Kalaqaanchinke ninke roore hayyichaho. Isi baxillaancho Anna ikkino daafira, ninke daafira hedanno. Qoleno, kalaqinonkehu isi biddishshi nookkiha uminke umonke massangammora diꞌꞌikkino. (Ermiyaasi 10:23) Qaaqquulleho anninsanna amansa biddishshi hasiisannonte gede, ninke baalunkura Maganu biddishshi hasiisannonke. (Isayyaasi 48:17, 18) Konne biddishsha Qullaawu Maxaafi higguwanni afiꞌneemmo; kuni qole Maganu eltooti.​—2 Ximootewosi 3:16 nabbawi.

 Yihowa higguwa xa dancha heeshsho heeꞌneemmo garanna albillitte hegere heeshsho afiꞌneemmo gara rosiissannonke. Kalaqinonkehu Magano ikkino daafira, higge fushshate silxaane noosihu isooti; ninke kayinni isi higguwara hagiirrunni hajajama hasiissannonke.​—Faarso 19:7, 11; Ajuuja 4:11 nabbawi.

 Qullaawu Maxaafi giddo noohu xinta ikkino halaali, addi addi coyi tuncu yaannonke woyite Maganu ma assinammora hasiꞌrannoro huwatate kaaꞌlannonke. Wole higge kayinni xaaddote assinna assitooti yite badde kultannote. (Marro 22:8) Qullaawu Maxaafihu xintu halaali ma assa hasiissannonkero afate kaaꞌlannonke gede, seekkine heda hasiissannonke. (Lawishsha 2:10-12) Lawishshaho, Qullaawu Maxaafi heeshsho Maganu elto ikkitinota kulanno. Xinta ikkinohu kuni halaali, looso loonseemmo woyite, qaete heeꞌnoommo woyite woy doogo haꞌneemmo woyite massagankera dandaanno. Konne halaale huwatanke, heeshshonkera gawajjo abbanno coye qorophineemmo gede assitannonke.​—Soqqamaanote Looso 17:28 nabbawi.

 Yesuusi baalante hajajonni roortannoti lame hajajo noota coyiꞌrino. Umiti, kalaqammoommohu mayiraatiro xawissannote; kalaqammoommohu Magano afate, iso baxatenna isira ammanamme soqqamateeti. Ayee coyeno assineemmo woyite, tenne umi hajajo seekke heda hasiissannonke. (Lawishsha 3:6) Tenne hajajo garinni heedhannori Maganu jaalla ikkitanno, hattono addu hagiirrenna hegere heeshsho afidhanno.​—Maatewoosi 22:36-38 nabbawi.

 Layinki hajajo mannu ledo salaametenni heeꞌneemmo gede biddishsha ikkitannonke. (1 Qorontoosi 13:4-7) Tenne layinki hajajo agadhate, manna Maganu laꞌꞌanno garinni laꞌꞌa hasiissannonke.​—Maatewoosi 7:12; 22:39, 40 nabbawi.

 Maganu higguwa maate baxillunni sumuu yite heeꞌra dandiitanno gara rosiissanno. (Qolasiyaasi 3:12-14) Qoleno Maganu Qaali, maate qarrunni gatisannoha mitto xintu halaale rosiisanno; hakkuno, adhanna adhama geedonnita ikka hasiissannose yaannoho.​—Kalaqo 2:24 nabbawi.

 Qullaawu Maxaafi halaali garinni heeꞌranke, maalaamittete hasiisannonkerenna surrete keere afiꞌrate kaaꞌlitannonke. Lawishshaho qaxarte loosiisidhannori, ammanammenna ceeꞌminummokki loonseemmo gede kulannoha Qullaawu Maxaafi halaale ayirrisanno manna roore hasidhanno. (Lawishsha 10:4, 26; Ibiraawuyaani 13:18) Qoleno Maganu Qaali, heeshshote hasiisanno coyi heeꞌrinkero hakkuyinni kassi yine heeꞌneemmo gedenna Maganu ledo noonke jaalooma maalaamittete coyinni roorsine laꞌneemmo gede amaalannonke.​—Maatewoosi 6:24, 25, 33; 1 Ximootewosi 6:8-10 nabbawi.

 Maganu higguwa garinni heeꞌra ordu keerirano kaaꞌlitanno. (Lawishsha 14:30; 22:24, 25) Lawishshaho, dimbitinoonte yitannota Maganu higge ayirrisa shaanno xibbinninna danotenni agartannonke. (Lawishsha 23:20) Yihowa ago agginoonte diyiino; ikkollana, bikkunni angammora hasiꞌranno. (Faarso 104:15; 1 Qorontoosi 6:10) Maganu higguwa assineemmo coye calla ikkikkinni hendeemmo coyeno qorophineemmo gede rosiissannonke. (Faarso 119:97-100) Ikkollana addu Kiristaani Maganu higguwa agadhannohu horo afiꞌrate yee calla diꞌꞌikkino. Tenne assannohu Yihowa ayirranno gede assateeti.​—Maatewoosi 5:14-16 nabbawi.