Magano Yihowanna Qaalesi Qullaawa Maxaafa Baxxannorira Baalaho:

Yesuusi, “Halaale affinanni; halaaluno borojjimmatenni fushshannoꞌne” yiino. (Yohaannisi 8:32) Hanni Qullaawu Maxaafi halaale umo rossini woyite mayi macciishshaminoꞌnero hedde! Kaphu woꞌmino alamera heeꞌne, halaale afanke tashshi assitannonke!—2 Ximootewoosi 3:1.

Maganu Yihowa halaale anfammora hasiꞌranno. Qoleno manna banxeemmo daafira, wolootahono konne halaale rosiisa hasiꞌneemmo. Ikkollana Maganoho soqqama calla diꞌꞌikkitanno. Yihowa seera lowo geeshsha ayirrinseemmo daafira, addu Kiristaani heeꞌranno garinni heeꞌrate sharrama hasiissannonke. Yesuusi Magano banxeemmota leellisha dandiineemmota qara doogo kulinonke. Isi togo yiino: “Ani Anniꞌya hajajo wonshanni baxillisinni heeꞌrummonte gede, kiꞌneno ane hajajo wonshitiniro, ane baxillinni heedhinanni.”—Yohaannisi 15:10.

Yesuusi Annasi lubbora baxanno daafira, Annisi assi yaannosire baala assanno. Heeꞌneemmo heeshshonni Yesuusi lawishsha harunsineemmoha ikkiro, Yihowa baxannonke; hattono addu hagiirre afiꞌneemmo. Yesuusi, “Konne coye affinoonni; affinoonniha assitiniro maassantinanni” yiino.—Yohaannisi 13:17.

Kuni maxaafi, Qullaawu Maxaafi giddo noo halaali garinni heedhinanni gara rossinanni gedenna Maganu jaala ikkitinanni gede kaaꞌlaꞌnera halchineemmo. Maganoho nooꞌne baxilli lexxanni haꞌranno gedenna “hegere heeshsho agadhitinanni . . . Maganu baxilli giddo” heedhinanni gede huuccatto assineemmoꞌne.—Yihuda 21.