KUNEETI Iyyaasu lai. Isi togo yaanni no: ‘Arrishsho, noottawa uurri!’ Arrishshono noowa uurritu. Mitto barra woˈma gordu mereero uurrite hossu. Hatto ikkitanno gede assinohu Yihowaati! Kayinni Iyyaasu arrishsho xabbanni hossara hasiˈrinohu mayiraatiro hanni laˈno.

Kanaˈˈaani gobbara heedhannori ontu nugussa Gebaooni manna qasa hanaffuta, Gebaooni manni Iyyaasuwa kaaˈlote mitto mancho soqqitu. Manchuno mare, ‘Rakkine iillenke! Gatissenke! Ilaalaame gobbara heedhanno nugussa baalanti ninke soqqamaanoˈne qassara dagginona’ yee kulisi.

Hakkawotenni Iyyaasunna wottaaddarisi hadhu. Hashsha woˈma hadhanni galtu. Marte Gebaooni iillituta onte nugussa wottaaddari waajje xooqa hanafi. Hakkiinnino Yihowa iiminni duˈmuulle kaade dirrisi; Iyyaasu wottaaddari shiinonkunni, kaade gante roore wottaaddara shitu.

Hakko mereero Iyyaasu arrishsho eˈara kaˈinota lai. Tunseenna onte nugussa wottaaddari xooqe baˈˈaraati. Iyyaasu Yihowa huucciˈri gedensaanni, ‘Arrishsho, noottawa uurri!’ yiinohu iseraati. Hakkiinnino arrishsho xabbanni keeshshituta, Isiraeele ola qasante qeeltu.

Kanaˈˈaani gobbara Maganu manna gibbannori wolootuno haammata nugussa no. Iyyaasunna wottaaddarisi hatte gobbara noore 31 nugussa lewu diri giddo qasse qeeltu. Hakkunni gedensaanni Iyyaasu Kanaˈˈaani gobba, baatto afidhinokki Isiraeelete gaˈrera beenkanni gede assi.

Lowo diri sai gedensaanni, Iyyaasu 110 dirisinni reyi. Isinna jaallasi lubbote noo diro woˈmanka Isiraeelete manni Yihowara hajajamino. Kuni danchu manni reyi gedensaanni kayinni, mannootu busha coye assite qarru aana ubbu. Maganu kaaˈlannonsa gede hasidhinohu tenne yannaraati.