SIQQOTE aana noo daraaronna leinoha lewuzete guma lai. Tini siqqo Aaroonite. Tini daraaronna leinohu lewuzete gumi Aarooni siqqo aana mittu hashshinni fulino! Kuni mayira ikkinoro hanni laˈno.

Isiraeelete manni halallaho raataawa hanafinku shiima yanna saˈe no. Gamu manni Muse massagaancho ikka dihasiissannosi, qoleno Aarooni kakkalaanote biilo ikka dihasiissannosi yee hedino. Togo yite heddannori Qore, Daataani Abeerooninna 250 ikkitannori gosa massaggannori no. Kuri baalunku Musewa marte, ‘Ateneeto ninkera aliidiha assoottohu mayiraati?’ yitu.

Muse Qorenna iso harunsitannore togo yiinsa: ‘Gaˈa soodo hixaana wiliishshinanni uduunnichchira hixaana worre. Hakkiinnino haadhine Yihowa dunkaaniwa amme. Yihowa ayee doorannoro laˈneemmona.’

Layinki barra Qorenna 250 iso harunsitannori dunkaana martu. Woluno batinynyu manni insara haˈle ledonsa mari. Yihowano lowo geeshsha hanqi. Museno, ‘Konni bushu manni dunkaaninni fulle’ yii. Qoleno, ‘Insare mittoreno kissinoonte’ yii. Mannuno isi yiinota macciishshe Qore, Daataaninna Aabeerooni dunkaaninni fuli.

Hakkiinnino Muse, ‘Yihowa doorinohu ayiitiro konninni affinanni. Baatto dadhite konne busha manna egemmitanno’ yii.

Muse coyiˈre kaˈˈanni heeˈreenna, baatto dadhantu. Qore dunkaaninna jajjisi egemmami; Daataani, Aabeerooninna ledonsa noorino egemmantu; baattono insa aana diwantu. Mannu insa baatto egemmitanna raartannota macciishshe, ‘Xoonqo! Baatto ninkeno egemmitankeraatina!’ yee canci.

Qorenna 250 iso harunsitannori xaano dunkaanu mule no. Hakkiinnino Yihowa giira dirriseenna insa itte guddu. Hakkunni gedensaanni Yihowa Aarooni beetto Alaazaari, reyitu mannootiha hixaana wiliishshinanni uduunnichcho haaranno gede kulisi; haareno kakkalote bayichcho xallanno gede kulisi. Kakkalote bayichcho xallinoonnihu kuni uduunnichchi, Aarooninna oososi agurranna wolu mittuno Yihowara kakkalaancho ikka dandaannokkita Isiraeele qorowisiisanno.

Ikkollana Yihowa kakkalaano ikkitasira doorinori Aarooninna oososi ikkitinota xaano seekke kulara hasiˈrino. Konni daafira Yihowa Muse togo yiisi: ‘Mittu mittunku Isiraeelete gaˈre murrichchi siqqosi abbanno gede kuli. Leewi gaˈrera Aarooni siqqosi abbona. Hakkiinnino mitte mittenta siqqo dunkaanu giddo gondooru taawooti albaanni wori. Kakkalaancho ikkara dooroommo manchi siqqo daraartanno.’

Muse layinki soodo laˈˈanno wote, Aarooni siqqo tenne daraaronna leinoha lewuzete guma fushshite no! Ikkina Yihowa Aarooni siqqo daraartanno gede assinohu mayiraatiro xa afitto?