1, 2. Sheexaanunna agaanintesi daafira maa afa hasiissannonke?

 YIHOWA qixxeessinote haaro alamera heeꞌneemmo heeshsho lowo geeshsha baxissannote. Hatte yannara, Maganu mannu oosora hedino heeshsho heeꞌneemmo. Xa heeꞌnoommo alame kayinni Sheexaanunna agaanintesi gashshitinote. (2 Qorontoosi 4:4) Insa illetenni laꞌꞌa hoongummorono insa nooreeti; qoleno wolqaataammaho.

² Konni birxichira, Yihowawa shiqqi yine heeꞌranna Sheexaanu abbanno gawajjonni umonke agadha dandiineemmohu hiittoonniitiro ronseemmo. Yihowa kaaꞌleemmoꞌne yee qaale einonke. Ikkollana Sheexaanunna agaanintesi ninke soꞌrisiisatenna gawajjate horoonsidhanno hayyo afa hasiissannonke.

3. Sheexaanu ninke ma assa hasiꞌranno?

³ Sheexaanu, mannu ooso Yihowa magansidhannohu uminsa qiniitiraati yee yekkeeramanno; qoleno mannu qarramiro Yihowara soqqama aguranno yiino. (Iyyoobi 2:4, 5 nabbawi.) Mittu manchi Yihowa daafira rosa hasiꞌranno woyite, Sheexaanunna agaanintesi tenne hoolate sharrantanno. Qoleno mittu manchi heeshshosi Yihowara sayise oye cuuamanno woyite insa hanqitanno. Qullaawu Maxaafi Daawuloosi ‘ittananno doobbiichi gede’ ikkinota kulanno. (1 Pheexiroosi 5:8) Sheexaanu  Yihowa ledo noonke jaalooma huna hasiꞌranno.—Faarso 7:1, 2; 2 Ximootewoosi 3:12.

4, 5. (a) Daawuloosi assa dandaannokkiri maati? (b) ‘Daawuloosi giwate’ yaa mayyaate?

⁴ Ikkollana Sheexaanenna agaanintesi waajja dihasiissannonke. Yihowa wolqansara danna worino. Yihowa “lowo daga” ikkinohu addu Kiristaani “bayira qarra” qeele saꞌꞌannota coyiꞌrino. (Yohaannisi Ajuuja 7:9, 14, NW) Sheexaanu kuni ikkannota hoole diafanno; korkaatuno Yihowa mannasi agaranno.

 ⁵ Yihowawa gamba yine heeꞌnummoro, Sheexaanu Maganu ledo noonke jaalooma huna didandaanno. Maganu Qaali, “Kiꞌne Kaaliiqi ledo heedhiniro, isino kiꞌne ledo heeꞌranno” yaanno. (2 Duduwo 15:2; 1 Qorontoosi 10:13 nabbawi.) Abeeli, Heenooki, Nohi, Saara, Musenna ammanaminohu wolu batinyu biꞌree manni Yihowawa shiqqi yee heeꞌransanni Sheexaane giwino. (Ibiraawoota 11:4-40) Ninkeno hatto assa dandiineemmo. Maganu Qaali, “Daawuloosi . . . gibbe; isino kiꞌnewiinni fafanno” yaannonke.—Yaiqoobi 4:7.

6. Sheexaanu gawajjankera woꞌnaalannohu hiittoonniiti?

⁶ Sheexaanu, Yihowa wolqasira danna worinota afinoha ikkirono, Maganu ledo noonke jaalooma hunate dandaamisire baala assanno. Yannankera Sheexaanu duucha doogganni gawajjankera woꞌnaalanno; isi hundinni kayise tenne dooggasi horoonsiꞌranni keeshshino. Isi horoonsiꞌranno hayyo giddo mite hiittenneeti?

7. Sheexaanu Maganu manna gawajjate woꞌnaalanni noohu mayiraati?

⁷ Soqqamaasinchu Yohaannisi alame “gudisante bushunni amadantino” yee borreessino. (1 Yohaannisi 5:19) Sheexaanu tenne busha alame gashshinonte gede, Maganu mannano baxi gede assa hasiꞌranno. (Mikiyaasi 4:1; Yohaannisi 15:19; Yohaannisi Ajuuja 12:12, 17) Daawuloosi gattinosi yanna shiima ikkitinota afino daafira, ninke mittu mittunku Maganoho ammanammeemmokki gede assate sharramanni no. Isi mite yannara xaaddotenni siankera dandaanno; wole woyite kayinni goꞌle gawajjankera woꞌnaalanno.

8. Mittu mittunku Kiristaanchi maa huwata hasiissannosi?

⁸ Efesooni Sokka 6:12 (NW), “Sharrammeemmohu . . . iimiidi basera noori busha ayyaanna ledooti” yitanno.  Mittu mittunku Kiristaanchi Daawuloosinna agaanintete ledo olamanni woy sharramanni no. Heeshshonsa Yihowara sayisse uyitinori baalunku konne ola olantanni noota qaaga hasiissannonke. Soqqamaasinchu Phaawuloosi Efesooni songora borreessino sokka giddo Kiristaanu ‘kaajje uurranno’ gede sase hige jawaachishino.—Efesooni Sokka 6:11, 13, 14.

9. Sheexaanunna agaanintesi ninke ma assate woꞌnaaltanno?

⁹ Sheexaanunna agaaninte babbaxxitino doogganni soꞌrisiissankera woꞌnaaltanno. Mitte doogonni Sheexaane qeelloommo yaa, isi wole doogonni diqeelannonke yaa diꞌꞌikkitino. Daawuloosi ninke woshshaadate, balaxe laanfenke bade afate woꞌnaalanno. Qullaawu Maxaafi Sheexaanu horoonsiꞌranno woshshaado kulannonke daafira, isi woshshaadonni gata dandiineemmo. (2 Qorontoosi 2:11; Jeefote Hedo 31 lai.) Sheexaanu horoonsiꞌranno hayyo giddo mittu agaanintete loosooti.

10. (a) Agaanintete loosi maati? (b) Yihowa agaanintete looso ma garinni laꞌꞌanno?

¹⁰ Bushu ayyaani ledo xaadooshshe afiꞌrinohu mannu wolqara aleenni ikkino coyi baalu agaanintete loosooti; kuri giddo mitu kiiloho, bitate, digintetenna reyitinore coyishiishate. Qullaawu Maxaafi agaanintete loosi ‘busha’ ikkinota kulannonke; qoleno mittu manchi kawaanni agaanintete ledo xaadooshshe afiꞌrino coye assanni kaꞌaanni Yihowa magansiꞌra didandaanno. (Marro 18:10-12; Yohaannisi Ajuuja 21:8) Kiristaanu agaanintete ledo xaadooshshe afiꞌrino coyi baalunkuwiinni xeertiꞌra hasiissannonsa.—Roomu Sokka 12:9.

11. Mannu wolqara aleenni ikkino coye afate quqquxama mamira qolte massitankera dandiitanno?

¹¹ Sheexaanu mannu wolqara aleenni ikkino coye banxeemmota  afiro, ninke agaanintete loosiwa qole xixxiiwa shota ikkitannosi. Agaanintete loosi baalunku Yihowa ledo noonke jaalooma hunanno.

12. Sheexaanu mannu hedo daafate woꞌnaalannohu hiittoonniiti?

¹² Sheexaanu mannaho coye gurcheessate woꞌnaalanno. Isi mannu wodanira sunu sununni huluullo kalaqe, “busha danchaho; dancha bushaho” yite heddanno gede assanno. (Isayaasi 5:20) Daawuloosi, ‘Qullaawu Maxaafi amaale kaaꞌlitannori dino,’ hattono ‘Maganu biddishsha diingummoro roore hagiirraamma ikkineemmo’ yine hendammora hasiꞌranno.

13. Sheexaanu huluullo kalaqate woꞌnaalinohu hiittoonniiti?

¹³ Sheexaanu roorse horoonsiꞌranno hayyo giddo mitte huluullo kalaqate. Isi tenne hayyo lowo diro horoonsiꞌranni keeshshino. Isi Edenete kaashshu basera, “Halaalintanni Maganu Edeni Gennetete noo haqqe baalante laalo ittinannikki gede hoolinoꞌneni?” yee Heewani wodanira huluullo kalaqate woꞌnaalino. (Kalaqama 3:1) Iyyoobi warono Sheexaanu sokkaasinete albaanni Yihowa, “[Iyyoobi] atewiinni mitore afiꞌra hoogoommero ayirrisannoheha lawihe?” yee xaꞌmino. (Iyyoobi 1:9) Yesuusi cuuami gedensaanni Sheexaanu iso, “Hanni ati Maganu Beettootiro, tini kinna timma ikkitanno gede hajaji” yee jifinosi.—Maatewoosi 4:3.

14. Sheexaanu, mannu agaanintete loosi gawajjannota huluullamanno gede assannohu hiittoonniiti?

¹⁴ Yannankerano Sheexaanu huluullo kalaqa diagurino. Isi mitu agaanintete loosi qarra afiꞌrinokkihu gede asse shiqishe mannu kuni loosi busha ikkinota huluullamanno gede assate woꞌnaalanno. Mitu Kiristaani nafa tenne woshshaadonni qeelamino. (2 Qorontoosi 11:3) Ikkina umonke tenne woshshaadonni agadhate maa assa  dandiineemmo? Sheexaanu xagarronni qeelammeemmokki gede mayi kaaꞌlannonke? Hanni Sheexaanu goꞌle gawajjankera woꞌnaalannota lame doogga laꞌno. Insano boohaarshahonna xagisiꞌnanni ogimmaati.

15. Boohaarshu widoonni agaanintete loosira karsammammora dandiineemmohu hiittoonniiti?

¹⁵ Xaa yannara batinye filmera, viidiyora, televizhiinete pirogiraamera, godoꞌleranna interneetete webisayitera agaanintete loosi, digintenna mannu wolqara aleenni ikkino coyi woꞌmino. Batinyu manni kuri coyibba mittoreno gawajjitannokki godoꞌle gede asse hedanno; qoleno agaaninte heeshshonsa gawajjitanno gara diwodanchanno. Qoleno mittu manchi kaayyo layiꞌrannoha, saadate hellee laꞌꞌannoha, ceate huuro layiꞌrannohanna wole togoo coye assannoha ikkiro agaanintete loosira karsamanni no. Daawuloosi togoo coyibba abbitanno gawajjo maaxe, afate quqquxanno coyinna hagiirsiisannori gede asse shiqishanno. Mittu manchi, ‘Ani hakko coye assa hoogummo geeshsha, agaanintete coye woy mannu wolqara aleenni ikkinore laꞌꞌanni boohaarummoro qarru dino’ yee hedara dandaanno. Ikkollana hatto yee heda buutote qarra abbitanno yineemmohu mayiraati?—1 Qorontoosi 10:12.

16. Digintete ledo xaadooshshe afiꞌrino boohaarshiwiinni xeertiꞌra hasiissannonkehu mayiraati?

¹⁶ Sheexaanunna agaanintesi wodaninke hedo afa didandiitanno. Ikkollana ninkeneetiranna maatenkera doodhineemmo doorsha, lawishshaho doodhineemmo boohaarsha laꞌe hasattonkenna hedonke afa dandiitanno. Ayyaannate ledo xaadisanno mannire, digintennire, agaaninte eꞌino mannire, woy wolu agaanintete loosire  leellishshanno filme, muuziiqa woy maxaafa doodhineemmoha ikkiro, Sheexaanunna agaaninte togoo coyibba banxeemmota huwattanno. Hakkiinni insa albinni roore agaanintete loosira eꞌneemmo gede assate woꞌnaaltanno.—Galatiyu Sokka 6:7 nabbawi.

17. Sheexaanu fayyimmanke agadhate noonke hasatto horoonsiꞌrara dandaannohu hiittoonniiti?

¹⁷ Sheexaanu fayyimmanke agadhate noonke hasattono horoonsiꞌrate woꞌnaalanno. Xaa yannara lowo manna dhibbu waadannonsa. Mittu manchi dhibbisinni hurate sharramannoha ikkirono, hurre hoogara dandaanno. (Maarqoosi 5:25, 26) Togoo manchi hexxo mudhe xagicho ikkanno yinannire baala woꞌnaalate geeshsha  iillara dandaanno. Ikkollana Kiristaana ikkinoommo daafira, digintete ledo xaadooshshe afidhino xagga adhineemmokki gede qoropha hasiissannonke.—Leewaawoota 19:31.

18. Kiristaanu hiittoo xagga adha dihasiissannonsa?

¹⁸ Hunda Israeelete yannara digintete coye horoonsidhannori no. Yihowa insa togo yiinonsa: “Angaꞌne huuccattote anewa qoltinirono caaqqi yee dilaeemmoꞌne. . . . Aye geeshshano huuccidhineenna dimacciishsheemmoꞌne.” (Isayaasi 1:15) Yihowa insara huuccattonsa nafa dimacciishshanno! Yihowa ledo noonke jaalooma hunannonna roorenkanni dhiwammeemmo woyite Isi kaaꞌlannonkekki gede assanno coye assa dihasiꞌneemmo. (Faarso 41:3) Konni daafira, mitto xagicho adhinammora albaanni agaanintete coyi ledo xaadooshshe afiꞌrinoronna teꞌee buuxa hasiissannonke. (Maatewoosi 6:13) Hakku xagichi agaanintete coyi ledo xaadooshshe afiꞌrara dandaannoha ikkiro, hakkonne xagicho adha dihasiissannonke!—Jeefote Hedo 32 lai.

19. Daawuloosi batinyu manni waajjannosi gede assannohu hiittoonniiti?

¹⁹ Mitu manni Daawuloosinna agaaninte mannu hedonsanni kalaqinooreetilla yee hedanno; wolootu kayinni heeshshonsa giddo laꞌino coyinni kainohunni Daawuloosinna agaaninte noota affino. Batinyu manni busha ayyaanna waajje huxiꞌranno; qoleno kaire baala layiꞌranni qarramanno. Mitootu kayinni agaaninte assitinoha waajjishanno coye kultanni mannu agaaninte waajjanno gede assitanno. Mannu duucha woyite togoo coyi dhagge ikkannonsa daafira, woleho odeessanno. Togoo xagge mannu Daawuloosi waajjanno gede assitanno.

20. Mittu manchi Sheexaanu kapho tareessara dandaannohu hiittoonniiti?

 ²⁰ Hanni hedi: Sheexaanu mannu waajjasira hasiꞌranno. (2 Teselonqe 2:9, 10) Isi agaanintete coye baxanno manna soꞌrisiise ikkinokki coye ammantanno gede assanno gara afino. Togoo manni maalaꞌlinanni coye lainotanna macciishshinota kulara dandaanno. Togoo xagge duucha hinge hasaambanni woyite, nookki coyi lexxara dandaanno. Ninke kayinni togoo hasaawa tareessine, Sheexaanu manna waajjishiishanno gede kaaꞌla dihasiꞌneemmo.—Yohaannisi 8:44; 2 Ximootewoosi 2:16.

21. Agaaninte assitinore hasaawa agurre, mayi daafira hasaawa dandiineemmo?

²¹ Mittu Yihowa Farciꞌraasinchi alba digintete loosi ledo xaadooshshe afiꞌrinore assannoha ikkiro, manna ososhshiishate yee xa togoore hasaawa dihasiissannosi. Yihowa soqqamaasine Sheexaanunna agaanintesi assitara dandiitannore heddanni waajja dihasiissannonsa. Hatteentenni Yesuusinna Yihowa wolqa aana illachishshanno. (Ibiraawoota 12:2) Yesuusi agaaninte assitinore kulanni rosaanosi diososhshiishino. Isi Maganu Mangisterenna “Maganunniha jawa looso” duduwino.—Soqqamaasinete Looso 2:11; Luqaasi 8:1; Roomu Sokka 1:11, 12.

22. Maa assate murciꞌrootto?

²² Sheexaanu Yihowa ledo noonke jaalooma huna hasiꞌrannota hamboonke. Isi hatto assate dandaamisi geeshsha sharramanno. Ikkollana Daawuloosi xagarro anfoommo; hattono duuchunku gariha agaanintete looso giwate murciꞌnoommo. Sheexaanu Yihowa ledo noonke jaalooma hunara ‘faro diuyineemmo.’ (Efesooni Sokka 4:27 nabbawi.) Daawuloosi gimbummoro, isi woshshaado giddo diumbeemmo; qoleno Yihowa agarooshshe afiꞌneemmo.—Efesooni Sokka 6:11.