Sheexaanunna durriissasi Maganoho soqqamattota dibaxxanno. Dandiitoommero ayiino Maganoho soqqamannokki gede assa hasidhanno. Konne assate woˈnaaltannohu hiittoonniiti? Mitte doogo kaphu ammaˈnaati. (2 Qorontoosi 11:13-15) Mitte ammaˈna Qullaawu Maxaafi halaale rosiisa hoogguro kaphu ammaˈnaati. Kaphu ammaˈna lawisiinse loonsoonnihu kaphu woxi gedeeti. Laˈnanni wote halaalaancho woxe lawanno, ikkollana waagu dinosi. Konni daafira buutote qarri giddo tugahera dandaanno.

Kaphu ammaˈna halaalu Magano ikkinoha Yihowa dihagiirsiissanno. Yesuusi uulla noo yannara shitasira hasidhinori ammaˈnate gaamo no. Harunsitanno ammaˈna halaale labbe leellitinonsa. “Mittu anni noonke isino Maganoho” yiturono, Yesuusi yaattonsanni sumuu yino? Diyino! Yesuusi insara, ‘Kiˈne anniˈne Daawuloosi oosooti’ yee dawarinonsa. (Yohaannisi 8:41, 44) Yannankera batinyu manni halaalaancho Magano magansiˈrannoha lawinsarono, magansiˈranni noohu Sheexaanenna durriissasiiti!—1 Qorontoosi 10:20.

 Busha haqqicho busha guma laaltannonte gede, kaphu ammaˈnano bunshe assanno manna laaltanno. Bunshe assanno manni korkaatinni alamenkera qarru woˈmino. Konninni kainohunni alamenkera amanyootu baˈne, olu, mooru, gadadunna giddeesse bushiishanno manni no. Konne assitannori roore anga ammaˈna noonsareeti; ikkollana, ammaˈnansa danchare assate dikakkayissinonsa. Konne assootensa agura hoogguro Maganu jaalla ikka didandiitanno.—Maatewoosi 7:17, 18.

Kaphu ammaˈna mannu huuccatto kaphu magannaranna misillate shiqishiˈranno gede rosiissanno. Maganu kaphu magannaranna misillate huuccatto shiqishidhinoonte yiino. Kuni hasiisannoreeti. Mittu manchi ate agure fotokki ledo calla hasaawara hasiˈriro hagiirsiisannohe? Kuni manchi halaalaancho jaalakki ikkanno? Diˈˈikkanno. Yihowa mannu heeshsho noosikki uduunnichi woy misile ledo ikkikki isi umisi ledo hasaawara hasiˈranno.—Wolaphpho 20:4, 5; 1 Yohaannisi 5:21.

Kaphu ammaˈna olu yannara manna shaa soˈro ikkitinokkita rosiissanno. Yesuusi Maganu jaalla mimmitu ledo baxantannota coyiˈrino. Manna banxeemmohura dishineemmo. (Yohaannisi 13:35) Bunshe assitannore nafa shaa soˈrote. Yesuusi diinnasi amaddasira daggu wote rosaanosi iso gatisate yite olantara difajjino.—Maatewoosi 26:51, 52.

Kaphu ammaˈna bunshe assanno manni sioolete giira eˈˈe fooggalanno yite rosiissanno. Ikkollana, Qullaawu Maxaafi cubbu reyonniwa massannota rosiisanno. (Roomu Sokka 6:23) Yihowa baxillu Maganooti. Baxillu Magani mannu hegerera fooggalanni heeˈranno gede assanno? Horonta diassanno! Gannatete giddo Yihowa hagiidhannoti mitte ammaˈna calla heedhanno. (Ajuuja 15:4) Sheexaanu kaphi aana xintantinoti baalanti kaphu ammaˈna baˈanno.