Maganu jaala ikkate, isire rosa hasiissannohe. Jaallakki suˈmakki affino? Hattono suˈmikkinni woshshitannohe? Ee woshshitannohe. Hatteente gede, Maganu suˈmasi afattoranna ganattora hasiˈranno. Suˈmisino Yihowaati. (Faarso 83:18; Maatewoosi 6:9) Hakkii saeno baxannorenna giwannore rosa hasiissannohe. Jaallasinna diinnasi badde afa hasiissannohe. Mitto mancho seekke afate yanna hasiissanno. Qullaawu Maxaafi Yihoware yanna adhine rosa busullete yaanno.—Efesooni 5:15, 16.

Maganu jaalla iso hagiirsiisannore assitanno. Hanni jaallakkire hedi. Jaallakkira busha akata leellishattoha ikkironna baxxannokkire assattoha ikkiro jaaloomiˈne sufanno? Disufanno. Hattonni, Maganu jaala ikkate, iso hagiirsiisannore assa hasiissannohe.—Yohaannisi 4:24.

Maganu ledo jaaloonsiissannoheti dibaalanti ammaˈnaati. Maganoho muli jaali Yesuusi lame doogore coyiˈrino. Mitte doogo halaˈladotenna lowo manni haˈrannote. Goofimarchiseno baote. Wole doogo kayinni ruukkashshotenna shiimu manni haˈrannote. Tini doogo hegere heeshshowa massitannote. Togo yaano Maganu ledo jaalooˈma hasiˈrittoro iso magansiˈnannita halaalaancho doogo badde afate rosa hasiissannohe yaate.—Maatewoosi 7:13, 14.