BAOTE wayi gedensaanni gamu manni Uuri yinanni base haˈri. Tini baseno dureette katama ikkitu; biifado minnano minantu. Ikkollana hakko heeˈranno manni kaphphu maganna magaˈnannoha ikki. Baabeeli katamira noo yannarano hattonni kaphphu maganna magaˈnannoho. Uurinna Baabeeli katamira heeˈranno manni, Yihowara soqqantinore Nohinna beettisi Seemi gedeere diˈˈikkino.

Baote wayi saihunni 350 diri gedensaanni, ammanamino manchi Nohi reyi. Tenne misile aana laˈˈatto manchi ilaminohu Nohi reyihunni lamu diri gedensaanniiti. Kuni manchi Maganu ledo addi fiixooma afiˈrinoho. Suˈmisi Abirahaamiiti. Isino maatesi ledo Uuri katamira heeˈrino.

Mitto barra Yihowa Abirahaami togo yiisi: ‘Uurinni fulte, fiixakkino agurte, ani leellisheemmohe gobba haˈri.’ Abirahaami Maganoho hajajame, Uuri noo qawaaxxo duuchcha agure fuliyya? Ee fulino. Abirahaami Maganu jaala yaamaminohu, ayeewoteno Maganoho hajajaminohuraati.

Gamu Abirahaami fiixi isi Uurinni fule haˈri wote ledosi haˈrino. Abirahaami anni Taaranna Abirahaami wosiila ikkannohu Looxino ledosi hadhino. Qolteno Abirahaami galte Saara ledosi hadhino. Kuni duuchchunku manni haˈranni mare Kaaraani iilli; hakkiichcho Taara reyi. Abirahaaminna fiixisi Uurinni lowo geeshsha faffe hadhino.

Shiima yanna gedensaanni, Abirahaaminna fiixisi Kaaraaninni fule Kanaˈˈaani yinanni gobba haˈri. Hakka martuta Yihowa Abirahaami togo yiisi: ‘Tini gobba oosokkira eemmote.’ Abirahaamino Kanaˈˈaani gobbara dunkaanaho heeˈri.

Maganu Abirahaami maassirinosi daafira, gereewisinna wole saadasi lowo hoshsha ikkitu; hattono batinynye soqqamaano noosi. Ikkollana isiranna galtesi Saarara uminsa ooso dinonsa.

Abirahaamira 99 diro ikkisita Yihowa, ‘Batinynye dagara anna ikkatto’ yee qaale eisi. Abirahaaminna Saara geedhite ooso iltannowiinni saˈuna, kuni hiitto ikke ikkanno?