ROSO 10
Halaalaancho Ammaꞌno Badde Afa Dandaattohu Hiittoonniiti?
1. Halaalaancho ammaꞌno meꞌꞌete?
“Kaphu masaalaano qorophe.”—MAATEWOOSI 7:15.
Yesuusi harunsaanosira mitte halaalaancho ammaꞌno calla rosiisino. Togoo ammaꞌno hegere heeshshowa massitanno doogooti. Yesuusi hatte doogora “haꞌrannohu boode manna” ikkinota coyiꞌrino. (Maatewoosi 7:14) Magano hagiirsiissannoti Qaalisi ledo yaano Qullaawu Maxaafi ledo sumuu yitanno ammaꞌno callate. Magano halaalunni magansidhannori baalunkura mittu gari ammana noonsa daafira mereeronsa mittimma no.—Yohaannisi 4:23, 24; 14:6; Efesooni 4:4, 5 nabbawi.
Baalanti Ammaꞌno Magano Hagiirsiissanno? yitanno viidiyo lai.
2. Yesuusi kaphu Kiristaanire mayino?
“Magano anfoommo yite faajjete coyidhanno; ikkollana loosinsanni kaaddannosi.”—TITO 1:16.
Yesuusi kaphu masaalaano Kiristinnu ammaꞌno booreessitannota coyiꞌrino. Insa iimi adda laꞌniro Magano halaalunni magansidhannore labbanno. Beetekiristaannansa ninke Kiristaanaho yitanno. Ikkollana halaalaancho ayimmansa badde afa dandaatto. Hiittoonni? Xabbe leeltannota dancha akattanna amanyoote afiꞌrinoha halaalu Kiristaana laaltannoti halaalaancho ammaꞌno callate.—Maatewoosi 7:13-23 nabbawi.
3. Magano halaalunni magansidhannore hiittoonni bada dandaatto?
Hanni bade afate kaaꞌlannoha onte malaate laꞌno:
-
Magano halaalunni magansidhannori Qullaawu Maxaafi Maganu Qaale ikkinota ammantanno. Togoo manni Qullaawu Maxaafi biddishshi garinni heeꞌrate sharramanno. Konni daafira halaalu ammaꞌno mannu woganni heedhanno ammaꞌnowiinni baxxitinote. (Maatewoosi 15:7-9) Magano halaalunni magansidhannori kawaa wolere sabbakkanni kaꞌaa wolere diassitanno.—Yohaannisi 17:17; 2 Ximootewosi 3:16, 17 nabbawi.
-
Yesuusa halaalunni harunsitannori Yihowa yinanniha Maganu suꞌma ayirrissanno. Yesuusi Maganu suꞌma mannaho kule konne suꞌma ayirrisannota leellishino. Isi mannu Magano afanno gede rosiisino, hattono Maganu suꞌmi qullaawa ikkanno gede huuccidhara rosiisino. (Maatewoosi 6:9) Kiꞌne qooxeessira Maganu suꞌma mannaho kultannoti hiittee ammaꞌnooti?—Yohaannisi 17:26; Roomu Sokka 10:13, 14 nabbawi.
-
Halaalu Kiristaani Maganu Mangistere sabbakanno. Maganu Yesuusa uullara soyinohu Mangistesiha dancha duduwo duduwanno gedeeti. Mannu ooso hexxo Maganu Mangiste callate. Yesuusi tenne Mangistere reyi barri geeshsha mannaho kulino. (Luqaasi 4:43; 8:1; 23:42, 43) Isi harunsaanosi tenne Mangistere sabbakkannota coyiꞌrino. Mittu manchi noottowa daye Maganu Mangistere kulihero, kuni manchi hiitte ammaꞌno wido lawannohe?—Maatewoosi 24:14 nabbawi.
-
Yesuusa harunsitannori tenne busha alame wido diꞌꞌikkitino. Togoo manni poletikahonna dagoomu gaarira anga wodha giwansanni egennaminoho. (Yohaannisi 17:16; 18:36) Qoleno togoo manni busha alamete assootenna ikkito diharunsanno.—Yaaqoobi 4:4 nabbawi.
-
Halaalaanchu Kiristaani mereero baxxino baxilli no. Insa baalanta gaꞌre ayirrissanno gede assanno roso Qullaawu Maxaafinni rossino. Kaphu ammaꞌno gosate mereero kaꞌꞌanno olira karsantanni keeshshitino; Magano halaalunni magansidhannori kayinni togoorinni xeertidhanno. (Mikkiyaasi 4:1-3) Halaalaanchu Kiristaani uminsa hasattonni roorse yannansanna miinjansa woloota kaaꞌlatenna jawaachishate horoonsiꞌranno.—Yohaannisi 13:34, 35; 1 Yohaannisi 4:20 nabbawi.
4. Halaalaancho ammaꞌno hiitteetiro bada dandaatto?
Maganu Qaali yaannore calla rosiissannoti, Maganu suꞌma ayirrissannotinna mannu ooso hexxo Maganu Mangiste calla ikkitinota sabbakkannoti hiitte ammaꞌnooti? Mereeronsa baxillu noorinna olaho anga wodhitannokkiri ayeooti? Atera ayeoo labbannohe?—1 Yohaannisi 3:10-12 nabbawi.
