1, 2. Maatenke giddo qarru kalaqamino yaa adhamanke diqinaabbanno yaateni? Xawisi.

 ADHANNA adhama Yihowa eltooti. Adhama mitto mancho hagiirraamo ikkanno gede assitara dandiitanno. Ikkollana baalante maate giddo fonqolo ikkannori kalaqamanno. Isinni mito woyite qarru horo goofannokkiha lawanno daafira, minaanninna minaama mimmituwiinni godowa xeertiꞌranni nooha lawansara dandaanno.

² Adhamanke giddo qarru kalaqamiro dhagge assiꞌra dihasiissannonke. Maatenke giddo qarru kalaqami yaa, adhamanke diqinaabbanno yaa diꞌꞌikkino. Galtensa giddo buutote qarri kalaqamino minaanninna minaama nafa jaaloomansa haaroonsiꞌranna adhamansa kaajjitanno gede assiꞌra dandiino. Hiittoonni?

3, 4. Mito woyite maatete giddo mayi kalaqamara dandaanno?

³ Adhanna adhama lamu babbaxxino manni xaadooshsheeti; mittu mittunkura baxannorinna giwannori noonsa; qoleno, hedonsanna ikkitonsa gari babbaxxara dandaanno. Qoleno minaanninna minaama lophino garinna budinsa babbaxxinoha ikkara dandaanno. Minaanninna minaama mimmitu daafira seekke afatenna wodanchate yanna hasiissanno.

⁴ Yanna saꞌanno woyite, minaanninna minaama  uminsa dilgora calla diinaggaawaranna mimmituwiinni xeertiꞌranni haꞌrara dandaanno. Isinni insa addi addi heeshsho heeꞌrannore lawara dandaanno. Ikkina albinni roore mimmitunniwa gamba yaanno gede kaaꞌlannonsari maati?

5. (a) Mittu Kiristaanchi albinni roore galtesiwa gamba yaanno gede kaaꞌlannosiri maati? (b) Ibiraawoota 13:4 kultanno garinni, adhanna adhama ma garinni laꞌꞌa hasiissannonke?

⁵ Yihowa isiwanna galtekkiwa roore gamba yaa dandaatto gede kaaꞌlitannota kaajja amaale aannohe. (Faarso 25:4; Isayaasi 48:17, 18) Isi “Adhanna adhama baalunku ayirrisannota ikkito” yiino. (Ibiraawoota 13:4) Mittu coyi ayirrado ikkiro, hakku coyi muxxete hattono lowo waaga afiꞌrinoho yaate. Togoo coye gawajjamannokki gede agarreemmo ikkinnina mulluri gede assine dilaꞌneemmo.  Yihowa adhanna adhama hakko garinni laꞌnammora hasiꞌranno.

6. Maatewoosi 19:4-6 Yihowara adhanna adhamate daafira noosi lao kultannonkehu hiittoonniiti?

⁶ Umo adhanna adhama xintinohu Yihowaati. Beettisi Yesuusi togo yiino: “Maganu umo kalaqamu waro, labbaahanna meyata asse kalaqinota dinabbabbinoonni? Qoleno, ‘Kunnira manchu annasinna amasi agure galtesi ledo karsamanno. Lamunku mitto biso ikkanno.’ Kunnira, insa kunni kaꞌa mitto bisooti ikkinnina lame diꞌꞌikkitino. Xaate Maganu mitto assinore mannu badoonke.” (Maatewoosi 19:4-6) Hundanni Yihowa adhanna adhama xintinohu geedonnita ikkitanno gedeeti. Isi maatete miilla mimmitunniwa gamba yite mitteenni hagiidhitanni heedhara hasiꞌranno.

7. Minaanninna minaama adhamansa kaajjishiꞌra dandaannohu hiittoonniiti?

⁷ Ikkollana, xaa yannara adhamino mannira albinni roore fonqolo ikkannorinna yaachishannori iillannonsa. Mito woyite fonqolu lowoha ikkanno daafira, insa hexxo mudhe mitteenni heeꞌra didandiineemmo yee hedara dandaanno. Ikkollana Yihowa adhanna adhama laꞌꞌanno gara huwatanke kaaꞌlitannonke.—1 Yohaannisi 5:3.

8, 9. (a) Yihowa adhanna adhamate daafira fushshino biddishsha harunsa hasiissannonkehu hiikka woyiteeti? (b) Adhanna adhamanke ayirrinseemmota leellisha dandiineemmohu hiittoonniiti?

⁸ Yihowa aannonke biddishshi woꞌmanka woyite kaaꞌlannonkeho. Aleenni laꞌnummonte gede, Yihowa “Adhanna adhama baalunku ayirrisannota ikkito” yee amaalinonke. (Ibiraawoota 13:4; Rosiisaancho 5:4)  Konne assa shota ikkitannokki woyite nafa Yihowa biddishsha harunsineemmoha ikkiro, hoꞌro afiꞌneemmoti egennantinote.—1 Teselonqe 1:3; Ibiraawoota 6:10.

⁹ Adhanna adhamanke ayirrinseemmo daafira, adhamanke gawajjara dandaannore assa woy coyiꞌra dihasiꞌneemmo. Hatteentenni, galtenke ledo noonke aante kaajjishiꞌra hasiꞌneemmo. Konne assa dandiineemmohu hiittoonniiti?

10, 11. (a) Mite maate mereero hiittoo qarri kalaqamanno? (b) Minaannanke woy minaamanke hasaawinseemmo gara seekke heda hasiissannonkehu mayiraati?

¹⁰ Mittu manchi galtesi xissiisara dandaannoti duucha doogo no. Kiristaanu galtensa gana woy bisonsa gawajjannoha wole coye assa horonta hasiissannonsakkita anfoommo. Ikkirono, coyiꞌneemmo coyinni mimmito gawajjinammora dandiineemmo. Arrawu urdete gede qasara dandaanno. Mitte mancho togo yitino: “Minaanniꞌya coyinni qasannoe. Illete leellanno bassi nooekkiha ikkirono, duucha woyite ‘Duha ikkoottae!’ hattono ‘Ditidhoottate!’ yaanni wodanaꞌya madiissanno.” Mittu minaanni minaamasi duucha woyite woffi assitannositanna xontannosita coyiꞌrino. Isi togo yiino: “Ise yitannoere mannu albaanni coyiꞌra saalfateemmo. Ise ledo hasaawa dandeemmokkihunna loosu basera keeshsheemmohu iseraati. Qaera haꞌrammonte hakko keeshshe fooliishshiꞌrummoro woyyannoe.” Yannankera, wodana madiissannohanna godowa xissiisanno coye coyiꞌra rosamino coye ikkitino.

¹¹ Minaanninna minaama mimmitoho busha qaale coyiꞌrannoha ikkiro, lowo yanna keeshshitanno mada  kalaqantanno. Yihowa minaanninna minaama mimmito hatto asse gawajjara dihasiꞌranno. Ikkollana hedittokki galtekki gawajjattoha ikkara dandaanno. Ati galtekki danchu garinni amadattoha lawahera dandaanno; kayinni galtekki tennera mayitanno? Coyiꞌrootto coyi galtekki gawajjannoha ikkiro, coyiꞌratto gara woyyeessiꞌrate maahoyye yaatto?—Galatiyu Sokka 5:15; Efesooni Sokka 4:31 nabbawi.

12. Adhantinorira Yihowa ledo noonsa jaalooma seekkara woy hunara dandaannori maati?

¹² Galtekki callichose heedheenna woy mannu noowa coyishiishattose gara, Yihowa laꞌꞌanno. (1 Pheexiroosi 3:7 nabbawi.) Yaiqoobi 1:26 togo yitanno: “Arrawosi  eemadhikkinni Magano magansiꞌreemmo yaanno manchi umosi doganno; isi magansiꞌra haafaho.”

13. Galtenke gawajjantara dandiitannoti wole doogo hiittenneeti?

¹³ Minaanninna minaama qoropha hasiissannonsahu wolu coyino no. Lawishshaho, wole meyate ledo lowo yanna sayisa hanafittoro minaamakkira mayi macciishshamannose? Hatto assattohu bushare hedde ikka hoogara dandaanno; lawishshaho soqqanshote yite woy qarru yannara kaaꞌlate yite ikkara dandaanno. Ikkollana galtekkira mayi macciishshamannose? Mitte Kiristaancho minaama togo yitino: “Minaanniꞌya songote giddo noote wole rodoo ledo duucha hige xaadannotanna ise aana illachishannota laeemma woyite lowo geeshsha dadilleemma. Tini aneneeto ajishe laeemma gede assitannoe.”

14. (a) Kalaqama 2:24te noo hedonni hiikkonne xintu halaale ronseemmo? (b) Ninkeneeto mayine xaꞌma hasiissannonke?

¹⁴ Kiristaana ikkinoommo daafira, annankenna amanke, hattono songote giddo noo roduuwanke towaata hasiissannonke. Ikkirono, adhammummo gedensaanni roore illachinsheemmohu minaanninke woy minaamanke aanaati. Yihowa minaanni “galtesi ledo mitto ikkanno” yiino. (Kalaqama 2:24) Galtenkera macciishshamannosere seekkine heda hasiissannonke. Ateneeto togo yite xaꞌmi: ‘Galteꞌya ledo yanna sayiseemmo? Ille wore towaateemmose? Qoleno hasiisannose baxille leellishanni noommo?’

15. Adhantinori minaamansa woy minaannansa ikkinokki manchiwa quwa saꞌe aana hasiissannonsakkihu mayiraati?

¹⁵ Minaannanke woy minaamanke ikkinokki manniwa quwa saꞌne aanneemmoha ikkiro, adhamanke giddo qarru kalaqamanno. Minaannanke woy minaamanke ikkitinokkita baxa hananfammora dandiineemmo. (Maatewoosi 5:28) Togoo baxilli lexxanni haꞌre adhamanke  shollishannore assate geeshsha massankera dandaanno.

16. Qullaawu Maxaafi adhanna adhamate daafira mayyee hajajanno?

¹⁶ Qullaawu Maxaafi, “Adhanna adhama baalunku ayirrisannota ikkito” yaanno, hattono “Ayiddaanninna ayiddaama mimmitoho ammananto” yaanno. (Ibiraawoota 13:4; Lawishsha 5:18) Adhanna adhamate ayirrinye leellishanna daafantannokki gede assa dandiineemmohu hiittoonniiti?

17. (a) Xaa yannara mannu soorro ma garinni laꞌꞌanno? (b) Kiristaanu soorro ma garinni laꞌꞌa hasiissannonsa?

¹⁷ Xaa yannara mitu manni galtete ammanama hooga qarra afidhino yee dihedanno. Ninke kayinni tini hedo daaffankera wodha dihasiissannonke. Yihowa foorrenna soorro effire giwannota xawise coyiꞌrino. (Roomu Sokka 12:9 nabbawi; Ibiraawoota 10:31; 12:29) Meessi galte ikkinokkihu ledo siimu xaadooshshe assa, adhanna adhama batteessitanno. Qoleno kuni assooti, Yihowa biddishsha harunsineemmokkita leellishanno; konni daafira Isi ledo noonke jaalooma daafanno. Konnira, foorrenniwa qole massannonke coyiwiinni nafa xeertiꞌra hasiissannonke. Lawishshaho, wolu manchi daafira amanyoote bainore heda qoropha hasiissanno.—Yaiqoobi 1:14, 15.

18. (a) Soorro kaphu maganna magansiꞌrate ledo mitte ikkitinohu hiittoonniiti? (b) Soorro Yihowa albaanni hiittoo cubbooti?

¹⁸ Hundi Israeelera uyinoonnihu Muse Seeri garinni, soorro shota ikkinokki cubbooti; isinni kaphu maganna magansiꞌrate ledo taalote. Soorrinohano ikko kaphu maganna magansiꞌrannoha shinanni. (Leewaawoota 20:2, 10) Soorro kaphu maganna magansiꞌrate ledo  mitte ikkitinohu hiittoonniiti? Mittu Israeelaawichi kaphu maganna magansiꞌrannoha ikkiro, Yihowara ammanameemmo yee eino qaale diiganno. Qoleno hakku manchi soorriro, galtesira ammanameemmo yee eino qaale diiganno. (Fulo 19:5, 6; Marro 5:9; Milkiyaasi 2:14 nabbawi.) Soorro hakkawaro Yihowa albaanni shota ikkinokki cubbo ikkitinota huwata dandiinanni.

19. Soorro qorophineemmo gede mayi kaaꞌlannonke?

¹⁹ Xaa yannarana? Ninke Muse Seera agadha hasiissannonkekkiha ikkirono, Yihowara soorrote daafira noosi lao disoorrantino. Kaphu maganna horonta magansiꞌneemmokkinte gede, galtenkera ammanama xeꞌinoreno horonta assa dihasiissannonke. (Faarso 51:1, 4; Qolasiyaasi Sokka 3:5) Togoore assinummoro, adhamankeno ikko Maganinke Yihowa ayirrinye hunneemmo.—Jeefote Hedo 26 lai.

20. Hayyo adhanna adhamate kaaꞌlitannohu hiittoonniiti?

²⁰ Mittimmaꞌne roore kaajjitanno gede assiꞌra dandaattohu hiittoonniiti? Maganu Qaali togo yaanno: “Mine hayyotenni minnanni; ogimmatenni uurrinsanni.” (Lawishsha 24:3) Minu qiidaranna onara woy iibbaranna hagiirru woꞌminoha ikkara dandaanno. Adhanna adhamano hattooti. Hayyichu manchi adhanna adhamasi teessinotanna hagiirru woꞌminota ikkitanno gede assiꞌranno.

21. Egenno adhanna adhama kaajjitanno gede assitannohu hiittoonniiti?

²¹ Qullaawu Maxaafi minu daafira lede togo yaanno: “Egenno heedhuro, wolambinaatu [muxxe] uduunninna jiro mine woꞌmitanno.” (Lawishsha 24:4) Maganu Qaali rosiisannoheri adhamakki seekkanno gede assanno. (Roomu Sokka 12:2; Filiphisiyusi Sokka 1:9) Minaamakki  ledo Qullaawa Maxaafanna borronke nabbabbinanni woyite, rossinoonni rosi garinni heeꞌra dandiitinanni gara hasaabbe. Mimmitoho baxille, shaqqillenna danchumma leellishshinanni doogga hasidhe. Adhanna adhamaꞌne kaajjitanno gedenna mimmito albinni roore baxxinanni gede assitanno akatta heedhannoꞌne gede kaaꞌlaꞌnera Yihowa huuccidhe.—Lawishsha 15:16, 17; 1 Pheexiroosi 1:7.

22. Minaanninkera woy minaamankera baxillenna ayirrinye leellisha hasiissannonkehu mayiraati?

²² Minaanninke woy minaamankera baxillenna ayirrinye leellishate dandiinummore baala assa hasiissannonke. Hatto ikkiro, adhanna adhamanke hagiirru woꞌminotanna mittimma noota ikkitanno. Roorenka kayinni, hatto assinummoro Yihowa hagiidhanno.—Faarso 147:11; Roomu Sokka 12:10.