Yannankera uullate aana nooti busha ikkito, uulla gannate ikkitanno yanna mule noota leellishshanno. Qullaawu Maxaafi tini uulla gannate ikkitara albaanni qarrissanno yanna heedhannota kulanno. Xa heeˈnoommohu hattee yanna giddooti! Qullaawu Maxaafi ikkanno yiinori giddo mito mito laˈno:

Lowo oli. “Gosa gosate aana gashshootu gashshootu aana ola kayisanno.” (Maatewoosi 24:7) Tini masaalo woˈmitino. Lamu alamete doyichcho olinninna shiimmaaddu olinni 1914 hanafe miliyoonete kiirranni manni goofino.

Xissote halaˈla. ‘Woˈma bayicho kakkadiishshu xibba ikkanno.’ (Luqaasi 21:11) Tini masaalona woˈmitino? Ee woˈmitino. Kaansere, wodanu xisso, shombu baalaami, shekkeere, Eediisi xiwaninna wolu dhibbi lowo miliyoone ikkanno manna gudino.

Hude. Alamete doyichora rooru manni itannota ikkado sagale diafiˈrino. Miliyoonete kiirranni manni diru dirunkunni hudete kainohunni reyanno. Kunino uulla muli yanna giddo gannate ikkitannota leellishanno malaateeti. Qullaawu Maxaafi ‘Addi addi darga hudeno ikkanno’ yaanno.—Maarqoosi 13:8.

 Uullate huxano. ‘Addi addi darga baattono milli yitanno.’ (Maatewoosi 24:7) Kunino yannankera ikkinoreeti. Uullate huxanonni 1914 hanafe mitte miliyoone saino manni goofino.

Bunshe woˈmitino manni. Mannu ‘umonsa baxxannore ikkannonna woxe baxxannore, Maganunni roorsite jiro baxxannore ikkitanno.’ Ooso ‘iltinonsarira hajajantannokkire’ ikkitanno. (2 Ximootewosi 3:1-5) Yannankera duuchu manni togoo akati noosiho yiniro sumuu diyaatto? Maganoho ayirrinyu dinonsa, hattono Maganunnire rosate woˈnaaltannore qarrissanno.

Jaddo. Ledeno “Bunshete batinyi” ikkanno. (Maatewoosi 24:12) Jaddo saˈu dirranni roore yannankera baasa ikkitino yiniro sumuu yiittokki digatatto. Ayewano heeˈranno manni woxe mulqamara, dogamaranna gawajjamara dandaanno.

Kuni duuchunkuri Maganu gashshooti daa rahinota leellishanno. Qullaawu Maxaafi: “Kuni coyi ikkanna laˈiniro Maganu gashshooti gamba yinota egentinanni” yaanno. (Luqaasi 21:31) Maganu gashshooti yaa mayyaate? Tenne uulla gannate assannoho iimi gashshooteeti. Mannu gashshooti Maganu gashshootinni riqiwamanno.—Daanieeli 2:44.