MARKAAWETE gobbaanni noo manni xaano bashshonte gede bunshella assanni no. Baote wayi daannota xaa geeshsha diammanino. Isinni kuni manni bashshonni roore osoˈlikki digatino. Ikkollana mulenni osoˈla aguri.

Hedeweelcho lowo wayi dirra hanafi. Maaqqetenni waa dunattohu gede ikke iiminni lolahi. Nohi yiinoti garaho! Ikkollana xa markaawete giddora eate lowo geeshsha barrino. Yihowa saanqa seekke cufino.

Wayi hakkawontenni baatto woˈmi. Lowo lagga gede ikki. Haqqe karanni jajjabba kinna aana naqanni lowo geeshsha luushshi. Mannootu waajjite ilaalla gidditu. Mayi Nohi yiita macciishshine saanqu faˈname heeˈreenna markaawe eˈno, yite kawoote mayimma gaabbitino! Xa kayinni markaawe eate barre baino.

Wayi lowo geeshsha lexxanni haˈri. Iiminni 40 barranna 40 hashsha duˈnami. Ilaallate afale geeshsha iilli; mulenni seeddaanna ilaalla nafa beeshshi. Konni daafira Maganu yiinte gede, markaawete gobbaanni noo manninna saada duuchchanti reyitu. Markaawete giddo noori kayinni mittore diˈˈikkitino.

Nohinna oososi markaawe seekkansa dancha loosooti. Wayi iimira kayiseenna markaawe wayi aana hadhu. Wayi iiminni dirra agurihu gedensaanni mitto barra, arrishsho fultu. Arrishsho laˈˈa mayimma hagiirsiissinonsa! Hakkuyira albaanni woˈma uulla amadino wayilla no. Qoleno waaho guunxote hadhanno markaawe agurranna woluri laˈnanniri dino.

Jigeeyye mannooti xa gooffino. Xaate mittono gawajja didandiitanno. Insa baalunku, amuwinsanna wolu bushuullu manni mitteenni gooffino. Kuri jigeeyye mannooti annuwa hiikkituyya?

Jigeeyye mannooti annuwa ninke gedee manna diˈˈikkitino. Insa mannu gede ikkite uullate aana heeˈrate iiminni daggino sokkaanooti. Konni daafira baote wayinni wolu manni goofi wote, mitteenni direyitino. Uddidhinoha mannu biso agurte, sokkaanote gede ikkite heeˈrate iimira hadhu. Ikkeennano martuta, Maganu sokkaano ledo mitteenni heedhannota hoollinsa. Konni daafira Sheexaanu sokkaano ikkitu. Qullaawu Maxaafi insa, durriissate yaanno.

Hakkiinnino Maganu bubbe bubbissanno gede assi; qoleno wayi xeanni haˈri. Yannate gedensaanni, markaawe ilaalu guunxo aana fooliishshidhu. Lowo barri saihu gedensaanni, markaawete giddo noori gobbayiidonna ilaallate guunxo laˈu. Wayi xaano xeanni haˈri.

Hakkiinnino Nohi haraqeessa gobbara soyi. Haraqeessuno fule shiima geeshsha buuwe ofollannowa hoogino daafira, agure higi. Duuchcha hige fule agure higi; higanno kiiro markaawete aana ofollanno.

Nohi wayi xeinota afa hasiˈrino daafira, xa qole lemboolcho fushshe soyi. Lemboolchono ofoltannowa hooggino daafira, agurte higgu. Nohi layinkimeeshsho soyita kayinni afooho ejersu darcho haadhe daggu. Konni daafira Nohi wayi xeinota afi. Sayikkimeeshsho xaano lemboolcho fushshe soyita, ofoltannoha moola bayichcho afidhu.

Maganu xa Nohi coyishiishi. ‘Markaawete giddonni fuli. Maatekki gudisse, saadano mitteenni haadhe fuli’ yiisi. Insa baalunku markaawete giddo mitto diro saˈe keeshshitino. Konni daafira, markaawete gobbaa fulansanninna heeshshote heeˈransanni mageeshsha hagiidhitinoro heda dandiineemmo!