“Kiꞌne rosiisaano ikka dandiitinanni.” (Ibi. 5:12) Kalqete alame giddo baalunkunni rooriidi Rosiisaanchi Yihowa ninke isi daafira wolootaho rosiinseemmo gede koyisinonke! Tini hagiirsiissannote! Maatetenna songote giddo, woy soqqansho fulle wolootaho Yihowa daafira halaale rosiisa kaajja qoossooti; qoleno ayirrado loosooti. Tennera kaaꞌlannonkeri maati?

Soqqamaasinchu Phaawuloosi Ximootewoosira borreessino sokka tenne xaꞌmora dawaro afiꞌrate kaaꞌlitannonke; togo yiino: “Mannaho nabbawate, kulatenna rosiisate jawaati.” Isi lede, “Hatto assittoro ateneenna macciishshitannohere gatisatto” yiino. (1 Xim. 4:13, 16) Yihowa mannu heeshsho gatissanno sokka duduwate qoosso uyinonke. Konni daafira, nabbawatenna rosiisate dandoonke woyyeessiꞌrate sharrama hasiissannonke. Tenne biroshere qixxeessinoonnihu iseraati. Hanni tenne biroshere amado haransine laꞌno.

Yihowa Bayira ‘Rosiisaanchooti.’ (Isa. 30:20) Tini biroshere nabbawatenna rosiisate dandookki woyyeessiꞌratto gede kaaꞌlitannoheha ikkirono, dudumbeemmo sokka Anninna manna minisira abbannohu Yihowa ikkinota deꞌooti. (Yoh. 6:44) Konni daafira, qullaawa ayyaana aannohe gede ganyite huuccatto assiꞌri. Maganu Qaale seekkite horoonsiꞌri. Mannu ate aana ikkikkinni Yihowa aana illachishanno gede assi. Macciishshaano Yihowa lubbora baxxanno gede kaaꞌlate sharrami.

Yihowa taalle nookki sokka mannaho rosiisatto gede koyisinohe. “Maganu aannohe wolqa” addaxxattoha ikkiro, qinaannoheta dihuluullammeemmo.—1 Phe. 4:11.

Ledokki loonseemmori,

Yihowa Farciꞌraasinehu Aliidi Bisi