Halaalaanchu Magani kalaqama baalaho Kalaqaanchoho. Isira hanafono gawalono dinosi. (Faarso 90:2) Qullaawu Maxaafi giddo nooha dancha duduwo coyiꞌrinohu isooti. (1 Ximootewosi 1:11) Kalaqinonkehu iso ikkino daafira, magansiꞌra hasiissannonkehu iso callaati.​—Ajuuja 4:11 nabbawi.

 Maganu Ayyaana ikkinohura iso illetenni lae egennino manchi dino; isi heeshsho maala uddiꞌre uullate aana heeꞌranno manninni lowonta roorete. (Yohaannisi 1:18; 4:24) Ikkollana Maganu kalaqinore laꞌnummoro akattasi buuxa dandiineemmo. Lawishshaho, addi addi dani laalonna daraaro baxillesinna ogimmasi kultannonke. Kalqete alame halaꞌlinyi wolqasi huwanteemmo gede assannonke.​—Roomu Sokka 1:20 nabbawi.

 Qoleno Qullaawa Maxaafa xiinxallinummoro Maganu akattare lowore ronseemmo. Lawishshaho, Qullaawu Maxaafi Maganu baxannorenna giwannore kulannonke; hattono Isi manna ma garinni amadannoronna mittu coyi tuncu yaannosi woyite ma assannoro kulannonke.​—Faarso 103:7-10 nabbawi.

 Yesuusi togo yiino: “Iima heeꞌratto Annanke, suꞌmikki qullaawa ikko.” (Maatewoosi 6:9) Maganoho addi addihu maaragete suꞌmi noosiha ikkirono, suꞌmisi mittoho. Konne suꞌma gannanni gari mannu coyiꞌranno afii garinni babbaxxanno. Sidaamu afiinni “Yihowa” yine woshshinanni.​—Faarso 83:18 nabbawi.

 Mannu Maganu suꞌma Qullaawu Maxaafi giddonni fushshe hoole, hakko bayicho maaragete suꞌmuwa yaano Mootichanna Magano yinanni suꞌmuwa worino. Hunda Qullaawa Maxaafa borreessini waro Maganu suꞌma Qullaawu Maxaafi giddo mito  7,000 hinge borreessinoonni. Yesuusi mannaho Maganunnire rosiisi woyite mannu Maganu suꞌma afanno gede assino.​—Yohaannisi 17:26 nabbawi.

 Maganoho Suꞌmu Noosi? yitanno viidiyo lai.

 Gobba gosa woꞌmino qarri Yihowa ninkera dihedannoho yineemmo gede assannonkeni? Mitu manni, isi qarrammeemmo gede assannonkehu ninke fonqolara yeeti yaanno; hatto yaa kayinni digaraho.​—Yaaqoobi 1:13 nabbawi.

 Maganu, mannu ooso mitto coye uminsa doodhitanno gede asse kalaqinonsa. Ninke iso banxe magansiꞌneemmo gede doodhate dandoo uyinonke daafira iso galata dihasiissannonke? (Iyyaasu 24:15) Lowo manni kayinni woloota gawajjannore assate doodhino daafira qarru batiꞌrino. Yihowa tenne miico laꞌꞌanno woyite dadillanno.​—Kalaqo 6:5, 6 nabbawi.

 Yihowa ninke daafira hedanno Maganooti. Isi ninke hagiidhinanni heeꞌnammora hasiꞌranno. Qoleno muli barra qarranna qarra abbanno manna baala hunanno. Hakka geeshsha kayinni qarru heeꞌrara fajjanno gede assinosihu ikkadu korkaati no. Kuni korkaati maatiro Roso 8 aana ronseemmo.​—2 Pheexiroosi 2:9; 3:7, 13 nabbawi.

 Yihowa huuccattotenni isiwa shinqammora koyisinonke. Isi ninke mittu mittunku daafira hedanno. (Faarso 65:2; 145:18) Isi maarannoho. Mito woyite dadillinseemmosiha ikkirono iso hagiirsiisate assineemmore dimishanno. Konni daafira guuntete xeꞌne heedhunkerono isi ledo lubbora jaalooꞌma dandiineemmo.​—Faarso 103:12-14; Yaaqoobi 4:8 nabbawi.

 Kalaqinonkehu Yihowa ikkino daafira, ayenni roorsine iso baxa hasiissannonke. (Marqoosi 12:30) Maganunnire ledde rosse iso baxattota leellishittoronna isi hajajannore assittoro isiwa albinni roore shiqatto.​—1 Ximootewosi 2:4; 1 Yohaannisi 5:3 nabbawi.