1, 2. Ammanammoommore ikkate sharrammeemmo woyite Yihowara mayi macciishshamannosi?

 MITTO barra mittu qaaqqi rosu mininni higanni heeꞌre, giddo lowo woxi noo borsa uulla uwe nooha afi. Hakkiinni maa assiyya? Isi hasiꞌroommero umisira adhara dandaanno. Ikkollana hakkonne borsa annaho qolino. Qaaqqu ama tenne macciishshituti lowo geeshsha hagiidhitino.

² Rooru anninna ama oosonsa ammanantanno woyite hagiidhitanno. Iimi Anninke Yihowa “halaalu” Magano ikkino daafira, ammanammeemmo woyite hagiidhanno. (Faarso 31:5) Ninke iso hagiirsiisanna ‘woꞌmanka woyite ammanamme heeꞌra’ hasiꞌneemmo. (Tiito 2:10) Kawiinni aanchine ammanama qarra ikkitannonkeha shoole coye laꞌneemmo. Hakkiinni konne fonqolo qeelle ammanammoommore ikkinummoro mayi atoote afiꞌneemmoro ronseemmo.

3-5. (a) Ninkeneeto dongammora dandiineemmohu hiittoonniiti? (b) Ninkeneeto dongeemmokki gede mayi kaaꞌlannonke?

³ Wolootaho ammanamate, balanxe ninkeneetira ammanama woy umonke doga qoropha hasiissannonke. Kuni duucha woyite shota coye diꞌꞌikkino. Umi xibbi diro, Loodooqiyu songora heedhanno  roduuwi Magano hagiirsiissukkinni iso hagiirsiinsanni heeꞌnoommo yite hedde insaneeto doggino. (Yohaannisi Ajuuja 3:17) Ninkeno qoropha hoongummoro, ninkeneeto dongammora dandiineemmo.

⁴ Rosaanchu Yaiqoobi togo yiino: “Arrawosi eemadhikkinni Magano magansiꞌreemmo yaanno manchi umosi doganno; isi magansiꞌra haafaho.” (Yaiqoobi 1:26) ‘Afiinke abbita coyiꞌnummorono woy kaphinummorono, mito dancha coye assinummo geeshsha Magano hagiirsiisa dandiineemmo’ yine hendeemmoha ikkiro, ninkeneeto donganni heeꞌnoommo. Ikkina ninkeneeto dongeemmokki gede mayi kaaꞌlannonke?

⁵ Albanke hincilaallotenni layiꞌneemmo woyite, daninke hiittoohoro afa dandiineemmo. Qullaawa Maxaafa nabbambeemmo woyite kayinni giddiidi ayimmanke laꞌꞌa dandiineemmo. Qullaawu Maxaafi dancha akattankenna laanfenke afate kaaꞌlannonke. Hedonke, assootenkenna coyiꞌneemmo gara biddi assiꞌra hasiissannonkeha ikkiro, Qullaawu Maxaafi kulannonke. (Yaiqoobi 1:23-25 nabbawi.) Ikkollana ‘Mitte laanfeno dinoe’ yine hendeemmoha ikkiro, biddi assiꞌra hasiissannonkere biddi assiꞌra didandiineemmo. Konni daafira, addu ayimmanke bande afate Qullaawa Maxaafa horoonsiꞌra hasiissannonke. (Ermiyaasi Qurto 3:40; Hage 1:5) Huuccattono ayimmanke afate kaaꞌlitannonke. Yihowa fonqole laꞌꞌannonke gedenna laanfenke anfe biddi assiꞌneemmo gede kaaꞌlankera huucciꞌra dandiineemmo. (Faarso 139:23, 24) Yihowa ‘busha assitannore woy awaawurtannore giwannotanna suwashshu wodani noonsarira wodanisire kulannota’ anfoommo.—Lawishsha 3:32.

6. Minaanninna minaama mimmitoho ammanama hasiissannonsahu mayiraati?

⁶ Maatete giddo ammanama lowo geeshsha hasiissannote. Minaanninna minaama mimmitoho noore coyiꞌrannoha ikkiro, kuꞌu koꞌoye ammana dandaanno. Maatete giddo ammanama xeꞌinore assinanniti duucha doogga no. Lawishshaho minaanni woy minaama wolootaho gara ikkinokki baxille leellishara, teeda baꞌino misilla laꞌꞌara woy maaxame wolu ledo baxamara dandaanno. Faarsaasinchu togo yiino: “Kaphaanote songo disongeemmo; lawisiisaanote ledo dihoseemmo.” (Faarso 26:4) Hedokkinni nafa galtekkira ammanama xeꞌinore assattoha ikkiro, tini galtekki ledo noohe aante daaffanno.

7, 8. Ammanama hasiissannota ikkitinota oosokkira rosiisate, Qullaawa Maxaafa horoonsiꞌra dandaattohu hiittoonniiti?

 ⁷ Oosono ammanama hasiissannota rosa hasiissannonsa. Annuwunna amuuwu insara tenne rosiisate Qullaawa Maxaafa horoonsiꞌra dandaanno. Qullaawu Maxaafi ammanama xeꞌinore assino mannire kulanno. Lawishshaho: Akaani moorino; Giyaazi woxeho yee kaphino; Yihuda woxe moorino, hattono Yesuusa 30 birrira sayise hirino.—Iyyaasu 6:17-19; 7:11-25; 2 Mootoolla 5:14-16, 20-27; Maatewoosi 26:14, 15; Yohaannisi 12:6.

⁸ Qullaawu Maxaafi dancha lawishsha ikkannohu ammanamino mannireno kulanno. Lawishshaho: Yaiqoobi oososi afidhino woxe qoltanno gede hajajino; Yoftahenna beettosi Maganoho eino qaale wonshino; hattono Yesuusi qarru yannara nafa ammanamino. (Kalaqama 43:12; Ejjeetto 11:30-40; Yohaannisi 18:3-11) Kuri lawishshuwa, ooso ammanama mageeshshi geeshsha hasiissannoro huwattanno gede kaaꞌlitannonsa.

9. Annuwunna amuuwu ammanantinore ikkansa oosonsara kaaꞌlitannohu hiittoonniiti?

⁹ Aane noohu Qullaawu Maxaafihu xintu seeri annuwanna amuuwa kaaꞌlannonsa: “Woloota rosiisattohu atenee rosiisa mayira hoogittoyya? ‘Moortinoonte!’ yite kultanni, ati mayira moorattoyya?” (Roomu Sokka 2:21) Annuwunna amuuwu kawaanni wolere yaanni kaꞌaanni wolere assanno woyite qaaqquullu bade afa dandaanno. Oosonke ammanantinore ikkitanno gede rosiinsanni ninke kayinni ammanama hoongummoro, oosonkera coyi gurchaawannonsa. Wole agurina qaaqquullu anninsanna amansa shiimmaaddu coyira kaphanna laꞌuro, insano hatto assansa digattanno. (Luqaasi 16:10 nabbawi.) Ooso anninsanna amansa ammanaminore ikkinota huwatturo kayinni, albillitte insa uminsa ooso iltanno woyite ammanamino  annanna ama ikkitara dandiitanno.—Lawishsha 22:6; Efesooni Sokka 6:4.

10. Ammanate roduuwinke ledo hasaambeemmo woyite ammanammoommore ikka dandiineemmohu hiittoonniiti?

¹⁰ Ammanate roduuwinkerano ammanammoommore ikka hasiissannonke. Mullu hasaawi hemetenna suꞌma hunate widira soorramara dandaanno. Mittu coyi adda ikkinota buunxummokki coyiꞌneemmoha ikkiro, kapho tareessinanni heeꞌnoommoha ikkara dandaanno. Konni daafira ‘arrawonke eemadha’ woyyitanno. (Lawishsha 10:19) Noore coyiꞌneemmo yaa hendoommore, anfoommorenna macciishshinoommore baala coyiꞌneemmo yaa diꞌꞌikkitino. Coyiꞌrate hendoommori adda ikkiro nafa, hakku coyi ninke eessannonkekkire ikkara woy hakkonne coye woleho kula dancha woy hasiissannota ikka hooggara dandiitanno. (1 Teselonqe 4:11) Mitu manni afiinsa abbita coyiꞌranni, “Coyiꞌroommori nooreentilla” yaanno. Ikkollana ninke Yihowa soqqamaasine ikkinoommo daafira, woꞌmanka woyite shaqqillunna danchumma noo coye coyiꞌra hasiꞌneemmo.—Qolasiyaasi Sokka 4:6 nabbawi.

11, 12. (a) Mittu manchi cubbo loose noore maaxasi roore qarra kalaqqannohu hiittoonniiti? (b) Ninkeneeto mayine xaꞌminammora dandiineemmo? (c) Yihowa dirijjitera ammanama dandiineemmohu hiittoonniiti?

¹¹ Yihowa cimeeyye shoominohu songo kaaꞌlitanno gedeeti. Cimeeyyete noore kulleemmoha ikkiro, insara ninke kaaꞌla shota ikkitannonsa. Hatto yineemmohu mayiraati? Dhiwante akimete minira haꞌrittoro, dhiwinohe gara gama kulte gama maaxattoni? Hatto assittoro, akimootu hiitto assite kaaꞌlitannohe? Hatteente gede,  shota ikkitinokki soꞌro loonsummoro, maaxa dihasiissannonke. Hatteentenni cimeeyyenniwa marre noore maanxummokkinni kula hasiissannonke. (Faarso 12:2; Soqqamaasinete Looso 5:1-11) Hanni tenne wole coye hedi: Jaalikki shota ikkitinokki soꞌro loosinota afittoro maa assatto? (Leewaawoota 5:1) “Jaalaꞌya ikkino daafira, mittohono dikuleemmo” yaattonso? Cimeeyye jaalikki Yihowa ledo noosi jaalooma wirro kaajjishiꞌranno gede kaaꞌlitannosita qaagatto?—Ibiraawoota 13:17; Yaiqoobi 5:14, 15.

¹² Yihowa dirijjitera rippoorte borreessineemmo woyiteno ammanammoommore ikka hasiissannonke; lawishshaho soqqanshote rippoorte qolleemmo woyite nookkire diborreessineemmo. Qoleno, suwisaano ikkatenna wole soqqanshote qoosso afiꞌrate forme wonshineemmo woyite ammanammoommore ikka hasiissannonke.—Lawishsha 6:16-19 nabbawi.

13. Roduuwinke ledo loosunni xaandeemmoha ikkiro ammanammoommore ikka dandiineemmohu hiittoonniiti?

¹³ Kiristaanu, magansiꞌransa loosu hajo ledo dikarsiisanno. Lawishshaho, Gambooshshu Addaraashera woy soqqammanni heeꞌne uminke looso diloosiꞌneemmo. Qoleno ammanate roduuwinke woxe dihanaanqeemmo. Ammanate roduuwakki woxunni loosiisiꞌrattoha ikkiro, woxensa yannante baata, sumuu yootto woxe gudisse aanna higge hajajjinore baalankare afidhanno gede assa hasiissannohe. Tenne giddo mite, dhiwanturo xagisidhanno woxenna fooliishshote yanna aa ikkitara dandiitanno. (1 Ximootewoosi 5:18; Yaiqoobi 5:1-4) Yihowa Farciꞌraasinchiwa qaxarante loosattoha ikkiro kayinni, woleho assannokkire assahera agadha dihasiissannohe. (Efesooni Sokka 6:5-8) Coyiꞌramootto saatenna baatooshshi garinni loosi.—2 Teselonqe 3:10.

14. Kiristaanu guto daddaꞌlara woy loosiꞌrara albaanni maa assa hasiissannonsa?

 ¹⁴ Ammanate rodiinke ledo guto daddaꞌlineemmoha ikkirona? Tenne yannara loosoho woxe fushshinammora, liqiissinammora woy liqiiꞌnammora dandiineemmo. Hattoo yannara aane noohu Qullaawu Maxaafihu xintu seeri lowo geeshsha kaaꞌlannoꞌne: Baalanka coye borreessitine wodhe! Masaalaanchu Ermiyaasi baatto hidhi woyite lame sheemaatu borro qixxeesse mittete aana naqaashootu furma gantanno gede assino; hakkiinni albillitte taje ikkitanno gede lamenta borro maaxino. (Ermiyaasi 32:9-12; qoleno Kalaqama 23:16-20 lai.) Mitootaho sheemaate borreesse wodha roduuwansa ammana hooga labbannonsa. Ikkollana hatto assa coyi kawa kaꞌaa higannokki gedenna koffi assannori kalaqamannokki gede assitanno. Songote keeri aye daddalinnino roorannota qaaga hasiissannonke.—1 Qorontoosi 6:1-8; Jeefote Hedo 30 lai.

15. Yihowa daddaꞌlinanni woyite hanaanqannita ma garinni laꞌꞌanno?

¹⁵ Baalunku mannira yaano Yihowa Farciꞌraasine ikkinokki mannirano ammanammoommore ikka hasiissannonke. Yihowa ammanammoommore ikkinammora hasiꞌranno. Yihowa “hanaaqu keenaasincho giwanno; taalo keenaasincho kayinni baxanno.” (Lawishsha 11:1; 20:10, 23) Hunda mannu hiꞌrannonna hidhanno woyite keenaasincho horoonsiꞌranno. Mite daddalaano kayinni hidhanno mannira kiilo ittanno, hattono waaga ikkinokki geeshsha assite hirtanno. Hakkawarinte gede yannankerano hanaaqqanno daddalaasine batidhino. Yihowa hundi warinte gede, yannankerano hanaaqo giwanno.

16, 17. Qoropha hasiissannonketi ammanama xeꞌino coyibba hiikkuriiti?

 ¹⁶ Ninke baalunkura ammanama xeꞌinore assineemmo gede fonqolu iillannonke; lawishshaho looso amadate forme wonshineemmo woyite, mangiste xaꞌmitannonke coye wonshineemmo woyitenna rosu mine fonqolo loonseemmo woyite ammanama shota ikka hooggankera dandiitanno. Batinyu manni kapha, nookkire ashaashure kula woy doga qarra diafidhino yee hedanno. Tini dhagge diꞌꞌikkitannonke. Korkaatuno Qullaawu Maxaafi goofimarchu yannara “mannu umosi baxannoha, woxe baxannohanna . . . danchumma giwannoha” ikkannota masaalino.—2 Ximootewoosi 3:1-5.

¹⁷ Mito woyite hanaaqanno mannira qiniinonsaha lawankera dandaanno. (Faarso 73:1-8) Mittu Kiristaanchi ammanaminoha ikkino daafira loosu bayichinni fushshine hunnasira, woxesi adhinaranna miincasira dandiinanni. Ikkollana ammanama gaabbissannota diꞌꞌikkitino. Mayira?

18. Danchu suꞌmi lowo waaga afiꞌrino yineemmohu mayiraati?

¹⁸ Ammanaminohonna addaxxinanni manchooti yinanni suꞌma afiꞌra loworeeti; qoleno alamete aana togoo manni shiimaho. Ninke baalunku togoo suꞌmi heeꞌrannonke gede assiꞌra dandiineemmo. (Mikiyaasi 7:2) Mitu manni ammanamoottoha ikkootto daafira mishahera woy gowwu gede asse kiirahera dandaanno. Ikkollana, ammanamoottoha ikkakkinni wolootu galattaheranna ammantahera dandiitanno. Alamete doyichora Yihowa Farciꞌraasine ammanantinore ikkansanni egennantinoreeti. Mite loosiisaano Yihowa Farciꞌraasine ammanantinore ikkitinota affino daafira, insa loosiisiꞌra hasidhanno. Mite loosaasine ammanama hooggino daafira loosunni  fushshine hunnanni woyite, Yihowa Farciꞌraasine kayinni fushshine dihunnanni.

19. Ammanammoommore ikkanke Yihowa ledo noonke jaaloomi ma ikkanno gede assitanno?

¹⁹ Woꞌmanka woyite ammanamoottoha ikkakki, keeraancho tiianna surrete salaame afiꞌratto gede assitannohe. Phaawuloosi, “Woꞌmanka woyite coꞌo yitine ammanamme” yee amaalinonke amaale harunsa hasiꞌneemmo. (Tiito 2:10) Roorenka kayinni, baxillaanchu Anninke Yihowa woꞌmanka woyite ammanammoommore ikkate sharrammeemmo sharro lae maassiꞌrannonke.—Faarso 15:1, 2 nna Lawishsha 22:1 nabbawi.