TENNE misile aana noo beetto ayeetiro afootto? Suˈmise Ribiqaati. Yisaaqi widira higge martanni no. Galtesi ikkitaraati. Galtesi ikkitinohu hiittoonniiti?

Yisaaqi anni Abirahaami beettisira dancha galte abbara hasiˈrino. Abirahaami, Yisaaqi Kanaˈˈaani seenne adhara dihasiˈrino; korkaatuno kuni manni kaphphu maganna magaˈnanno. Konni daafira Abirahaami soqqamaanchosi woshshe, ‘Fiixiˈya noowa Kaaraani hadhe beettiˈya Yisaaqira seenne hasi’ yii.

Hakkawotenni Abirahaami soqqamaanchi tonne gaala haaˈre seeda doogo haˈri. Abirahaami fiixi noowa iilla rahiti, bue noote mule fooliishshiri. Hatti yanna qooxeessu meenti waa dirrirara daannote; hawarrooti yaate. Abirahaami soqqamaanchi hakko heeˈre Yihowa togo yee huucciri: ‘Aneranna gaallaˈyara waa hayikkissanno beetto ati Yisaaqira dooroottota ikkito.’

Hakkawotenni Ribiqa waa dirridhara daggu. Soqqamaanchu waa xaˈmirita, agara uyitusi. Hakkiinnino goodhino gaalla duuchchanta duubba geeshsha hayikkissu. Gaalu lowo waa aganno daafira, kuni daafursanno loosooti.

Ribiqa waa hayikkisse kaˈuta, Abirahaami soqqamaanchi annise suˈma xaˈmise. Qoleno, insate gala dandaannotanna teˈee xaˈmise. Ribiqa togo yitusi: ‘Anniˈya Baatueeliiti; minenke galattowi no.’ Abirahaami soqqamaanchi, Baatueeli, Abirahaami rodii Naakoori beetto ikkinota afino. Konni daafira Abirahaami fiixi ledo xaadisinosi daafira guluphphe Yihowa galati.

Hakko hashsha Abirahaami soqqamaanchi Baatueeliranna Ribiqa rodii Laabara, mayira dayinoro kulinsa. Baatueelinna Laaba, Ribiqa isi ledo hadhe Yisaaqi galte ikkitanno gede maahoyye yitu. Ribiqa hadhara xaˈminiseta mayituyya? ‘Ee haˈreemma’ yitu. Layinki barra gaalla guluffe, Kanaˈˈaani higgu.

Kanaˈˈaani iillituta hashshi. Ribiqa mittu manchi battalate milli yaanna affu. Hakku manchi Yisaaqiiti. Yisaaqi Ribiqa laita tashshi yiisi. Amasi Saara reyitunkunni sase diro calla ikkino daafira hakkawote dadilla diagurino. Xa kayinni Ribiqa lowo geeshsha baxinohura hagiidhi.