Mannu maaxe atera calla kule egenninoheri no?— a Hattoo coye wolu manni afinokkiha ikkino daafira goꞌlino coyeeti yinanni. Qullaawu Maxaafi mittu addihu goꞌlino coyi noota kulanno; konne coye “qullaawa goꞌlino coye” yinanni. Qullaawaho yinoonnihu Maganuwiinni dayinoha ikkino daafiraati. Sokkaano nafa konne coye roore afa hasidhino. Kuni goꞌlino coyi maatiro kulohe?—

Biꞌre lowo diri albaanni, Maganu umi labbaahanna meyaata kalaqino. Insa suꞌmi Addaaminna Heewaniiti. Maganu insara Edenete kaashshu base yinannita biifado qae kalaqe uyinonsa. Addaaminna Heewani Maganoho hajajamoommero, insanna oosonsa uulla woꞌma hattoota biifado gannate assitanno. Hattono gannatete hegerera heedhanno. Addaaminna Heewani kayinni ma assitinoro qaagatto?—

Addaaminna Heewani Maganoho dihajajantino; xaa yannara gannate nookkihu iseraati. Maganu kayinni, uulla gudisidhe biifado gannate ikkitannotanna mannu baalunku hegerera hagiidhanni heeꞌrannota coyiꞌrino. Isi tenne assannohu hiittoonniiti? Mannu tenne afikki lowo diri saino. Kuni coyi goꞌle keeshshino.

Yesuusi uullara dayiti, konne goꞌlino coye mannaho kulino. Isi kuni goꞌlino coyi Maganu Mangisteha ikkinota coyiꞌrino. Yesuusi manna tini Mangiste daggara huuccidhe yiino. Tini Mangiste uulla biifado gannate ikkitanno gede assitanno.

Konne goꞌlino coye afittota tashshi yiinohe?— Gannatete heedhannori Yihowara hajajantannore calla ikkitinota qaagi. Qullaawu Maxaafi Yihowara hajajantinorita lowo labballinna meenti xagge kulannonke. Konni manni xagge rosa hasiꞌratto?— Hanni insa giddo gamu ayeootironna insa lawishsha harunsa dandiineemmo gara ronso.