MAYIKI annisi reyo qaage togo yiino: “Xissoꞌya fuqqate lowo geeshsha woꞌnaaloommo.” Mayikira xissosi fuqqa labballimma labbinosi. Ikkollana yannate gedensaanni soꞌrinota wodanchi. Konni daafira jaalisira ahaahu reyi yannara maa assa hasiissannosiro dimitiiꞌmino. Mayiki togo yiino: “Lamu diri albaanni ikkoommero qotesi amade, ‘Labbaaha ikki’ yeemmosi. Xa kayinni angasi amade, ‘Macciishshamannohere baala fuqqitooti. Togo assakki xissokki dandaatto gede kaaꞌlitannohe. Haꞌrammora hasiꞌrittoro haꞌreemmo; keeshshammora hasiꞌrittoro keeshsheemmo. Kayinni macciishshamannohere hasaapha waajjitooti,’ yuummosi.”

Maariaani yinanni manchono minaannise reyi yannara macciishshaminosere fuqqate lowo geeshsha woꞌnaaltino. Togo yitino: “Wolootaho lawishsha ikka hasiꞌroomma daafira wiꞌlate shetumma; konni daafira hindiiddoꞌya fuqqumma. Ikkollana wolootaho jawaantete lawishsha ikkate woꞌnaalaꞌya kaaꞌlitannoekkita yannate gedensaanni huwatumma. Ikkitoꞌya heeshshi gotti asse laꞌꞌe aneneeto, ‘Wiꞌla hasiissuhero wiꞌli. Hasiisikki jawaata labbe leellate woꞌnaaltooti. Xissokki fuqqa agurte fushshiri,’ yaa hanafumma.”

Konni daafira Mayikinna Maariaani, Xissoꞌne fuqqitinoonte! yite amaaltanno. Yaansa garaho. Mayira? Korkaatuno wiꞌla xisso fushshirate kaaꞌlitanno. Xissoꞌne fushshira iillinoꞌne qarra dandiitinanni gede kaaꞌlitannoꞌne. Kalaqamunnihu xisso fushshirate gari, wodanchatenninna egennotenni irkisamiro xissoꞌne garunni fushshidhinanni gede kaaꞌlannoꞌne.

Addaho, duuchunku manni xissonsa mittu garinni difushshiranno. Banxanni manni hedeweelchono ikko xiwamanni keeshshe reyiro, nooha xissiisasi digattanno. Ikkollanna mittu buuxamino coyi no; hakkuno: Xissoꞌne fuqqa mannimmatenna hedote aana gawajjo abbitaꞌnera dandiitanno. Xisso fushshiꞌraꞌne kayinni ordu keerira kaaꞌlitannoꞌne. Hiittoonni? Qullaawa Borro tenne hajo lainohunni horoontanno amaale amaddino.

Giddota fushshe coyiꞌra xisso fushshiꞌrate kaaꞌlitanno. Biꞌree waro Maganoho soqqaminohu Iyyoobi tonne oososi reyitutanna wolu buutote qarri iillisi yannara togo yiino: “Lubboꞌya heeshsho effidhe gibbu. Giddoꞌya fooggalinni sammi yee gungumeemmo. Lubboꞌya caaccaawanni kainohunni coyiꞌreemmo!” (Iyyoobi 1:2, 18, 19;  10:1) Iyyoobi gungummesi fuqqa didandiino. Xissosi fushshire furgaꞌꞌa hasiꞌrino; caacceessinosire ‘coyiꞌra’ hasiissinosi. Konne lawanno garinni, Ingilizete gobba qansichinna diraamu godoꞌle borreessaanchi Sheekispiiri Makibeezi yinanni diraamisira togo yiino: ‘Xissokki coyiꞌri; fugantino xisso wodana cancantanno.’

Konni daafira, wodaniꞌne xisso cincatenninna mararrotenni macciishshannohu ‘halaalaanchu jaalira’ hasaapha beedho uyitaꞌnera dandiitanno. (Lawishsha 17:17) Duucha woyite iillinoꞌne qarranna xissoꞌne borreessa hakkonne qarranna xisso roore huwatatenna dandee heeꞌrate kaaꞌlitannoꞌne. Qoleno hasaaphitinanni manchi kiꞌnente gede shiirinohanna qarrasi qeele sainoha ikkiro, sheshifachishshannoꞌne amaale aaꞌnera dandaanno. Qaaqqu reyinoseti mitte mancho isente gede shiidhinotera wole manchora xissose hasaaphase kaaꞌlitinosehu hiittoonniitiro togo yite xawissino: ‘Anera iillinohu gedee qarri iilleennase dandiite saꞌino mancho noota afaꞌya, lowo jawaante afiꞌreemma gede kaaꞌlitinoe.’

Xissoꞌne fushshe hasaapha saalfachishshannoꞌneha ikkirona? Saaoolinna Yoonataanni reyitu yannara, Daawiti macciishshantinosi qurto borreessino. Tini qurtote borro yannate gedensaanni Qullaawu Maxaafi giddo Layinki Saamueelira borreessantino. (2 Saamueeli 1:17-27; 2 Zeena 35:25) Hatteente gede, mitootaho macciishshaminonsare borreessa roore shota ikkitinonsa. Mitte minaanna shiidhino mancho macciishshaminosere borreessitinotanna shiimu barri gedensaanni borreessitinoha nabbawase kaaꞌlitinoseta coyidhino.

Macciishshamannoꞌnere hasaaphitineno ikko borreessitine xawisaꞌne, xissoꞌne fushshidhinanni gede kaaꞌlitaꞌnera dandiitanno. Qoleno tini kawa kaꞌaa higinore tirate kaaꞌlitanno. Mitte qaaqqu reyinose mancho togo yite xawissino: “Aninna ayiddaanniꞌya qaaqqu reyinsahu gedensaanni adhamansa diigantino minaamanna minaannire macciishshinoommohura ninkera togoori iillankera dihasiꞌnoommo. Konni daafira, hanqine mimmitonke boroorreemmo wote kawa kaꞌaa higinore hasaambe tirreemmo. Togo assanke mimmitinkewa lowo geeshsha gamba yineemmo gede kaaꞌlitinonkeha lawannoe.” Konni daafira, macciishshamannoꞌnere wolootu affanno gede assaꞌne iillinoꞌne qarri mittu daniha ikkirono wolootuno wolu garinni xissiisidhara dandiitannota wodanchitinanni gede kaaꞌlitannoꞌne.

Woluri xisso fushshirate kaaꞌlannori wiꞌlate. Qullaawu Maxaafi, ‘Wiꞌlate yanna no’ yaanno. (Mekibibi 3:1, 4) Banxeemmo manni reyanno woyite togoo yanna daase digattanno. Xissiisiꞌne hindiiddo fushshiꞌra xaabbantanni gede kaaꞌlitanno.

Mitte beetto amase reyitu yannara jaalase hiitto assite jawaachishshinosero xawissanni togo yitino: “Jaalaꞌya horontanni anewiinni dibaxxitino. Ledoꞌya wiꞌlitino. Qolteno hasaawissinoe. Xissoꞌya  faajjete fushshira dandoomma; hattino lowo geeshsha kaaꞌlitinoe. Wiꞌla saalfata dihasiissinoe.” (Roomu Sokka 12:15 lai.) Kiꞌneno hindiiddo fushshira saalfata dihasiissannoꞌne. Umo laꞌnummonte gede, Qullaawu Maxaafi saalfattukki xissiisidhe wiꞌlitinoriha Yesuusihanna wolootu ammanate mannooti lawishsha amadino.—Kalaqo 50:3; 2 Saamueeli 1:11, 12; Yohaannisi 11:33, 35.

Mito woyite heddinoonnikkiri macciishshamaꞌnera dandaanno. Hindiiddo heddinikki fultaꞌnera dandiitanno. Mitte ayiddaanna shiidhino mancho dikko dikkidhanni (bashsho roore yanna ayiddaannise ledo dikkidhanno) roorenkanni, bashsho ayiddaannise baxannore hirranniwa martanno woyite hindiiddo hooꞌla hoogganno. Cince; hattono hindiiddonke fuqqa hasiissannonke yitine heddinoonte. Wiꞌla noorenna hasiissannota ikkitinota qaagge.

Albaanni laꞌnummonte gede, mitootaho baxxanno manni reyihu gedensaanni gaabbo macciishshantinonsa. Isiraeelete gaꞌre anni Yaaqoobi qaaqqosi “moyichu” itino yine dongisi woyite lowo geeshsha xissiisirinohu konnira ikkara dandaanno. Roduuwisi noo gara afanno gede Yooseefi fushshe soyinohu Yaaqoobi umosiiti. Konni daafira Yaaqoobi, ‘Wona Yooseefi callichosi mayira soommo? Moyichu batirino qooxeessa wona mayira soommo?’ yaanni lowo geeshsha gaabbikki digatino.—Kalaqo 37:33-35.

Baxxinanni manni reyinohu assa hasiissannoꞌnere assitinikki gattineenna ikkino gede macciishshamaꞌnera dandaanno. Hedonnitano ikkito addu gaabbo shiire xissiisiranno manchiwiinni agarranni coye ikkinota huwataꞌne umise kaaꞌlitaꞌnera dandiitanno. Xaano togoo yannara macciishshamannoꞌnere fuqqitinoonte. Gaabbo mageeshshi geeshsha macciishshantinoꞌnero hasaaphaꞌne xissoꞌne fushshirate kaaꞌlitannoꞌne.

Ikkollana, mitto mancho ayee geeshsha banxummorono heeshshosi agara dandiineemmokkita, qoleno “yannanna agarroonnikki hedeweelcho” banxeemmo mannira tuncu yitannokki gede hoola dandiineemmokkita huwatte. (Mekibibi 9:11) Qoleno, iso gawajjate yitine assitinoonnire ikkinokkiti dihuluullissannote. Lawishshaho, akimete  minira rakkine massa hoogginoonnihu baxxinanni manchi xiwanu lexxeenna reyara mixidhineetini? Deeꞌni; hatto yaa didandiinanni! Ikkina konni manchi reyora kaima ikkitinoonniha laweennaꞌne gaabba hasiissannoꞌne? Deeꞌni.

Mitte ama beettose kaameelu danonni reyitu gedensaanni macciishshantinose gaabbo dandiite heedhino. Togo yitino: “Mininni fushshe soommaseti ane ikkoomma daafira gaabbumma. Ikkollana hatto yee heda gowwimma ikkitinota wodanchumma. Annise ledo hadhara uminke hajora soyaꞌya soꞌro diꞌꞌikkitino. Dano hedeweelcholla kalaqantino.”

‘Lowori coyiꞌreemmori woy asseemmori gatino’ yitinanniha ikkara dandaanno. Hatti garaho; kayinni ninke giddo guuta ama, guuta anna woy guuta beetto ikkinohu ayeti? Qullaawu Maxaafi togo yee amaalannonke: ‘Ninke woꞌmunku duuchu coyinni soꞌneemmo; arrawisinni soꞌrannokkihu isi horo keeraancho manchooti.’ (Yaaqoobi 3:2; Roomu Sokka 5:12) Konni daafira, kiꞌneno keeraano ikka hoogaꞌne ammantine adhe. Marro marro higgine “hattolla assoommoro” yaaꞌne, rakkine xaabbattinannikki gede assitanno ikkinnina mittore dileddanno.

Gaabboꞌne hedonnita ikkitukki addunnita ikkitinota leellishanno korkaati heeꞌriꞌnero, duuchunku aleenni gaabbo qeelate kaaꞌlannore hedde; hattino Maganu maarooti. Qullaawu Maxaafi togo yee buuxisanno: “Yihowa, soꞌro illaallisattoha ikkoommero, ballo Yahi, ayi uurra dandaanno? Halaalaancho maaro atewa no.” (Faarso 130:3, 4) Saino coye qolanna soorra didandiitinanni. Ikkollana saꞌino soꞌroꞌnera Magano maaro xaꞌmira dandiitinanni. Hakkunni gedensaannina? Maganu maaraꞌnera qaale eina, kiꞌne kiꞌneneeto maara dihasiissannoꞌne?—Lawishsha 28:13; 1 Yohaannisi 1:9.

Hakkiinni saeno, miteekkitine akimootaho, jaallate woy reyinohura nafa hanqa rakkannoꞌne? Togoori shiiꞌniro macciishshamannore ikkinota huwatte. Hanqitinoonnihu lowo geeshsha xissiisidhinoonnihura ikkara dandaanno. Mittu borreessaanchi, “Hanqunni kaꞌine qaafo adha ikkikkinni hanqu macciishshaminoꞌneta huwataꞌne calla hanqu abbanno gawajjonni agartannoꞌne” yiino.

Qoleno hanqisinoꞌnere wolootaho hasaaphaꞌne kaaꞌlitaꞌnera dandiitanno. Hiittoonni? Quwa sae hanqe coyiꞌratenni diꞌꞌikkino. Qullaawu Maxaafi qorowisiisannonte gede seeda yanna keeshshanno hanqi gawajjanno. (Lawishsha 14:29, 30) Ikkollanna wodanche macciishshanno jaalira hasaapha kaaꞌlitaꞌnera dandiitanno. Mitootu hanqitanno wote kaajjado mannimmate guunte millimmo (ispoorte) loosansa kaaꞌlitinonsa.—Qoleno Efesooni 4:25, 26 lai.

Macciishshamannoꞌnere maaxira hooga hasiisannore ikkirono, coyidhinannire qoropha hasiissannoꞌne. Macciishshaminoꞌnere hasaaphatenna hanqunni woloota russate mereero lowo badooshshi no. Hanqiꞌneranna caaccaambeꞌnera woloota bushiisha dihasiissannoꞌne. Konni daafira macciishshaminoꞌnere, gibbotenni ikkikkinni hayyotenni hasaaphe. (Lawishsha 18:21) Xisso dandee heeꞌrate mitte qara ikkitino irko no; aanchine laꞌneemmoti iseeti.

Qullaawu Maxaafi, “Yihowa wodana hiiqqantinorira mule no; ayyaaninsa hiiqqaminoreno gatisanno” yee jawaachishannonke. (Faarso 34:18) Konni daafira duuchunku aleenni, baxxinanni manni reyiro xaabbanyoote afidhinanni gede kaaꞌlannoꞌnehu Maganu ledo nooꞌne fiixoomaati. Hiittoonni? Xaa geeshsha uyinoonniti  horoontanno amaale baala Maganu Qaale ikkinohu Qullaawu Maxaafi aana xintantinote. Tenne amaale loosu aana hosiisaꞌne jawaante uyitannoꞌne.

Hakkiinni saeno, huuccatto afidhino wolqa shotissine laꞌinoonte. Qullaawu Maxaafi, “Duhanokki Yihowa aana tuqqi, isi umisi irkisannohena” yee kaajjishe amaalannonke. (Faarso 55:22) Macciishshamannoꞌnere mararannoꞌne jaalira hasaaphaꞌne kaaꞌlitannoꞌneha ikkina, wodaniꞌneta ‘jawaante duuchate Maganira’ kuꞌlaꞌne hiitto roorenka dijawaachishshannoꞌne!—2 Qorontoosi 1:3.

Huuccatto assiꞌnoommohura calla beedho afiꞌneemmo yaa diꞌꞌikkino. “Huuccatto macciishshanno” [Magani], soqqamaasinesi wodaninni huuccidhuro qullaawa ayyaana aansara qaale eino. (Faarso 65:2; Luqaasi 11:13) Maganunnihu qullaawu ayyaani woy loosu aana noo wolqasi galtine hossinanni gede ‘bayira wolqa’ uyitannoꞌne. (2 Qorontoosi 4:7) Maganu ammanantino soqqamaasinesira ayee qarri iillinsarono cinca aannonsata qaagge.

Qaaqqo shiidhinoti mitte mancho huuccatto isenna minaannase hiitto kaaꞌlitinonsaro qaagge togo yitino: “Hashsha mine heeꞌneenna qaaqqonke reyo lowo geeshsha xissiissannonke wote, qoonqonke gotti assine mitteenni huucciꞌneemmo.” Leddeno togo yitino: “Umi qara ise nookkiha mitore assinummo wote, [lawishshaho] umo ise nookkiha songote gambooshshira leellinummo wote, umo ise nookkiha qoqqowu gambooshshira leellinummo wote, jawaante aannonke gede huucciꞌnoommo. Soodeenna kaꞌneemmo wote, qaaqqonke reyo adda lawa gibbannonke daafira Yihowa kaaꞌlannonke gede huucciꞌneemmo. Mayiraatiro afa hoogummarono, minira dayeemma wote ragu tunsannoe. Ayewoteno minira callaꞌya dayeemma wote haranse, Yihowa ballo shesho afiꞌreemma gede kaaꞌlie yee huucciꞌreemma.” Tini ammanate mancho huuccatto kaaꞌlitinoseta kaajjishshe ammantanno. Kiꞌneno ganyitine huuccidhiniro, ‘hedo duuchante aleenni ikkinohu Maganu keeri wodanaꞌnenna hedoꞌne agaranno.’—Filiphphisiyusi 4:6, 7; Roomu Sokka 12:12.

Maganu aanno kaaꞌlo woyyimma abbitanno. Kiristaanchu soqqamaanchi Phaawuloosi, Maganu ‘qarru duuchu giddo noore sheshifachisha dandiineemmo gede qarrinke duuchunku yannara sheshifachishannonke’ yee xawisino. Maganu aanno kaaꞌlo horontanni xissiisidhinannikki gede assitannoꞌne yaa diꞌꞌikkino; ikkirono xissoꞌne dandiitinanni gede kaaꞌlitannoꞌne. Togo yaano hakkunni gedensaanni horonta diwiꞌlitinanni woy reyinoꞌne manna habbinanni yaa diꞌꞌikkino. Ikkollana xaabbattinanni. Hakkiinnino, iillinoꞌne qarri kiꞌnente gede shiidhinore woloota manna jawaachishshinanni yannara bashshonni roore qarransa huwattinannirenna marartinannire ikkitinanni gede assaꞌnera dandaanno.—2 Qorontoosi 1:4.