwunna amuuwu maatete magansiꞌra maatensara kaaꞌlitannotanna hagiirsiissannota ikkitanno gede maa assa dandaanno?—Konni rosira hanafote noo misile lai.
-
Kiꞌne maatera Maganu Qaale mitteenni xiinxalla qarra ikkitannoꞌne gede assara dandaannori maati?
Hundi Israeele waro, Yihowa maate ganyite Qullaawa Borro daafira hasaabbara hajajino. Marro 6:6, 7 nabbabbe; hakkiinni tenne xaꞌmo hasaabbe:
-
Konne xintu seera loosu aana hosiisa dandaattohu hiittoonniiti?
Maatete magansiꞌrara kaaꞌlitanno amaale:
-
Songote gambooshshira mitteenni qixxaabbe.
-
Maateꞌne baxxara dandiitannota mitte Qullaawu Maxaafi xagge nabbabbine hasaabbe.
-
Shiimaaddu qaaqquulli nooꞌneha ikkiro, jw.org aana qaaqquulleho qixxeessinoonni rosiishsha dirrisidhe woy attaꞌme.
-
Wedellu ooso nooꞌneha ikkiro, jw.org aana wedellootaho qixxeessinoonniha mitto birxicho hasaabbe.
-
Oosoꞌne ledo mitte Qullaawu Maxaafi xagge diraamu garinni shiqishshe.
-
jw.org aaninni mitte viidiyo laꞌine hasaabbe.
MITU MANNI TOGO YAANNO: “Loosu batiꞌrannonke daafira, oosonkera Qullaawa Maxaafa rosiinseemmo yanna dinonke.”
-
Ati tennera mayyaatto?
XAPHISHSHA
Yihowa annuwunna amuuwu oosonsa baxxara, qajeelsitaranna gawajjannonsa coyiwiinni agartansara hasiꞌranno; oosono annansanna amansa ayirrissaranna hajajantansara hasiꞌranno; qoleno maate mitteenni magansidhasira hasiꞌranno.
Kageeshsha Rosoottore
-
Annuwunna amuuwu oosonsa qajeelsanna gawajjannonsa coyiwiinni agara dandiitannohu hiittoonniiti?
-
Ooso annansanna amansa ayirrissannota leellisha dandiitannohu hiittoonniiti?
-
Lamalate kiiro maatete ledo mitteenni Yihowa magansiꞌrate yanna gaaꞌma kaaꞌlitannohu hiittoonniiti?
EGENNO LEXXI
Qaaqquullu rosa hasiissannonsahu jajjabba ikkitanno woyitira kaaꞌlannonsa rosi hiikkoyeti?
“Ooso Rosa Hasiissannonsaha Lee Roso” (Baqqi Yiiyye! Kiiro 2 2019)
Geedhino annanna ama towaaxxate kaaꞌlitannota Qullaawu Maxaafi amaale huwati.
Alba ooso lossiꞌnanni gara afinokki manchi oososi danchu garinni lossiꞌra dandiinohu hiittoonniitiro wodanchi.
Annuwu labballi oosonsa ledo noonsa aante kaajjishiꞌra dandiitannohu hiittoonniiti?
a Qullaawu Maxaafi kulanno garinni, “seejjate” yaa mitto qaaqqo rosiisate, raga leellishatenna busha hedosi woy akatasi aguranno gede kaaꞌlate yaate. Kayinni seejja beebba assiꞌra woy kaajjillunni gawajja horo diꞌꞌikkitino.—Lawishsha 4:1.
Kurino Lai
DUUCHU MANNI XAꞌMANNO XAꞌMO
Yihowa Farciꞌraasine Qullaawa Maxaafa Xiinxallissannohu Hiittoonniiti?
Yihowa Farciꞌraasine ledo Qullaawa Maxaafa woxe baaxxittokkinni xiinxallatto woyite, baxoottota Qullaawu Maxaafi tiro horoonsiꞌra dandaatto. Xiinxallokkira maatekki gudisse woy jaallakki koyisa dandaatto.
