Gannate xa heeˈneemmo alamenni baxxitinote. Uullate aana buutote qarri, dadillunna xisso woˈmitara Maganoho hasatto dinosi. Maganu konni albira uulla gannate assanno. Gannate maricho labbanno? Hanni Qullaawu Maxaafi yaannota laˈno:

Dancha manna. Gannate Maganu jaalla teesso ikkitanno. Kuˈu koˈonnira danchare assitanno. Maganu qullaambete fushshino seeri garinni heedhanno.—Lawishsha 2:21.

Intanniri woˈmanno. Gannatete giddo hude diheedhanno. Qullaawu Maxaafi, “Uullate aana gidu woˈmanno” yaanno.—Faarso 72:16.

Biifado minenna hagiirsiisanno looso. Gannate ikkitanno uullara, mitte mittente maatera minu heeˈrannonsa. Mittu mittunku manchi loosanno loosinni hagiirre afiˈranno.—Isayyaasi 65:21-23.

Alamete doyichora keere ikkanno. Olunni mimmito qasannohunna reyannohu diheeˈranno.  Maganu Qaali, “[Maganu] ola uurrisanno” yaanno.—Faarso 46:8, 9.

Dancha ordu keere. Qullaawu Maxaafi, “[Gannatete] heedhannori giddo mittuno ‘Xissinoe’ yaannohu dino” yaanno. (Isayyaasi 33:24) Ledeno laanshaawa, ballicha, duuddichanna babbicha ikkannohu diheeˈranno.— Isayyaasi 35:5, 6.

Xisso, dadillunna reyo diheedhanno. Maganu Qaali: ‘Hindiiddo duucha illensa aaninni feyanno; reyo woy dadillu woy wiˈla woy dhibbu konni kaˈira diheeˈranno. Hakkuno mayiraati? Albi coyi budi sainohuraati’ yaanno.—Ajuuja 21:4.

Bunshe assitannori diheedhanno. Yihowa, “Bunshe giddonsa woˈmitinori uullate aana diheedhanno; cubbaataammuno uullate aaninni xoqolantanno” yitanno hexxo uyino.—Lawishsha 2:22.

Mannu baxamannonna mimmito ayirrisanno. Albillitte halaalaancho yoo hooga, gadadaaˈma, honqooqimmanna mimmito giwa diheedhanno. Mannu mittimmatenninna Maganu fushshinohu qullaambete seerinni sumuu yee heeˈranno.—Isayyaasi 26:9.