Annahonna amate hajajama qarrissanno woti no?— Ee, mito wote qarrissanno. Yesuusi Yihowarano, annisiranna amasirano hajajaminota afootto?— Isi xagge, annikkiranna amakkira hajajama qarrissannohe wote nafa hajajamatto gede kaaꞌlitannohe. Hanni isi xagge lende ronso.

Yesuusi uullate aana heeꞌrara albaanni, Annisi Yihowa ledo iima heeꞌrino. Isira koye uullate aanano annunna ama noosi woti no. Suꞌminsa Yooseefinna Maariyaamiiti. Insa isira annanna ama ikkitinohu hiittoonniitiro afootto?—

Yihowa Yesuusi heeshsho iiminni haare Maariyaami godowi giddo wori; tenne assinohu Yesuusi ilame uullate aana heeꞌranno gedeeti. Tini dhaggete! Wolu qaaqquulli amansa godowi giddo lophannonte gede, Yesuusino Maariyaami godowi giddo lophi. Hakkiinnino honsu agani gedensaanni ilami. Maariyaaminna minaannise Yooseefi Yesuusira amanna anna ikkinohu konni garinniiti.

Yesuusira 12 diro calla ikke noosi wote, Annasi Yihowa lowo geeshsha baxanno daafira mitto dhagge ikkinore assino. Kuni ikkinohu Yesuusinna ayiddisi Faasiku ayyaanira Yerusaalame seeda doogo haꞌrinowaati. Yooseefinna Maariyaami hakkiinni qaera higanni heeꞌre Yesuusa laꞌꞌanno wote isi dino. Isi hiikka higinoha lawannohe?—

Yooseefinna Maariyaami bayichonko agure Yerusaalame hige Yesuusa baalawa hasa jammari. Insa iso hasse hoogguti lowo geeshsha masillaabbu. Sasu barri gedensaanni kayinni iso beetemeqidesete giddo affu! Yesuusi beetemeqidesete gatinohu mayiraatiro afootto?— Hakko Annisire Yihoware rosa dandaanno daafiraati. Isi Yihowa baxanno, hattono iso hagiirsiisanno gara rosa hasiꞌranno. Yesuusi lophe lowo mancho ikki gedensaannino, Yihowara hajajama diagurino. Yesuusi hajajama qarrissusi wote nafa, hajajamino; qoleno Yihowara hajajamate yee qarra dandiino.  Yesuusi Yooseefiranna Maariyaamirano hajajaminoha lawannohe?— Ee, Qullaawu Maxaafi isi insarano hajajaminota kulanno.

Yesuusi lawishshinni maa rosatto?— Hajajama qarrissannohe wote nafa annikkiranna amakkira hajajama hasiissannohe. Ati hattoo wote hajajamatto?—