TENNE misilera haaruri mayi no? Mannu no. Insano umi labbaahonna meyaate. Kalaqinonsahu ayeeti? Maganoho. Suˈmasi egennootto? Suˈmisi Yihowaati. Manchunna manchote suˈmi kayinni Addaaminna Heewaniiti.

Yihowa Maganu Addaami kalaqinohu togoonniiti. Baattote aaninni bushsha haaˈre coˈiima mannu biso kalaqi. Hakkiinnino kalaqino bisi sano widoo qole ufuufi; Addaamino heeshshonniha ikki.

Yihowa Maganu Addaamira looso uyiisi. Woˈmante saadara suˈma fushshanno gede kulisi. Duuchchunkura dancha suˈma fushsha dandaanno gede Addaami saada seekke laikki digatino. Addaami saadate suˈma fushshi wote mitto coye laino. Hakku coyi maatiro afootto?

Baalanti saada labbaahonna meyaate. Meyaatinna labbaa daaniichchi no; meyaatinna labbaa doobbiichchi no. Addaamira kayinni meyaati dinosi. Konni daafira Yihowa Addaamira lowo goxichchi daannosi gede assi; hakkiinnino midaadisinni miqichcho haaˈri. Konne miqichchono meyaata asse kalaqi; iseno Addaami galte ikkitu.

Addaami kawoote hiitto hagiidhino! Qoleno Heewani tenne biifado kaashshu base giddo heedhanno gede worroonnise daafira mageeshsha hagiidhitinoro hedi! Xaate lamunku ooso ilanna hagiirrunni mitteenni heeˈra dandaanno.

Yihowa Addaaminna Heewani hegerera heedhanno gede hasiˈrino. Qoleno woˈmanta uulla Edeenete kaashshu base gede biifado assitara hasiˈrino. Addaaminna Heewani konne looso loossanno gara heddu wote mageeshsha hagiidhitinokka! Atino heeˈroottoro uulla biifado kaashshu base assinanni loosira beeqqattonka? Ikkollana Addaaminna Heewani hagiirri seeda yanna dikeeshshino. Mayiraatiro hanni laˈno.