ROSO 31
Maganu Mangiste Maati?
Qullaawu Maxaafiti qara sokka Maganu Mangistere kultannote. Yihowa tenne Mangiste widoonni, hunda uullate hedinore wonshanno. Ikkina Maganu Mangiste maati? Tini Mangiste xa gashshitanni noota mayinni anfeemmo? Maganu Mangiste kageeshsha maa assitino? Albillittena maa assitanno? Konninna aanannohu lamu rosira, tenne xaꞌmuwara dawaro afiꞌneemmo.
1. Maganu Mangiste maati? Tenne Mangiste Moote ayeti?
Maganu Mangiste Maganu Yihowa xintino gashshooteeti. Tenne Mangiste Moote Yesuusi Kiristoosiiti; isi gashshannohu gordoho heeꞌreeti. (Maatewoosi 4:17; Yohaannisi 18:36) Qullaawu Maxaafi, “[Yesuusi] hegerera moohanno” yaanno. (Luqaasi 1:32, 33) Yesuusi Maganu Mangiste Moote ikkino daafira, uullate aana noo manna baalanka gashshanno.
2. Yesuusi ledo mookkannori ayeooti?
Yesuusi gashshannohu callisi heeꞌre diꞌꞌikkino. ‘Gaꞌre baalate, addi addi afoo coyiꞌrannohu baalu giddonni, hattono gosanna sirchu baalu’ giddonni doorroonni manni ‘gobba gashshanno.’ (Yohaannisi Ajuuja 5:9, 10) Kiristoosi ledo gashshanno manni meꞌꞌeho? Yesuusi uullara dayi yannanni kayise, lowo miliyoone ikkanno Kiristaani isi rosaano ikkino. Ikkollana, iimira hadhe Yesuusi ledo mookkannori 144,000 callaho. (Yohaannisi Ajuuja 14:1-4 nabbawi.) Uullate aana heeꞌrannohu wolu Kiristaani baalunku kayinni Maganu Mangiste qansoota ikkanno.—Faarso 37:29.
3. Maganu Mangiste mannu gashshoote roortannohu mayinniiti?
Uullate gashshaasine danchare assate sharranturo nafa, heddinore baala assitanno wolqa dinonsa. Qoleno mite yanna gedensaanni insa bayicho wolu sae gashshasi digattanno; insa bayicho saꞌe gashshitannori qole mannansa kaaꞌla hasidhannokkire ikkitara dandiitanno. Ikkollana, Maganu Mangiste Gashshaanchi Yesuusi bayicho sae gashshannohu wolu horo diheeꞌranno. Maganu xintinohu “horonta diigamannokki” gashshooteeti. (Daanieeli 2:44) Yesuusi uulla woꞌma gashshanno; qoleno isi dimallaadanno. Isi baxillaanchoho, shaqqadohonna taashshannoho; qoleno isi mannu mimmitoho shaqqado, baxillaanchonna taashshannoha ikkanno gede rosiisanno.—Isayaasi 11:9 nabbawi.
LEDDE XIINXALLI
Maganu Mangiste mannu gashshoote baala roortanno yineemmohu mayiraatiro rosi.
4. Maganu Mangiste uulla gashshitanno
Yesuusi Kiristoosi uullate aana mookkino gashshaano baalanta roortino wolqa noosi Gashshaanchooti. Maatewoosi 28:18 nabbabbe; hakkiinni aante noo xaꞌmo hasaabbe:
-
Uullate gashshaasine giddo silxaane Yesuusi geeshsha ikkannohu horo dino yineemmohu mayiraati?
Mannu gashshooti duucha woyite soorramanno; qoleno uullate gashshaasine uullate aana shiima shiima bayicholla gashshitanno. Maganu Mangistena? Daanieeli 7:14 nabbabbe; hakkiinni aante noo xaꞌmuwa hasaabbe:
-
Maganu Mangiste ‘gawalo nookkita’ ikkase ma garinni kaaꞌlitannonkeha lawannohe?
-
Maganu gashshooti uulla woꞌma gashshannoha ikkasi ma garinni kaaꞌlitannonkeha lawannohe?
5. Uullate gashshooti mannu ooso qarra tira didandiino
Maganu Mangiste mannu gashshoote hunte dargansa amada hasiissannosehu mayiraati? VIIDIYO laꞌe; hakkiinni aante noo xaꞌmo hasaabbe.
-
Uullate gashshaasine maa assitino?
Rosiisaancho 8:9 nabbabbe; hakkiinni aante noo xaꞌmuwa hasaabbe:
-
Maganu Mangiste uullate gashshoote hunte insa bayicho amada hasiissannoseha lawannohe? Mayira?
6. Maganu Mangiste gashshaasinera qarrinke leellannonsa
Mootenke Yesuusi manna ikke uullate aana heeꞌrino daafira, “wolqanke anjera [kaaꞌlannonkeho].” (Ibiraawoota 4:15) Qoleno Yihowa, Yesuusi ledo mookkannore 144,000 ammanantino labballonna meento doorinohu ‘gaꞌre baalate, addi addi afoo coyiꞌrannohu baalu, hattono gosanna sirchu baalu’ giddonniiti.—Yohaannisi Ajuuja 5:9.
-
Yesuusinna ledosi mookkannori baalunku qarrinke leellannonsare ikkitinota afakki jawaachishshannohe? Mayira?
Yihowa Yesuusi ledo mookkanno labballonna meento baalante gaꞌrenni doorino
7. Maganu Mangiste seeri uullate gashshooti fushshanno seerinni lowo geeshsha rooranno
Mangistubba qansootinsara kaaꞌlanno yite heddanno seera fushshitanno. Maganu Mangisterano umise seeri noose; Maganu Mangiste qansooti konne seera agadha hasiissannonsa. Umi Qorontoosi 6:9-11 nabbabbe; hakkiinni aante noo xaꞌmuwa hasaabbe:
-
Mannu baalunku Maganu seera ayirrisanno alamera heeꞌnanni heeshsho hiittoota labbannohe? a
-
Yihowa Mangistesi qansoota ‘Seeraꞌya agadhe’ yaasi gara labbannohe? Mayira?
-
Xaa yannara Maganu seera ayirrisannokki manni heeshshonsa biddi assiꞌra dandaannota leellishannori maati?—Kiiro 11 lai.
Mangistubba qansootansa kaaꞌlatenna agarate seera fushshitanno. Maganu Mangiste qansootase kaaꞌlatenna agarate fushshitanno seeri hakkiinni lowo geeshsha roorannoho
MITU MANNI TOGO YAANNO: “Ninke baalunku iima Yesuusi ledo moonkeemmo.”
-
Ati tennera mayyaatto?
XAPHISHSHA
Maganu Mangiste gordoho noo gashshooteeti; tini Mangiste uulla woꞌma gashshitanno.
Kageeshsha Rosoottore
-
Maganu Mangistera mookkannori ayeooti?
-
Maganu Mangiste mannu gashshoote baala roortannohu hiittoonniiti?
-
Yihowa Mangistesi qansooti maa assitara hasiꞌranno?
EGENNO LEXXI
Yesuusi Maganu Mangiste mama no yee rosiisinoro nabbawi.
“Maganu Mangiste Mannu Wodani Giddo Nooreeti?” (Webisayitenkera fultino borro)
Yihowa Farciꞌraasine mannu gashshootinni roore Maganu Mangistera ammanantannohu mayiraati?
Yihowa Yesuusi ledo mookkara doorinori 144,000 daafira Qullaawu Maxaafi mayyaannoro xiinxalli.
Mitte mancho usurante heedhe taashsho woꞌmitino alame abbannohu Magano calla ikkinota ammantanno gede assinoseri maati?
“Taashsho Abbannohu Ayetiro Afoomma Gara” (Baqqi Yiiyye!, Bocaasa 2011)
a Maganu seeri giddo gama 3ki Gafira ronseemmo.
Kurino Lai
DUUCHU MANNI XAꞌMANNO XAꞌMO
Yihowa Farciꞌraasine Qullaawa Maxaafa Xiinxallissannohu Hiittoonniiti?
Yihowa Farciꞌraasine ledo Qullaawa Maxaafa woxe baaxxittokkinni xiinxallatto woyite, baxoottota Qullaawu Maxaafi tiro horoonsiꞌra dandaatto. Xiinxallokkira maatekki gudisse woy jaallakki koyisa dandaatto.
