HARRICHCHO coyidhanna macciishshite egennootto? ‘Diegennoommo; saada coyidhe affannoni?’ yiittokki digatatto. Ikkollana Qullaawu Maxaafi mitte harrichcho coyidhinota kulannonke. Kuni hiitto ikke ikkinoro hanni laˈno.

Isiraeelete manni Kanaˈˈaani gobba haˈrate kai. Moaabi gobba nugusi Baalaaqi Isiraeele waajjino. Konni daafira Isiraeele rumanno gede Beliaami yinanni busulu manchira sokka soyi. Baalaaqi lowo woxe eemmohe yiinosi daafira, Beliaami harrichchosi gulufe Baalaaqiwa haˈri.

Yihowa Beliaami mannasi rumara dihasiˈrino. Konni daafira Yihowa Beliaami haˈrannota hoolate, seeda bise adhino sokkaancho doogote uurranno gede soyi. Beliaami sokkaancho dilaino; harrichchosi kayinni laˈino. Konni daafira harrichcho sokkaanchu widira higge haˈra gibbu; hakkiinnino doogote ubbe gibbu. Beliaamino lowo geeshsha hanqe harrichchosi dullunni gani.

Hakkiinnino Yihowa, Beliaami harrichchosi coyidhanna macciishshanno gede assi. Harrichchono, ‘Ganattoehu ma asseennaheeti?’ yite xaˈmitusi.

Beliaamino, ‘Balala mancho assoottae. Bise heedhoommeˈˈero sheemmohenka!’ yee qolise.

Harrichchono, ‘Bashsho togo asse egennoommaheni?’ yite xaˈmitusi.

Beliaamino, ‘Diegennoottae’ yiise.

Hakkiinnino Yihowa, Beliaami doogote seeda bise adhe uurrino sokkaancho laˈˈanno gede assi. Sokkaanchuno, ‘Harrichchokki mayira ganitto? Isiraeele rumattokki gede haˈratto doogo cufate dawoommo. Harrichchokki anewiinni wirri yaa hooggoommero, ise mittore assummokki ate bisetenni sheemmohenka’ yiisi.

Beliaamino, ‘Soˈroommo. Ati doogote uurroottontawe diafoommo’ yii. Sokkaanchuno Beliaami haˈranno gede fajjisi; isino Baalaaqiwa sae haˈri. Beliaami xaano Isiraeele rumara hasiˈrino; ikkollana Yihowa rumannota hoole sase hige maassiˈrannonsa gede assi.