HIˈI ANE! Mannu ma assanni no? Siito huucciˈranni no! Konne assanni noohu mayiraati?

Muse ilaalu iima lowo geeshsha keeshshita, mannootu, ‘Muse hiikka higiro dianfoommo. Konni daafira, amme tenne gobbanni fushshannonke magano seekkiˈnona’ yitu.

Muse rodii Aarooni, ‘Maahoyye’ yii. Qoleno, ‘Worqete gutichchaˈne fushshitine anewa abbe’ yiinsa. Mannootuno fushshite massituta, Aarooni giiratenni daaqise worqete siito seekki. Hakkiinnino mannootu, ‘Gibitsetenni fushshinonke Magani konneeti!’ yitu. Lowo jila jilte, worqete siito magansidhu.

Yihowa tenne laiti, lowo geeshsha hanqi. Konni daafira Muse, ‘Rakke dirri. Mannu lowo bunshe assanni no. Higgeˈya hawe worqete siitira sagadanni no’ yiisi.

Muse ilaalunni rahe dirri. Shiqqi yee maranno wote mannootu Yihowa yiinte gede assitanni no. Worqete siito doyissite faarsitanninna sirbitanni no! Muse lowo geeshsha hanqinohura, higge borreessinoonnire taaladda kinna uullate ganeenna hiiqqaqqante gooffu. Hakkiinnino worqete siito haare giiratenni daaqisi. Hakkunni gedensaanni cancane bullee assi.

Mannootu assitinori lowo geeshsha bushareeti. Konni daafira Muse gama manna bisensa qodhitanno gede kulinsa. Museno, ‘Worqete siito magansidhuri bushuullu mannooti reya hasiissannonsa’ yii. Hakkiinnino bise amaddino mannooti 3,000 manna shitu! Tini xagge, kaphphu maganna magansiˈra qorophphanna, Yihowa calla magansiˈra hasiissannonketa dileellishshanno?