NOONKEHU danchurichchi baalunku Maganu kalaqinoho. Barra xawaabba uyitannonke gede arrishsho, hashsha shiimu jilbinni xawaabba afiˈneemmo gede agananna beeddahe kalaqino. Qoleno, ise aana heeˈneemmo gede uulla kalaqinonke.

Ikkollana Maganu umo kalaqinohu arrishsho, agana, beeddahenna uulla diˈˈikkino. Umo kalaqinohu maatiro afootto? Maganu umo asse iso labbannore kalaqino. Magano laˈˈa dandiineemmokkinte gede kuriuuno laˈˈa didandiineemmo. Qullaawu Maxaafi insa, sokkaanote yaanno. Maganu sokkaano kalaqinohu iima isi ledo heedharaati.

Maganu umo kalaqino sokkaanchi horonta baxxinoho. Isi Maganoho bayira Beettosiiti; qoleno Annisi ledo loosino. Wole baalankare kalaqate Magano kaaˈlino. Arrishsho, agana, beeddahenna uullanke kalaqate kaaˈlinosi.

Hakkawaro uulla marichcho labbanno? Umo uullate aana ayino heeˈra didandiino. Uulla woˈmanta amadino waa agurranna woluri mitturino dino. Ikkollana Maganu uullate aana mannu heeˈrara hasiˈri. Konni daafira mannaho hasiisannore qixxeessa hanafi. Maa maa qixxeessi?

Umo uullate xawaabbu hasiisannose. Konni daafira Maganu, uulla arrishshotewiinni xawaabba afidhanno gede assi. Konne assinohuno hashshano barrano xawaabbu heeˈranno gedeeti. Gedensaannino Maganu, baatto guggushshe amadinose wayira iimaanni fulte leeltanno gede assi.

Umo baattote aana mitturino dino. Hatte yannara baatto tenne laˈˈatto misile aana noo gedeete. Hakkawaro daraaro, haqqe woyi saada dino. Uulla woˈmino wayi giddo qulxuˈme nafa dino. Uulla saadatenna mannaho heeˈrate biiffinota assate Maganoho lowo loosi gatinosi.