Maganu higge xintantinohu xintu seeri aanaati. Kuni xintu seeri Qullaawu Maxaafi giddo nooho xinta ikkino halaaleeti. Xintu seeri Maganu hedo afatenna isi mitto coye ma garinni laꞌꞌannoro huwatate kaaꞌlannonke. Kuni seeri heeshshonke giddo gara ikkino coye assate kaaꞌlannonke. Roorenkanni Maganu seeri giddo assi woy assitooti yine bande kulloonnikki coyi tuncu yaannonke woyite xintu seeri kaaꞌlannonke.

▸ Fooliishsho 1, gufo 8

Yihowara hajajamate yaa, isi asse yaannonkere banxe assate yaate. Yihowa isira noonke baxillinni hajajammammora hasiꞌranno. (1 Yohaannisi 5:3) Magano banxeemmohanna iso addaxxineemmoha ikkiro, woꞌmante yannara isi amaale harunsineemmo. Isira hajajama shota ikkitannonkekki woyite nafa hajajammeemmosi. Yihowa hagiirru noo heeshsho heeꞌneemmo gara rosiisannonkenna albillitte lowo atoote aankera qaale eino daafira, isira hajajamanke kaaꞌlitannonke.—Isayaasi 48:17.

▸ Fooliishsho 1, gufo 10

Yihowa mittu mittunkura doodhate qoosso woy dandoo uyinonke. Isi maashinete gede asse dikalaqinonke. (Marro 30:19; Iyyaasu 24:15) Doodhate qoossonke horoonsiꞌne danchare doodha dandiineemmo. Ikkollana qoropha hoongummoro, gara ikkinokkire doodhinammora dandiineemmo. Doodhate qoosso noonke daafira, Yihowara hajajama woy hajajama hooga dhoodhanna iso banxeemmotanna teꞌee leellisha dandiineemmo.

▸ Fooliishsho 1, gufo 12

Yihowa akatanke, amanyootenkenna assootenke lainohunni seera woy biddishsha fushshino. Qullaawu Maxaafi, konni seerirenna kuni seeri hagiirru noo heeshsho heeꞌrate kaaꞌlannonke gara kulannonke. (Lawishsha 6:16-19; 1 Qorontoosi 6:9-11) Amanyootu seeri Yihowa baxannonna  giwanno coye bade afate kaaꞌlannonke. Qoleno baxillaano ikka dandiineemmo gara, danchare doodha dandiineemmo garanna shaqqadda ikka dandiineemmo gara afate kaaꞌlannonke. Alamete amanyooti anganni fulanni nooha ikkirono, Yihowahu amanyootu seeri disoorramanno. (Marro 32:4-6; Milkiyaasi 3:6) Konne seera harunsa mannimmatenna ayyaanaamittete agarooshshe afiꞌneemmo gede kaaꞌlitannonke.

▸ Fooliishsho 1, gufo 17

Tiiu danchanna busha badate kaaꞌlitannonkete giddonke noo dandooti. Yihowa ninke mittu mittunkura tiia uyinonke. (Roomu Sokka 2:14, 15) Tiiꞌꞌinke garunni loosanno gede, Yihowa biddishshinni qajeelsiꞌra hasiissannonke. Tiiꞌꞌinke qajeelsiꞌnummoro Yihowa hagiirsiisannore doodhineemmo gede kaaꞌlannonke. (1 Pheexiroosi 3:16) Tiiꞌꞌinke gara ikkinokkire assinammora kaꞌneemmo woyite qorowisiisankera dandaanno; qoleno gara ikkinokkire assinummo gedensaanni lowo geeshsha gaabbisannonke. Tiiꞌꞌinke garunni loosa agurara dandaanno; ikkollana Yihowa kaaꞌlonni wirro loosanno gede assiꞌra dandiineemmo. Danchu tiiꞌꞌi surrete keere aannonke; hattono uminkera ayirrinyu heeꞌrannonke gede kaaꞌlannonke.

▸ Fooliishsho 2, gufo 3

Magano waajjate yaa, iso lowo geeshsha banxeemmonna ayirrinseemmo daafira, dadillisannosi coye assa dihasiꞌneemmo yaate. Magano waajja gara ikkinore assatenna bushu coyiwiinni xeertiꞌrate kaaꞌlitannonke. (Faarso 111:10) Qoleno Yihowa yaannore baala macciishshineemmo gede assitannonke. Yihowa lowo geeshsha ayirrinseemmo daafira, Isira eꞌnoommo qaale agadhineemmo gedeno kaaꞌlitannonke. Magano waajja hedonke, wolootu ledo noonke aantenna doodhineemmo doorshi seyanno gede assitanno.

▸ Fooliishsho 2, gufo 9

Aagintaawate yaa loonsoommo soꞌrora godowinta gaabbate. Yihowa baxxannori isi biddishshi ledo sumuu yaannokkire assitinota huwatturo lowo  geeshsha gaabbitanno. Gara ikkinokkire assinummoro, Yihowa Yesuusite wodote kakkalo widoonni gatona yaannonke gede huucciꞌra hasiissannonke. (Maatewoosi 26:28; 1 Yohaannisi 2:1, 2) Godowinta aagintaambe maaro eꞌnummoronna busha coye assa agurrummoro, Yihowa gatona yaannonke. Hakkunni gedensaanni, alba assinoommorira gaabbinanni yaada dihasiissannonke. (Faarso 103:10-14; 1 Yohaannisi 1:9; 3:19-22) Loonsoommo soꞌronni rosate sharrama, hedonke biddi assiꞌranna Yihowa biddishshi garinni heeꞌra hasiissannonke.

▸ Fooliishsho 2, gufo 18

Mittu manchi shota ikkinokki cubbo loose kae maaro eanna Yihowa biddishsha harunsa giwiro, Kiristaanu songo miila ikke heeꞌra didandaanno. Togoo manchi songotenni bohama hasiissannosi. Mittu manchi songotenni bohamiro isiwa diaanneemmo; hattono iso dicoyishiinsheemmo. (1 Qorontoosi 5:11; 2 Yohaannisi 9-11) Boha, Yihowa suꞌmi xonamannokki gedenna songo agarooshshe afidhanno gede assitanno. (1 Qorontoosi 5:6) Qoleno boha cubbo loosino manchi Yihowawa higate maaro eanno gede kaaꞌlitannosi.—Luqaasi 15:17.

▸ Fooliishsho 3, gufo 19

Yihowa baxannonke; qoleno kaaꞌlankera hasiꞌranno. Konni daafira, isi Qullaawu Maxaafinna iso baxanno manni widoonni biddishshanna amaale aannonke. Guuntete xeꞌne noonkere ikkinoommo daafira, Isi kaaꞌlo lowo geeshsha hasiissannonke. (Ermiyaasi 17:9) Yihowa ninkera biddishsha aate horoonsiꞌranno manna ayirrinyunni macciishshineemmoha ikkiro, Iso ayirrinseemmotanna isira hajajama hasiꞌneemmota leellinsheemmo.—Ibiraawoota 13:7.

▸ Fooliishsho 4, gufo 2

Guuntete xeꞌne noonkere ikkinoommo daafira, umonke calla baxanna naaxxa rakkankera dandiitanno. Ikkollana Yihowa ninkeneeto heeshshi assinammora hasiꞌranno. Yihowa hendiro ninke mageeshshi geeshsha hilire ikkinoommoro huwanteemmo woyite, ninkeneeto heeshshi assa ronsammora dandiineemmo. (Iyyoobi 38:1-4) Qoleno ninkeneeto heeshshi assineemmoha ikkiro, uminkera roorsiꞌra agurre wolootaho hendeemmo. Naaxxa mittu manchi woloota roorinoha lawannosi gede assitanno. Isonooto heeshshi assanno manchi kayinni dancha akattasino laanfesino afino. Togoo manchira loosino soꞌro ammana, maaro xaꞌmiꞌra, wolootu hedonna amaale adha diqarrissannosi. Isonooto heeshshi assanno manchi Yihowa addaxxanno; hattono Isi biddishsha harunsanno.—1 Pheexiroosi 5:5.

▸ Fooliishsho 4, gufo 4

Silxaane, wolootaho biddishsha aatenna mito coye murate qoossooti. Iimanna uullate aana baalunkunni roore silxaane noosihu Yihowaati. Baalanka coye kalaqinohu iso ikkino daafira, kalqete alamera baalunkunni roore wolqa noosihu isooti. Isi woꞌmante yannara silxaanesi woloota kaaꞌlate horoonsiꞌranno. Yihowa mannu ooso giddo mitootu ninke towaattanno gede qoosso uyinonsa. Lawishshaho annuwahonna amuuwaho, songote cimeeyyeranna gashshaanote silxaane noonsa; konni daafira Yihowa insa ledo sumuu yinammora hasiꞌranno. (Roomu Sokka 13:1-5; 1 Ximootewoosi 5:17) Ikkollana mannu seeri Maganunnihu ledo sumuu yaannokki yannara, mannaho ikkikkinni Maganoho hajajammeemmo. (Soqqamaasinete Looso 5:29) Yihowa horoonsiꞌranni noorira hajajammeemmoha ikkiro, Yihowa ayirrinseemmota leellinsheemmo.

▸ Fooliishsho 4, gufo 7

Yihowa songo towaatate, songote cimeeyye yaano gikki yitino roduuwa horoonsiꞌranno. (Marro 1:13; 1 Pheexiroosi 5:2) Kuri labballi, Yihowa ledo noonke jaaloomi kaajjanno gedenna Iso qinaawino garinni magansiꞌneemmo gede kaaꞌlitannonke. (1 Qorontoosi 14:33, 40) Cimeeyye qullaawu  ayyaaninni shoomantinore ikkate, Qullaawu Maxaafi giddo kulloonni guunte wonsha hasiissannonsa. (1 Ximootewoosi 3:1-7; Tiito 1:5-9; 1 Pheexiroosi 5:2, 3) Maganu dirijjite addaxxineemmonna tenne dirijjitera kaaꞌlammeemmo daafira, cimeeyyete ledo hagiirrunni maahoyye yine loonseemmo.—Faarso 138:6; Ibiraawoota 13:17.

▸ Fooliishsho 4, gufo 8

Yihowa annahonna amate oosonsanna mininsa manna towaatate qoosso uyinonsa. Ikkollana Qullaawu Maxaafi maatete umi anna ikkinota kulanno. Annu hoogiro kayinni ama maatete umo ikkitanno. Maatete umira uyinoonni qeechi minisi mannira sagale, uddanonna galtannowa shiqishate. Maatete umo ikkinohu, maatesi Yihowa magansidhanno gede albisa ikke kaaꞌla hasiissannosi. Lawishshaho, songote gambooshshe ganyite hadhanno gedenna soqqansho fultanno gede kaaꞌlannonsa; hattono Qullaawa Maxaafa mitteenni xiinxallanno. Maatete umi addi addi coye muranno. Isi Yesuusi lawishsha harunse shaqqadonna quwa saꞌꞌannokkiha ikkanno ikkinnina, kaajjado woy gadadisannoha diꞌꞌikkanno. Tini maatete giddo baxillu woꞌmanno gede assitanno; hakko daafira maatete miilla baalanti teesse heedhanno, hattono Yihowa ledo noonsa jaaloomi kaajjara dandaanno.

▸ Fooliishsho 4, gufo 12

Aliidi Bisi, Maganu mannisi loosanni noo looso massagganno gede doorino manni gaamooti; tenne gaamo miilla iimira haꞌrate hexxo noonsareeti. Umi xibbi diro, Yihowa Kiristaanu songonna sabbakate looso massaganno gede aliidi biso horoonsiꞌrino. (Soqqamaasinete Looso 15:2) Yannankerano, Aliidi Biso ikkite soqqantanno roduuwi albisa ikkite Maganu mannira biddishsha uyitanno, hattono mannasi agartanno. Kuri roduuwi mitto coye murtanno woyite Maganu Qaalenna qullaawa ayyaana addaxxitanno. Yesuusi tenne buurantino roduuwi gaamo “ammanaminohanna wodanaamo borojjicho” yiino.—Maatewoosi 24:45-47, NW.

▸ Fooliishsho 4, gufo 15

Songote giddo labballu roduuwi loossanno looso, meya rodoo loossanno gede assinanni woyiti heeꞌrara dandaanno. Togoo yannara ise umo gugguꞌlite Yihowa fushshino wodho ayirrissannota leellisha dandiitanno. Ikkollana ise umo gugguꞌlitannokki woyitino heeꞌrara dandaanno. Lawishshaho, mitte rodoo minaannise woy cuuamino rodii noowa Qullaawa Maxaafa xiinxallissannoha ikkiro umo gugguꞌlitanno.—1 Qorontoosi 11:11-15.

▸ Fooliishsho 4, gufo 17

Yihowa soqqamaasine poletikaho anga diwodhitanno. (Yohaannisi 17:16) Yihowa magansidhannori Maganu Mangistera kaaꞌlantanno. Yesuusi gede ninkeno alamete coyira anga diwodhineemmo.

Yihowa ‘gashshaanotenna roorrootaho hajajammeemmo’ gede kulinonke. (Tiito 3:1, 2; Roomu Sokka 13:1-7) Ikkollana Maganu seeri lubbo shaa hasiissannokkitano kulanno. Konni daafira Kiristaanaho tiiꞌꞌinsa ola olantanno gede difajjannonsa. Mittu Kiristaanchi olamate bayicho wole looso loosanno gede hajanjisiro, tiiꞌꞌisi fajjisire assanno.

Yihowa Kalaqaanchonke ikkino daafira, iso calla magansiꞌneemmo. Gobbate malaatta ayirrinseemmoha ikkirono, baandiira keere dihaaꞌneemmo, woy gobbate faarso difaarsineemmo. (Isayaasi 43:11; Daanieeli 3:1-30; 1 Qorontoosi 10:14) Qoleno Yihowa manni poletiku gashshaano doorranni woyite anga diwodhanno. Togo assineemmokkihu, Maganu gashshoote doodhine kaꞌnoommo daafiraati.—Maatewoosi 22:21; Yohaannisi 15:19; 18:36.

▸ Fooliishsho 5, gufo 2

Alame Sheexaanu hedo tareessitanno. Yihowa baxannokkihunna Isi lawishshanna biddishshasi harunsannokki mannira hattoo hedo noonsa. (1 Yohaannisi 5:19) Togoo hedonni kaꞌne assinanni coye alamete ayyaana yinanni. (Efesooni Sokka 2:2) Yihowa manni alamete ayyaani daafannonsakki  gede qorophanno. (Efesooni Sokka 6:10-18) Hatteentenni Yihowa doogo banxeemmo, hattono isi hedo seekkine cuꞌmiꞌneemmo.

▸ Fooliishsho 5, gufo 7

Kaada Qullaawu Maxaafi halaali ledo sumuu yaa giwate. Kaadaasine Yihowaranna Maganu Mangiste Moote ikkinohura Yesuusira finqiltanno; qoleno wolootuno insa ledo finqiltanno gede assate woꞌnaaltanno. (Roomu Sokka 1:25) Kaadaasine Yihowa magansiꞌranno manni wodanira huluullo kalaqa hasidhanno. Hundano ikko yannankera mitu Kiristaani kaadaasine ikkino. (2 Teselonqe 2:3) Yihowara ammanantinori kaadaasinete ledo aye garinnino dixaaddanno. Afate quqquxamme woy wolootu xixxiibbeennanke kaadaasinete hedo nabbawa woy macciishsha dihasiissannonke. Ninke Yihowara ammanammeemmo; hattono iso calla magansiꞌneemmo.

▸ Fooliishsho 5, gufo 9

Muse Seeri garinni, Israeelete daga Yihowa cubbonsa aguranno gede huuccidhanno. Insa gide, zayitenna saada kakkalate qullaawu minira abbitanno. Konni garinni Israeele Yihowa daga woꞌmate cubbono ikko mittu mittunku Israeelaawichi cubbo gatona yaannota qaagganno. Gedensoonni Yesuusi cubbonke diwate heeshshosi uyino daafira, cubbo diwate shiqinshanni kakkalo dihasiissanno. Yesuusi guutanna “lendannikki” kakkalo shiqishino.—Ibiraawoota 10:1, 4, 10.

▸ Fooliishsho 7, gufo 6

Muse Seerira, mannu saada sagalimmate horoonsiꞌranno gede fajjinoonni. Qoleno Israeele saada kakkalo assite shiqishshanno gede hajanjoonninsa. (Leewaawoota 1:5, 6) Ikkollana Yihowa mannu saada beebba assiꞌranno gede difajjino. (Lawishsha 12:10) Isinni, Muse Seeri saada  hasiꞌni gede assinannita hoolanno biddishsha amadino. Isiraeele saadansa garunni towaattanno gede hajanjoonninsa.—Marro 22:6, 7.

▸ Fooliishsho 7, gufo 6

Shiimmaadda mundeete beehache. Mundee shoole qara qara beehache afidhino; insano: duume mundeete seele, waajjo mundeete seele, pileetileetetenna pilaazimaho. Kuri qaru qaru mundeete beehachinni wole shiimmaadda mundeete beehache fushsha dandiinanni. a

Kiristaanu woꞌma mundeeno ikko shoole qara qara mundeete beehache diadhanno woy woleho diaanno. Ikkollana shiimmaadda mundeete beehache adha hasiissannoyya? Qullaawu Maxaafi tenne daafira xawise dikulanno. Konni daafira, mittu mittunku Kiristaanchi Qullaawu Maxaafinni qajeelino tiiasi horoonsiꞌre umisi doorsha doodha hasiissannosi.

Mitu Kiristaani shiimmaadda mundeete beehache baalanka adha hooga doodhanno. Tenne doodhannohu Maganu Israeelete dagara uyino Seeri giddo saadate giddonni fultino mundee gudinse ‘uulla dunnanni’ gede hajajino daafira ikkara dandaanno.—Marro 12:22-24.

Wolootaho kayinni tiiꞌꞌinsa shiimmaaddu mundeete beehachi giddo mite adhanno gede fajjannonsa. Kuni Kiristaani, shiimmaaddu mundeete beehachi mundee haꞌnoonni kalaqami heeshsho riqiwanno geeshsha diꞌꞌikkino yee hedanno.

Shiimmaadda mundeete beehache adha woy adha hooga doodhatto woyite aante noo xaꞌmuwa hedi:

• Shiimmaadda mundeete beehache baalanka diadheemmo yaa, dhibba gargadhate kaaꞌlitannota woy duꞌnantanno mundee uurritanno gede uyinanni xaggano diadheemmo yaa ikkitinota huwatoommo?

•   Mito shiimmaadda mundeete beehache adheemmohu woy adheemmokkihu mayiraatiro akimete xawise kula dandeemmo?

Xaginsanni ogimma. Kiristaana ikkinoommo daafira, mundee diuyineemmo; qoleno biso darrankera albaanni haaꞌne worroonnita uminke mundee diadhineemmo. Ikkollana meessi mundee horoonsiꞌne xaginsanniti wole ogimmano no. Mittu mittunku Kiristaanchi biso darrannisi yannara, dhibba laisiisiꞌrate mundeesi aanno woyite, woy wolu garinni xagisiꞌranno woyite mundeesi hiissinanniro umisi doodha hasiissannosi. Togoo ogimmanni xaginsanni woyite, dhiwamino manchi mundee mite yanna geeshsha bisisi giddonni bande fushshinanniha ikkara dandaanno.—Ledde afate, Birra 15, 2000 Agarooshshu Shae (Amaaru Afoo) qoola 30-31 lai.

Lawishshaho, himodayilushini yinanniti xaginsanni ogimma no; tenne ogimmanni xaginsanni yannara, biso darranni woyite fultanno mundee bayichonko haaꞌne hakko bayicho mundeete jilba ledannore worranni. Hakkiinni, biso darre kaꞌnikkinni woy darre kaꞌnihunni shiima yanna gedensaanni, haaꞌnoonni mundee bisu giddora qollanni.

 Wole xaginsanni ogimma seeli-salveeji yinannite. Tini, dhiwamino manchira bisosi darri woyite fultino mundee gamba assine xalashshini gedensaanni, biso darre kaꞌnikki woy darrihunni shiima yanna gedensaanni wirro bisisi giddora qollanni ogimmaati.

Mittu mittunku akimichi tenne ogimma addi addi garinni horoonsiꞌrara dandaanno. Konni daafira, mittu Kiristaanchi biso dadhara woy dhibba laisiisiꞌrara woy wolu garinni xagisiꞌrara albaanni, mundeesi ma assinara hendoonniro afa hasiissannosi.

Umikki mundee horoonsiꞌne xaginsanni ogimma adhattoronna teꞌee doodhatto woyite aante noo xaꞌmuwa hedi:

• Gama mundee bisiꞌyanni fulte massaaru giddoonni saꞌanno gede assinironna haꞌrinshose shiima yanna uurrituro, tenne mundee bisiꞌya kifile ikkitino gede asse laeemmo gedenna ‘baattote aana duꞌnama’ hasiissannokkite gede asse laꞌꞌammora tiiꞌꞌiꞌya fajjannoe?—Marro 12:23, 24.

• Biso darrannie woyite gama mundee bisiꞌyanni fultanno gede assine kaꞌne, hattee mundee wole xagga ledo karsiinse bisiꞌya giddora qollanniha ikkiro, Qullaawu Maxaafinni qajeelino tiiꞌꞌiꞌya fajjannoe?

• Umiꞌya mundeenni xaginsanni ogimma baala diadheemmo yaa, mundee laisiisiꞌra, himodayalisisi yinanni ogimma, woy wodananna shombo riqiwe loosanno massaarinni xaginsannietano dihasiꞌreemmo yaa ikkitinota huwatoommo?

 Shiimmaaddu mundeete beehachinna meessi mundeenni xaginsanni ogimma daafira doodhinammora albaanni, Yihowa biddishsha afiꞌrate huuccatto assiꞌranna seekkine xiinxalla hasiissannonke. (Yaiqoobi 1:5, 6) Hakkunni gedensaanni, Qullaawu Maxaafinni qajeelino tiiꞌꞌinkenni uminke doorsha doodha hasiissannonke. Wole mancho, ‘Ate ikkoottoro maa assatto?’ yine xaꞌma woy wolootu togo asse yitankera wodha dihasiissannonke.—Roomu Sokka 14:12; Galatiyu Sokka 6:5.

▸ Fooliishsho 7, gufo 11

Qullaawa amanyoote yaa, Maganu albaanni amanyootinkenna assootinke qullaawa ikkanno gede assiꞌrate. Hendeemmori, coyiꞌneemmorinna assineemmori qullaawa ikka hasiissannosi yaate. Yihowa duuchunku gari foorrewiinni woy battewiinni xeertiꞌneemmo gede hajajinonke. (Lawishsha 1:10; 3:1) Gara ikkinokkire assineemmo gede fonqolo ikkannonke coyi iillankera albaanni nafa, Yihowaha xalala seera harunsate murciꞌra hasiissannonke. Surrenke qullaawa ikkitanno gedenna amanyoote bainore assineemmo gede fonqolu iillannonke woyite qeelammeemmokki gede kaaꞌlankera Yihowa ganyine huucciꞌra hasiissannonke.—1 Qorontoosi 6:9, 10, 18; Efesooni Sokka 5:5.

▸ Fooliishsho 8, gufo11

Mittu manchi coyiꞌrannori woy assootisi Maganu seeriwiinni lowo geeshsha xeertiꞌrinohanna saala afiꞌrinokkiha ikkiro tini saalimale ikkitooti. Mittu manchi togoo amanyooti noosiha ikkiro, Maganu seera ayirrisannokkita leellishanno. Mittu manchi maaeelu amanyooti noosiha ikkiro, tenne songonniti yoote komite laꞌara dandiitanno. Batte duuchu gari cubbooti. Mite batte deerrise garinni, Kiristaanu songoti yoote komite laꞌannota ikkitara dandiitanno.—Galatiyu Sokka 5:19-21; Efesooni Sokka 4:19; tenne hajo daafira ledde afate, Maaja 15, 2006 Agarooshshu Shaera (Amaaru Afoo) nooha “Nabbawaano Xaꞌmitanno Xaꞌmo” yaanno birxicho lai.

▸ Fooliishsho 9, gufo 7; Fooliishsho 12, gufo 10

Yihowa minaanninna minaama mimmitoho baxillensa leellishate siimu xaadooshshe assanno gede fajjino. Ikkollana mittu manchira maasterbeeshiinete rosichi heeꞌrisiro (woy siimu xaadooshshi hasattosi wonshiꞌrate yee sirote bisosi amammaxxannoha ikkiro), siimu xaadooshshe batteessanni no. Tini gade mittu manchira Yihowa ledo noosi jaalooma huntara dandiitanno. Kuni assooti, busha yorto kalaqantanno gede assaranna siimu xaadooshshira gara ikkitinokki lao heedhannosi gede assara dandaanno. (Qolasiyaasi Sokka 3:5) Mittu manchi tenne batte ikkitino gade qeeꞌla qarra ikkitusiro, hexxo mudha dihasiissannosi. (Faarso 86:5; 1 Yohaannisi 3:20) Aterano togoo rosichi nooheha ikkiro, Yihowa kaaꞌlannohe gede eeggifatte huucciꞌri. Maaeela coye hedatto gede assitannote teeda baꞌino misillawiinni xeertiꞌri. Kiristaana ikkino annikkira woy amakkira, woy Yihowa seera ayirrisannohu gikki yiino jaalikkira hasaaphi. (Lawishsha 1:8, 9; 1 Teselonqe 5:14; Tiito 2:3-5) Yihowa qullaawu amanyooti heeꞌrannohe gede assiꞌrate sharramattota laꞌꞌanno, hattono tenne sharrokki naadanno.—Faarso 51:17; Isayaasi 1:18.

▸ Fooliishsho 9, gufo 9

Yihowa adhanna adhama xintinohu mittu labbaahunna mitte meyati calla adhamanno gede asseeti. Hunda Israeelete yannara, Maganu mittu manchi mitte galte sayise adhanno gede fajjino; ikkollana umi hedosi tenne diꞌꞌikkitino. Yihowa xaa yannara mannisi mitte galte sayise adhara difajjino. Minaanni mitte galte calla adha, minaama kayinni mittoho calla assiꞌra hasiissannose.—Maatewoosi 19:9; 1 Ximootewoosi 3:2.

▸ Fooliishsho 10, gufo 12

Yihowa galte xintinohu minaanninna minaama heeshshote noo geeshsha mitteenni heeꞌranno gedeeti. (Kalaqama 2:24; Milkiyaasi 2:15, 16; Maatewoosi 19:3-6; 1 Qorontoosi 7:39) Isi galte diinganni gede fajjinohu minaanni woy minaama fooriro callaati. Togoo yannara Yihowa baddalamino minaanni woy minaama galtensa diigannoronna teꞌee uminsa doodhanno gede qoosso uyinonsa.—Maatewoosi 19:9.

 Mitu Kiristaani, galtensa foortukkinni babbaxxe heeꞌra doodhino. (1 Qorontoosi 7:11) Babbaxxine heeꞌnanni gede assara dandaannori aane nooreeti.

• Maatete hasiisannore wonsha giwa: Minaanni maatesira hasiisannore shiqisha giweenna, maatesi woxenna sagale hoogguro.—1 Ximootewoosi 5:8.

• Gane gawajjannoha ikkiro: Minaanni (minaamano ikkitara dandiitanno) galtesi ganeenna fayyimmase baasa gawajjantanno woyite woy ise lubbosera waajjitanno deerra iillitanno woyite.—Galatiyu Sokka 5:19-21.

• Galtesira Yihowa ledo noose jaaloomi baasa gawajjamannoha ikkiro: Minaanni (woy minaama) minaamasi Yihowara soqqantannota hoolannoha ikkiro.—Soqqamaasinete Looso 5:29.

▸ Fooliishsho 11, gufo 19

Ninke baalunkura galatunna jawaante hasiissannonke. (Lawishsha 12:25; 16:24) Baxillunna shaqqillu noo coye coyiꞌne mimmito jawaachisha dandiineemmo. Tini roduuwinke kaajjite uurritanno gedenna qarra dandiite Yihowara soqqantanno gede kaaꞌlitannonsa. (Lawishsha 12:18; Filiphisiyusi Sokka 2:1-4) Mittu manchi hexxo mudhiro, isi yaannore ayirrinyunni macciishshanna hedosi wodanchate woꞌnaala hasiissannonke. Hatto assanke iso kaaꞌlate maa assa woy maa coyiꞌra dandiineemmoro afate kaaꞌlitannonke. (Yaiqoobi 1:19) Roduuwikkira mayi hasiisannonsaro afa dandaatto gede, insa seekkite egennate woꞌnaali. Hatto assittoro, jawaantetenna shesho baalate Buicho ikkino Magano addaxxitanno gede kaaꞌlattonsara dandaatto.—2 Qorontoosi 1:3, 4; 1 Teselonqe 5:11.

▸ Fooliishsho 12, gufo 16

Qullaawu Maxaafi sargete yannara harunsa hasiissanno wodho tittire dikulanno. Sargete budinna wodho qooxeessu qooxeessu garinni babbaxxitara dandiitanno. (Kalaqama 24:67; Maatewoosi 1:24; 25:10; Luqaasi  14:8) Sargete yannara assinannihu qaru coyi minaanninna minaama Yihowa albaanni eanno qaaleeti. Batinyu minaanninna minaama qaale eanno woyite fiixansanna jaallansa woshshanno; qoleno songote cimeessi Qullaawu Maxaafi aana xintantino lallawo shiqishannonsa gede assiꞌranno. Minaanninna minaama sargisannoha ikkiro, wosinansa ma garinni wosinsannoro uminsa doodha dandaanno. (Luqaasi 14:28; Yohaannisi 2:1-11) Insa sargensara qixxaawanno woyite, sargensa Yihowara ayirrinye abbitannoronna teꞌee heda hasiissannonsa. (Kalaqama 2:18-24; Maatewoosi 19:5, 6) Qullaawu Maxaafihu xintu seeri insa danchare doodhanno gede kaaꞌlannonsa. (1 Yohaannisi 2:16, 17) Minaanninna minaama sargensawa agatto shiqishate hedannoha ikkiro, bikkunni anganni gede assa hasiissannonsa. (Lawishsha 20:1; Efesooni Sokka 5:18) Insa sargensawa muuziiqu woy boohaarshu heeꞌrara hasiꞌriro, Yihowa ayirranno gede assannore calla assa hasiissannonsa. Minaanninna minaama sargensa calla hedantenni, Yihowa ledonna mimmitu ledo noonsa jaaloomi aana illachisha hasiissannonsa.—Lawishsha 18:22; ledde afate Birra 15, 2006 Agarooshshu Shae (Amaaru Afoo) qoola 18-22, qoola 23-27 nna qoola 28-31 lai.

▸ Fooliishsho 13, gufo 18

Heeshshonke giddo Maganu Qaalihu xintu seeri ledo sumuu yaannoha dancha doorsha doodha hasiꞌneemmo. Lawishshaho, mitto Kiristaancho Yihowa Farciꞌraasincho ikkitinokki galtesi dagate ayyaani barra fiixise ledo sagale itanno gede koyissasira dandiitanno. Ate ikkoottoro maa assatto? Tiiꞌꞌikki haꞌratto gede fajjannoheha ikkiro, koyishshu basera Magano magansidhannokki daga budi heeꞌriro hakko coyira karsamattokkita galtekkira kula dandaatto. Qoleno hakko koyishshira maahoyye yite haꞌrittoro wolootu gufidhannoronna teꞌee heda hasiissannohe.—1 Qorontoosi 8:9; 10:23, 24.

Loosiisannohe manchi ayyaanu woggara damoozikki aana woxe lede aahera dandaanno. Hakkonne woxe adha giwa hasiissannohe? Giwa hasiissannohekkiha ikkara dandaanno. Loosiisaanchikki hakkonne woxe laꞌꞌanno gari, adhatto gede woy adhattokki gede assahera dandaanno. Isi hakkonne afansha adhittoro ayyaana ayirrisoottohu gede asse laꞌꞌannonso, woxe ledinohehu mulla ate galatate geeshshira callaati? Konnenna wole togoo korkaata hedde, hakkonne woxe adhattoronna teꞌee doodha dandaatto.

 Wole woyite qole, mittu manchi ayyaanu woggara, “Ayyaana ayirrisattokkita afoommo; kayinni konne afansha aammohera hasiꞌroommo” yaahera dandaanno. Hakku manchi afansha uyinohehu shaqqado ikkino daafira ikkara dandaanno. Wole widoonni kayinni, kuni manchi ammanakki jife laꞌꞌanni nooha woy ayyaanaho karsamatto gede assate woꞌnaalanni noohalla ikka? Tenne xaꞌmo heditto gedensaanni, hakkonne afansha adhattoronna teꞌee umikki doodha dandaatto. Doodhineemmo doorshi baalunkunni, danchu tiiꞌꞌi heeꞌrankeranna Yihowara ammanama hasiꞌneemmo.—Soqqamaasinete Looso 23:1.

▸ Fooliishsho 13, gufo 22

Duucha woyite, kawa kaꞌaa higino coye ranke salaametenni tirate woꞌnaalliro, lowo qarri kalaqamannota hoola dandiinanni. (Maatewoosi 5:23-26) Mittu mittunku Kiristaanchi, baalunkurinni roorse Yihowa ayirranno gedenna songote mittimma baꞌannokki gede assate sharrama hasiissannosi.—Yohaannisi 13:34, 35; 1 Qorontoosi 13:4, 5.

Kiristaanu woxe lainohunni mereeronsa coyi kawa kaꞌaa higiro, yoote minira hadhukkinni tirate woꞌnaala hasiissannonsa. Phaawuloosi 1 Qorontoosi 6:1-8 aana Kiristaanu mereero kalaqantinota yoote yekkeero xawisino. Mitto rodoo kassanse yoote minira shiqanno gede assa Yihowano ikko songo ayirritannokki gede assitanno. Kiristaanu suꞌmansa hunniro, woxensa hanaanqiro, woy mereeronsa togoohu buutote qarri kalaqamiro assa hasiissannonsaha sase coye Maatewoosi 18:15-17 kulloonni: (1) Kalaqamino qarra uminsa tira hasiissannonsa. (2) Tini tirtannokkiha ikkiro, mittu woy lamu gikki yiino roduuwi kaaꞌlannonsa gede xaꞌmiꞌra dandiitanno. (3) Hakkiinni hasiisannoha ikkiro, coye songote cimeeyyera kula dandiitanno. Coyi konne deerra iilliro, cimeeyye Qullaawu Maxaafiha xintu seera horoonsidhe coyi kawa kaꞌaa higinonsa roduuwi sumuu yitanno gede assate woꞌnaaltanno. Hajo laꞌannonsa roduuwi giddo mitootu Qullaawu Maxaafi seera harunsa gibbannoha ikkiro, songote cimeeyye coye songonniti yoote komite laꞌanno gede assitara dandiitanno.

Yoote minira haꞌne coye biddi assa hasiissanno woyiti kayinni heeꞌrara dandaanno; lawishshaho adhanna adhama diigantanno woyite, ooso  lossiꞌrate qoosso xaꞌmiꞌrate, adhama diigantu gedensaanni minaanni woy minaama muranno woxi daafira, kaasa xaꞌmiꞌratenna xaansu ledo xaadooshshe afidhino hajora yoote minira haꞌra dandiinanni. Mittu Kiristaanchi togoo coye yoote mine salaametenni tirate woꞌnaalasi, Phaawuloosi amaale diiga diꞌꞌikkitino.

Mittu manchi wole giddeesse bushiishiro (woy seyatiro), qaaqquulle bushiishiro, manna gane gawajjiro, lowo coye mooriro, lubbo shiiro, woy wole togoota buutote jaddo loosironna mittu Kiristaanchi tenne gashshaanote kuliro, tini Phaawuloosi amaale diiga diꞌꞌikkitino.

▸ Lawishsha 14, gufo 14

Sheexaanu Edenete kaashshu basera Heewani soꞌrisiisi yannanni kayise, mannu ooso doge soꞌrisiisanni keeshshino. (Kalaqama 3:1-6; Yohaannisi Ajuuja 12:9) Isi hedonke daafa dandiiro, gara ikkinokkire assineemmo gede assa dandaannota afino. (2 Qorontoosi 4:4; Yaiqoobi 1:14, 15) Isi poletika, ammaꞌno, daddalo, boohaarsha, rosonna wole batinye coye horoonsiꞌre hedosi halashshatenna dancha lawise shiqishate woꞌnaalanno.—Yohaannisi 14:30; 1 Yohaannisi 5:19.

Sheexaanu mannu ooso soꞌrisiisannoti shiima yanna calla gattinosita afino. Konni daafira isi dandaamisi deerrinni lowo manna soꞌrisiisate sharramanni no. Isi roorenkanni Yihowa soqqamaasine soꞌrisiisa hasiꞌranno. (Yohaannisi Ajuuja 12:12) Qoropha hoongummoro, Daawuloosi sunu sununni hedonke daafara dandaanno. (1 Qorontoosi 10:12) Lawishshaho, Yihowa adhanna adhama geeddara hasiꞌranno. (Maatewoosi 19:5, 6, 9) Ikkollana yannankera batinyu manni adhama banxi yannara diiga dandiinanni coyi gede asse laꞌꞌanno. Batinye filmenna televizhiinete pirogiraame togoo lao halashshitanno. Alamete mannira adhanna adhamate daafira noonsa lao hedonke daaffara wodha dihasiissannonke.

Sheexaanu ninke soꞌrisiisate horoonsiꞌrannoti wole hayyo, meessi hedonni massagamate laooti. (2 Ximootewoosi 3:4) Qoropha hoongummoro, Yihowa shoominorira noonke ayirrinyi baꞌꞌara dandaanno. Lawishshaho, mittu rodii songote cimeeyye uyitanno biddishsha adha giwa hanafara dandaanno. (Ibiraawoota 12:5) Woy mitte rodoo Yihowa maatete giddo worinote umimmate silxaanera hajajama giwa hanaffara dandiitanno.—1 Qorontoosi 11:3.

 Daawuloosi hedonke daafannokki gede sharrama hasiissannonke. Hatteentenni, Yihowa hedo harunsanna ‘iima noo coye heda’ hasiꞌneemmo.—Qolasiyaasi Sokka 3:2; 2 Qorontoosi 2:11.

▸ Fooliishsho 16, gufo 9

Ninke baalunku fayyuulle ikkanna dhiwammeemmo woyite xagisiꞌra hasiꞌneemmoti egennantinote. (Isayaasi 38:21; Maarqoosi 5:25, 26; Luqaasi 10:34) Yannankera addi addi gari xagganna babbaxxitinoti xaginsanni ogimma no. Uyinanninke xagga doodhineemmo woyite, Qullaawu Maxaafiha xintu seera harunsa hasiissannonke. Woꞌmunni woꞌma hursitannonketi Maganu Mangiste calla ikkitinota anfoommo. Fayyimmanke daafira calla hendanni, Yihowara soqqama agurreemmo deerra iilla dihasiꞌneemmo.—Isayaasi 33:24; 1 Ximootewoosi 4:16.

Agaanintete ledo xaadooshshe afidhino xaggawiinni xeertiꞌra hasiissannonke. (Marro 18:10-12; Isayaasi 1:13) Konni daafira, mitto xagicho woy xaginsanni ogimma adhinammora albaanni, mayi ledo xaadooshshe afidhinoronna hiittoo hedo halashshitannoro afa hasiissannonke. (Lawishsha 14:15) Sheexaanu, agaanintete coyira karsammeemmo gede dogankera woꞌnaalannota dea dihasiissannonke. Mittu xagichi agaanintete ledo xaadooshshe afiꞌrino yine huluullammeemmoha ikkiro nafa, hattoo xagicho qoropha hasiissannonke.—1 Pheexiroosi 5:8.

▸ Fooliishsho 16, gufo 18