1. Magansiꞌranke Yihowa hagiirsiissannoronna teꞌee afate maa assa hasiissannonke? Mayira?

 YESUUSI togo yiino: “Magano Anna ayyaanunninna halaalunni magansidhannorira yanna dagganni no; . . . Maganu Annu hasiꞌrannorino hattoonni magansidhannoreeti.” (Yohaannisi 4:23; 6:44) Mittu mittunku “Mooticha hagiirsiisanno coyi maatiro” buuxa hasiissannonke. (Efesooni Sokka 5:10) Hatto assa kayinni duucha woyite shota diꞌꞌikkitanno. Sheexaanu Yihowa dadillisannore assineemmo gede ninke soꞌrisiisate sharramanno.—Yohaannisi Ajuuja 12:9.

2. Siina Ilaali mule mayi ikkinoro xawisi.

² Sheexaanu soꞌrisiisankera woꞌnaalannohu hiittoonniiti? Isi horoonsiꞌranno hayyo giddo mitte, gara ikkinorenna gara ikkinokkire bade afa qarra ikkitannonke gede assate. Hanni Israeelete daga Siina Ilaali mule dukkaꞌnite heedheenna ikkinore hedi. Muse ilaala haꞌrita, Israeele iso higara agartino. Gedensoonni kayinni insa agarte hoogguti Aarooni, magano seekkinke yitino. Aarooni siito lawannoha kaphu magano culkunni seekkino. Hakkiinni mannu ayyaana ayirrisino. Insa siitu misile qooxeessira doyitanni sirbitino; hattono tenne misilera kumbuultino. Insa siitu misilera kumbuultu woyite, Yihowa magansidhanni nooha lawinonsa. Ikkollana insa konne ayyaana Yihowa “ayyaanaati” yitino daafira calla assitinori garaho  yaa diꞌꞌikkino. Yihowa tenne ikkito kaphu magano magansiꞌrate gede asse kiirino; qoleno konninni kainohunni insa giddo batinyu manni reyino. (Fulo 32:1-6, 10, 28) Tenne xaggenni ninke maa ronseemmo? Dogamattokki gede qorophi. ‘Batte ikkinore kisidhooti’; qoleno gara ikkinorinna gara ikkinokkiri maatiro Yihowa rosiisannohe gede maahoyye yii.—Isayaasi 52:11; Hiziqeeli 44:23; Galatiyu Sokka 5:9.

3, 4. Batinyu manni ayirrisanno ayyaanna hanaffino gara xiinxalla dancha ikkitinohu mayiraati?

³ Yesuusi uullate aana noo yannara, soqqamaasinesi xalala magansiꞌra magansidhe dancha lawishsha ikkitanno gede qajeelsinonsa. Insa Yesuusi reyihu gedensaanni haaro rosaanosira Yihowa seera rosiisa diagurtino. Ikkollana soqqamaasine reyitu gedensaanni, kaphu rosiisaano kaphu roso, Magano magansiꞌrannokki manni budenna ayyaanna Kiristaanu songo giddora eessitino. Isinni insa kuri ayyaanna Kiristaanu ayirrisannota labbanno gede assate, mite ayyaanna suꞌma soorritino. (2 Teselonqe 2:7, 10; 2 Yohaannisi 6, 7) Yannankera, hatte ayyaanna giddo batinye lowo manni ayirrisanno; xaano ikkiro tini ayyaanna kaphu roso halashshitannotenna agaanintete loosi ledo xaadooshshe afidhinote. a—Yohaannisi Ajuuja 18:2-4, 23.

⁴ Xaa yannara alamete aana batinyu manni ayyaanna ayirrisa baxanno. Ikkollana tenne hajo lainohunni Yihowara noosi lao rossanni haꞌrittoro, mite ayyaannara noohe lao biddi assiꞌra hasiissannoheta huwatattora dandaatto. Hatto assa shota ikka hooggurono, Yihowa kaaꞌlannoheta huluullantooti. Hanni Yihowara  ayyaannate daafira noosi lao afate, batinyu manni ayirrisanno ayyaanna hanaffino gara laꞌno.

5. Yesuusi ilaminohu Sadaasa 25nni ikkinokkita leellishshanno taje hiitteeti?

⁵ Batinye gobbara Ganna ayirrinsannihu Sadaasa 25nniiti (Itiyophiyu kiiro garinni Sadaasa 29nniiti); rooru mannira kuni barri Yesuusi ilaminoha lawannonsa. Qullaawu Maxaafi Yesuusi ilamino barra agurina isi ilamino agana nafa dikulanno; ikkollana Yesuusi ilamino wogga daafira kulannonke. Luqaasi, Yesuusi Beetelihemete ilami yannara allaalaasine “hashsha xawoho saadansa” agadhite galtinota borreessino. (Luqaasi 2:8-11) Sadaasu aganira Beetelihemete qiidu, xeenunna kaade batidhanno; konni daafira allaalaasine saada agadhite gobba gala didandiitanno. Tennenni maa ronseemmo? Yesuusi ilaminohu Sadaasu aganira ikkikkinni birrichishe heeꞌreennaati. Qullaawu Maxaafino ikko xaggete taje leellishshanno garinni, Yesuusi ilaminohu Wocawaarunna Birru agani taaeraati.

6, 7. (a) Gannu yannara assinannihu batinyu coyi hanafinohu ma garinniiti? (b) Wolootaho uyineemmo gede assannonkeri maati?

⁶ Ikkina Ganna ayirrisa hananfoonnihu hiittoonniitiyya? Kuni ayyaani dayinohu Magano magansidhannokki daga ayirrissanno ayyaannawiinniiti. Kuri giddo mittu Saaterneeliya yinanni ayyaanaati; Saaterneeliyu Roomu gosa Saaterni yinannihu irshu maganira ayirrissannoho. Mittu maxaafi togo yaanno: “Gannu ayyaanira assinannihu batinyu coyira xinta ikkinohu, Roomu gosa Sadaasu agani taalootira ayirrissannoho Saaterneeliya yinanni ayyaanaati. Lawishshaho, lowo jila jila, mimmitoho afansha aanna shaama qasa hakko ayyaaninni dayino  rosichooti.” (Ze Insayikiloopiidiya Amerikaana) Mitira yinanniha Faarsi gosaha arrishshote magani ayyaana ayirrinsannihuno Sadaasa 25nniiti.

⁷ Ikkollana Ganna ayirrisanno manni giddo rooru, kuni ayyaani dayinohu Magano magansidhannokki dagawiinni ikkinota dihedanno. Hatteentenni insa maatensa ledo hosate, dancha sagale itatenna mimmitoho mitore aate Ganna quqquxame agadhanno. Maatenkenna jaallanke baxa hasiissannonketi egennantinote; qoleno Yihowa soqqamaanosi mimmitoho mitore uyitara  hasiꞌranno. Layinki Qorontoosi 9:7 yitannonte gede, “Maganu hagiidhe aannoha baxanno.” Kayinni Yihowa wolootaho mitore uyinammora hasiꞌrannohu baxxitino yannara calla diꞌꞌikkino. Yihowa soqqamaasine anga qollanninke yite agadhitukki, diru giddo hasidhu yannara jaallansaranna maatensara afansha uyitanno; hattono mitteenni yanna sayissanno. Insa uyitannohu woloota baxxanno daafiraati.—Luqaasi 14:12-14.

8. Ayyaanto Yesuusira afansha massitu woyite isi muꞌre qaaqqooti? Xawisi.

⁸ Yesuusi ilami gedensaanni saadate hayisso worranniwa heeꞌreenna sase hayyoolle isira afansha haadhe martino daafira, Gannu yannara mannaho afansha aa garaho yee hedannohu batinyu manni no. Yesuusi ilami yannara iso laꞌꞌate afansha haaꞌre marino manni no yinanniti garankolla. Hundi waro ayirradu manchira afansha haaꞌre massa rosamino coyeeti. (1 Mootoolla 10:1, 2, 10, 13) Ikkollana Qullaawu Maxaafi Yesuusiwa mari manna ayyaantote yaannota afootto? Ayyaanto digintete coye assitannoreetinna Yihowa magansidhannokkireeti. Qoleno insa Yesuusa laꞌara martu woyite, isi saadate hayisso worranniwa nooha muꞌre qaaqqo diꞌꞌikkino. Insa martanno woyite Yesuusi mine no. Ayyaanto soojjaatinni kaꞌe Yesuusi noowa iillitinohu boode aganna gedensaanni ikkikki digatino.—Maatewoosi 2:1, 2, 11.

9. Qullaawu Maxaafi ilantino barra ayirrissinori ayeoo ikkitinota kulanno?

⁹ Qaaqquullu ilamanno barri hagiirsiisanno barraati. (Faarso 127:3) Hatto yaa kayinni ilamate barra ayirrisa hasiissannonke yaa diꞌꞌikkino. Hanni tenne hedi: Qullaawu Maxaafi giddo ilantino barra ayirrissinota kulloonniri  lame manna callaho. Mittu Gibitsete gashshaancho Feriooniiti; wolu kayinni Moote Heeroodiisi Antiphaasiiti. (Kalaqama 40:20-22 nna Maarqoosi 6:21-29 nabbawi.) Kuri lamenti gashshaano Yihowa soqqamaasine diꞌꞌikkitino. Qullaawu Maxaafi, Yihowa magansiꞌranno manni giddo ilamino barra ayirrisinohu noota mitto bayichono dikulanno.

10. Hundi Kiristaani ilammoonni barra ayirrisa ma garinni laꞌꞌanno?

¹⁰ Mittu maxaafi, hundi Kiristaani “ilammoonni barra ayirrisa Magano magansidhannokki daga bude ikkinota huwatino” yiino. (Ze Worlidi Buuki Insayikiloopiidiya) Kuni budi xintaminohu kaphu ammana aanaati. Lawishshaho hundi Girikooti, mitto mittonka mancho agaranno ayyaani nootanna hakku ayyaani mittu manchi ilamanno woyite daye agarannosi yite ammantanno. Insa ilamate barra ayirrissannohu, hatto assituro magannansa hakkonne mancho agartanno yite heddanno daafiraati. Ilamate barra ayirrisa, togoote dagate ammana ledo calla ikkikkinni, beeddahe laꞌꞌate ledono xaadooshshe afidhino.

11. Wolootaho shaqqadda ikkate daafira Yihowara mayi lao noosi?

¹¹ Batinyu manni ilamino barra baxxino ayirrinyenna baxille leellinshansara hasiꞌranno. Ikkollana maatenkeranna jaallankera mitto barra calla ikkikkinni diro woꞌma baxille leellisha dandiineemmo. Yihowa woꞌmanka woyite shaqqaddanna wolootaho uyineemmore ikkinammora hasiꞌranno. (Soqqamaasinete Looso 20:35 nabbawi.) Yihowa muxxe ikkitino heeshsho uyinonke daafira, ilammoommo barra calla ikkikkinni barru baala galanteemmosi.—Faarso 8:3, 4; 36:9.

12. Ilamate barrinni reyote barri woyyannohu hiittoonniiti?

¹² Rosiisaancho 7:1 togo yitanno: “Dancha shittonni danchu suꞌmi rooranno; ilamate barrinni reyote barri  woyyanno.” Ilamate barrinni reyote barri woyyannohu ma garinniiti? Ilammummo yannara, heeshshonke giddo assinoommohu danchuno ikko bushu coyi dino. Heeshshonke Yihowara soqqamate horoonsiꞌnummoronna wolootaho danchare assinummoro kayinni, “danchu suꞌmi” heeꞌrannonke; qoleno Yihowa reyinummoro nafa qaagannonke. (Iyyoobi 14:14, 15) Yihowa soqqamaasine uminsaha ilamate barrano ikko Yesuusi ilamino barra diayirrissanno. Yesuusi ayirrinseemmo gede hajajinonke  ayyaani reyosi Qaagooshshe callaho.—Luqaasi 22:17-20; Ibiraawoota 1:3, 4.

13, 14. Kiristaanu Faasika ayirrisa hasiissannonsakkihu mayiraati?

¹³ Batinyu manni Faasika ayirrisanno woyite Yesuusi kao ayirrisanni nooha lawannonsa. Kayinni Yesuusi kaosi ayirrinseemmo gede hajajinonkeni? Dihajajinonke. Xaggete maxaaffa, hundi Kiristaani Faasika ayirrisinokkita kultanno; qoleno kuni ayyaani dayinohu Magano magansidhannokki daga budinniiti. Mittu maxaafi togo yiino: “Haaru Gondoori giddo Faasika ayirrinsoonnita leellishannori dino. . . . Umi xibbi diri Kiristaani mite barruwa qullaawa asse ayirrisate heda nafa dihedino.” (Ze Insayikilopiidiya Biritaanika) Konni daafira, Faasiku Yesuusi kao ledo xaadooshshe diafiꞌrino.

¹⁴ Yihowa mannu kaphu ammaꞌno bude Beettisi kao ledo xaadisanna laꞌꞌanno woyite hagiidhannoni? Hagiidhannokkiti egennantinote. (2 Qorontoosi 6:17, 18) Yihowa Yesuusi kao ayirrisse yee horo dihajajinonke.

15. Haaru Diri Ayyaana ayirrisa hananfoonnihu hiittoonniiti?

¹⁵ Baalanti gobba Haaru Diri Ayyaana ayirrissannoti umise doogo noose. Konne ayyaana Sadaasa 31nni (Itiyophiyaho duuchu qooxeessira Wocawaaro 1nni) lowo jila jille ayirrinsanni. Duucha woyite konni ayyaani yannara mannu amanyoote bainore assanno, hattono age dimbanno. Qoleno, konne ayyaana xintitinori Magano magansidhannokki dagaati. Mittu maxaafi togo yaanno: “Roomu daga kuni barri Janusi yinanni maganiha ikkanno gede assitino; Janusi xulluwate, saanquwatenna hanafote maganooti. Arfaasu aganira [Ingilizete Afiinni] Janiwarii yine suꞌma fushshinoonnihu Janusi yinanni magani  suꞌminni haaꞌneeti; kuni magani badheranna albira qole laꞌꞌannoha lame alba afiꞌrino.”—Ze Worlidi Buuki Insayikilopiidiya.

16, 17. Sarge sargisiꞌrate hendeemmo woyite maa heda hasiissannonke?

¹⁶ Sarge hagiirsiissanno qixxaawooti. Alamete doyichora sarge babbaxxino garinni sarginsanni. Batinyu manni sargete yannara assinanniri mama hanafinoro dihedanno; konnira mitu sargete budi Magano magansidhannokki daga rosicho ikkinota huwata hoogara dandaanno. Sargisiꞌre adhamate hedanno Kiristaani kayinni, sargensa Yihowa hagiirsiissannota ikkitanno gede assiꞌranno. Insa sargete yannara assinannihu mitu coyi mamiinni dayinohoro wodanchiro, dancha doorsha doodha dandaanno.—Maarqoosi 10:6-9.

¹⁷ Batinyu manni, sargete yannara assinannihu mitu coyi mushurrootaho ‘dancha kaayyo’ abbanno yee ammananno. (Isayaasi 65:11) Lawishshaho mitu qooxeessira mannu mushurrootaho aanaho ruuzenna wole togoo coye fincanno. Insa kuni assooti minaanninna minaama ila afiꞌranno gede, hagiirraamma ikkanno gede, lowo diro heeꞌranno gedenna bushu coyi iillannonsakki gede assanno yee ammananno. Kiristaanu kayinni kaphu ammaꞌno ledo xaadooshshe afiꞌrino coyi baalunkuwiinni xeertiꞌranno.—2 Qorontoosi 6:14-18 nabbawi.

18. Qullaawu Maxaafi sarge lainohunni wole hiikkonne xintu seera kulanno?

¹⁸ Kiristaana ikkino minaanninna minaama sargensa hagiirru nootanna ayirrado ikkitara, hattono sarge dayino manni baalu hagiidhara hasiꞌranno. Kiristaanu sarge haꞌranno wosini bushare, teeda bainore woy mushurrootu ayirrinye hunannore coyiꞌra dihasiissannonsa.  (Lawishsha 26:18, 19; Luqaasi 6:31; 10:27) Kiristaanu sargensa yannara jironsa leellishiꞌrate diwoꞌnaalanno. (1 Yohaannisi 2:16) Sargisiꞌrate heddinanni heedhinoonniha ikkiro, ganaanni gaabbisannoꞌne coyi kalaqamannokki gede qorophe.—Jeefote Hedo 28 lai.

19, 20. Birciqqo birciqqote ledo kisiisate budi hanafinohu ma garinniiti?

¹⁹ Batinyu manni sargenniwanna wole hattoo bayicho kuꞌu koꞌii ledo birciqqonsa kisiisanni aganno. Tenne yannara, mittu manchi birciqqo kayise dancha halchosi coyiꞌranno, wolootuno hakkawote birciqqonsa ale qolte kayissanno. Kiristaanu konne assoote ma garinni laꞌꞌa hasiissannonsa?

²⁰ Mittu maxaafi, anganni woyite birciqqo birciqqote ledo kisiisa dagginohu “magannate qullaawa agatto kakkalo assine shiqinshannihu” hundi budiwiinni ikkara dandaannota xawisino; biꞌree waro togoo bude harunsitannori Magano magansidhannokki dagaati. Tenne assinannihu “dancha coye halchineeti; qoleno hakka woyite ‘Seeda diro heeꞌri’ woy ‘Fayyimma oohe’ yine harancho huuccatto assinanni.” (Ze Internaashinaali Handibuuki Oni Alkoholi Endi Kaalcheri) Hundi yannara, mannu birciqqonsa iimira qole kayise magannansa atoote uyitannonsa gede huucciꞌranno. Ikkollana Yihowa atoote aannohu konni garinni huucciꞌneenna diꞌꞌikkino.—Yohaannisi 14:6; 16:23.

21. Kiristaanu wolu hiittoo ayyaaniwiinni xeertiꞌra hasiissannonsa?

²¹ Mitto ayyaana ayirrisa hasiissannoheronna teꞌee doodhattora albaanni, hakko ayyaani hiittoo amanyoote  halashshannoro hedi. Lawishshaho mite ayyaanna yannara mannu amanyoote baino sirba sirbanno, quwa sayise aganno, hattono maaeela coye assanno. Qoleno togoo ayyaanna, labbaahu labbaahu ledonna meyati meyate ledo adhamanno gede jawaachishshannotanna meessi gobba bande banxanni gede assitannota ikkitara dandiitanno. Togoo ayyaannara anga wodhineemmoha ikkiro, Yihowa giwannore gimboommo yaa dandiineemmo?—Faarso 1:1, 2; 119:37; Roomu Sokka 12:9.

22. Mittu Kiristaanchi ayyaanaho karsamannoronna teꞌee doodhate mayi kaaꞌlannosi?

²² Kiristaanu Maganoho ayirrinye abbitannokki ayyaanna baalantewiinni xeertiꞌra hasiissannonsa. Soqqamaasinchu Phaawuloosi togo yee borreessino: “Ittinanniha woy agginanniha ikkiro woy aye coyeno assitinanniha ikkiro baalankare Maganu ayirrinyira asse.” (1 Qorontoosi 10:31; Jeefote Hedo 29 lai.) Ayyaanna baalanti foorrete, kaphu magansiꞌra woy meessi gobba calla baxate ledo xaadooshshe afidhino yaa diꞌꞌikkino. Mittu ayyaani Qullaawu Maxaafiha xintu seera diingeemmo gede assannoha ikka hoogi geeshsha, hakko ayyaana ayirrinseemmoronna teꞌee uminke doodha dandiineemmo. Qoleno doodhineemmo doorshi woloota gawajjannoronna teꞌee heda hasiissannonke.

23, 24. Yihowa Farciꞌraasine ikkitinokkite maatenke miillara ayyaannate daafira noonke lao kula dandiineemmohu hiittoonniiti?

²³ Yihowa ayirrannokki gede assitanno ayyaanna ayirrisa aguroottoha ikkara dandaanno. Ikkollana hatto assa agurootto daafira, Yihowa Farciꞌraasine ikkitinokkite mite maatekki miillara giwattonsahanna ledonsa hosa hasiꞌrattokkiha  lawansara dandaanno. Insa, maate mitteenni gamba yitannohu ayyaana ayirrinsanni woyite callaati yite heddannoha ikkara dandaanno. Ikkina tennera maa assa dandaatto? Baxattonsatanna ayirrisattonsata leellisha dandaattoti batinye doogga no. (Lawishsha 11:25; Rosiisaancho 3:12, 13) Insa wole woyite ledokki yanna sayissanno gede koyisa dandaatto.

²⁴ Fiixikki mite ayyaanna ayirrisattokkihu mayiraatiro afa hasiꞌriro, insara tenne daafira kulate kaaꞌlitannohe hedo borronke giddonninna jw.org aaninni afiꞌra dandaatto. Insa ledo heewisantanni woy ate hedo ammantanno gede xixxiibbanni noottoha lawanno gede assite coyidhooti. Maatekki tenne doodhoottohu batinye taje xiinxallite kaꞌe ikkinota huwattanno gede assi. Wodanaaꞌmite coyiꞌri, hattono coyiꞌrattori “woꞌmanka woyite coomminohanna gumu nooha ikko.”—Qolasiyaasi Sokka 4:6.

25, 26. Annuwunna amuuwu oosonsa Yihowa biddishsha baxxanno gede kaaꞌla dandiitannohu hiittoonniiti?

²⁵ Ninke baalunku mite ayyaanna ayirrinseemmokkihu mayiraatiro buuxiꞌra hasiissannonke. (Ibiraawoota 5:14) Yihowa hagiirsiisa hasiꞌneemmo. Ooso nooꞌneha ikkiro, oosoꞌne Qullaawu Maxaafiha xintu seera huwattannonna baxxanno gede kaaꞌlate yanna gaaꞌme. Oosoꞌne Yihowa daafira seekkite affuro, insano iso hagiirsiisa hasidhanno.—Isayaasi 48:17, 18; 1 Pheexiroosi 3:15.

²⁶ Yihowa iso ammanammenna battaawinokki garinni magansiꞌrate sharrammanna laꞌꞌanno woyite hagiidhanno. (Yohaannisi 4:23) Ikkollana batinyu manni, ammanaminokki manni woꞌminote tenne alame aana ammanamme heeꞌra didandiinanni yee hedanno. Hatto yee heda garaho? Aantanno fooliishshora tenne hajore ronseemmo.