Maganu jaala ikka hasiˈrittoro, Magano hagiirsiissanno ammaˈna harunsa hasiissannohe. Yesuusi ‘halaalunni magansidhannori’ Magano, “halaalu” ledo sumuu yaanno garinni magansidhanno yiino. (Yohaannisi 4:23, 24) Magano halaalunni magansiˈnanni doogo mitte callate. (Efesooni 4:4-6) Halaalaancho ammaˈna hegere heeshshowa massagganno, kaphu ammaˈna kayinni baote widira massagganno.—Maatewoosi 7:13, 14.

Harunsanno manna laˈe halaalaancho ammaˈna badde afa dandaatto. Yihowa dancha ikkinonte gede, iso halaalunni magansidhannorino dancha ikka hasiissannonsa. Dancha abukaatote haqqicho dancha abukaatote guma laaltannonte gede, halaalaancho ammaˈnano dancha manna laaltanno.—Maatewoosi 7:15-20.

Yihowa jaalla Qullaawa Maxaafa lowo geeshsha ayirrissanno. Qullaawu Maxaafi Maganu ayyaaninni borreessaminota ammantanno. Konni daafira heeshshonsa massagara, qarransa tidhate aanno amaale loosu aana hosiisatenna Maganunnire rosate kaaˈlannonsa gede fajjaameeyyete. (2 Ximootewosi 3:16) Mannaho rosiissannore loosu aana hosiisate woˈnaaltanno.

 Yihowa jaalla insa insaneewa baxantanno. Yesuusi Maganunnire rosiisenna xiwantinore hurse, mannaho baxillu noosita leellishino. Halaalaancho ammaˈna harunsitannori hattonni woloota baxxanno. Yesuusi gede insano buxane woy wole gaˈre ikkitinore woffi assite dilaˈanno. Yesuusi rosaanosi mannu bade afannohu mereeronsa heeˈranno baxillinniiti yiino.—Yohaannisi 13:35.

Maganu jaalla, Yihowa yaamamannoha suˈmasi ayirrissanno. Suˈmakki woshsha hasiˈrannokki manchi muli jaala ikkahera dandaanno? Didandaanno! Jaalu heeˈrinkero suˈmasi gana diginbeemmo; isinni konni jaalinke danchumma wolootaho kulleemmo. Hattonni Maganu jaalla ikkitara hasidhannori suˈmasi horoonsiˈranna wolootahono isire duduwa hasiissannonsa. Yihowa hatto assinammora hasiˈranno.—Maatewoosi 6:9; Roomu Sokka 10:13, 14.

Yesuusi gede, Maganu jaalla mannaho Maganu Gashshootire rosiissanno. Maganu Gashshooti uulla gannate assannoho iimi gashshooteeti. Maganu jaalla konne Maganu Gashshootiha dancha duduwo wolootaho dudubbanno.—Maatewoosi 24:14.

Yihowa Farciˈraasine Maganu jaalla ikkate woˈnaaltanno. Qullaawa Maxaafa ayirrissanno, hattono mimmitu ledo baxantanno. Leddeno Maganu suˈma horoonsidhannonna ayirrissanno, Maganu Gashshootireno wolootaho rosiissanno. Yannankera uullate aana halaalaancho ammaˈna harunsitanni noori Yihowa Farciˈraasineeti.