MITTORICHCHO assate eootto qaali wonshate qarrise egenninohe? Koye misilete aana laˈˈatto manchi hattoori iilleennasi dadillanni no. Kuni manchi Yoftahe yinanniho; isi worba Isiraeelete mesaafintichchooti.

Yoftahe heeˈrinohu Isiraeele Yihowa magansiˈra agurtino warooti. Hakkawarono Isiraeele bunshe assitanni no. Konni daafira Yihowa Amooni manni insa qasanno gede aguri. Konni daafira Isiraeele Yihowawa higge, ‘Ate aana cubbo loonsoommo. Eeggatena gatisinke!’ yite raartu.

Isiraeele assitino bunshenni gaabbitu. Yihowa galagalte magansidhe gaabbitinota leellishshu. Konni daafira Yihowa xaano kaaˈlinsa.

Insano bushuulle Amooni manna qasate Yoftahe doodhitu. Yoftaheno Yihowa olaho kaaˈlannosi gede lowo geeshsha hasiˈri. Konni daafira togo yee Yihowara qaale ei: ‘Amooni manna qeeleemmo gede kaaˈlittoero, qeele higeemmo wote miniˈyanni balaxe fule anewa daannoha atera eemmohe.’

Yihowano Yoftahe eino qaale macciishshe, ola qeelanno gede kaaˈlisi. Yoftahe qaesi higita mininni balaxe fule isiwa marinohu ayeetiro afitto? Mitte afiˈrino beettooti. Yoftahe qoonqosi gotti asse, ‘Ane beettoˈya!’ yii. Qoleno, ‘Dadillu aana tugittae; Yihowara agureemmokki qaale eoommona’ yii.

Yoftahe beetto annise eino qaale affuti, umi qara iseno dadillitu. Korkaatuno annisenna jaallasewiinni baxxitaraati. Heeshshose diro woˈma Seelo noo Yihowahu xaadooshshu dunkaani giddo isira soqqantaraati. Konni daafira annase, ‘Yihowara qaale eootto ikkiro qaalekki wonsha hasiissannohe’ yitu.

Hakkiinnino Yoftahe beetto Seelo hadhe, gatinoha heeshshose diro woˈma Yihowara xaadooshshu dunkaani giddo soqqantu. Diru dirunku shoole barra Isiraeelete meenti isewa haˈranno; hakkono mitteenni hagiidhanno. Yoftahe beetto dancha Yihowa soqqamaancho ikkitino daafira, mannu baxannose.