TENNE Iyyaarkote gimbe mayi karanni no? Lowo bombi ganinohu gede ikkite ubbanni no. Ikkollana hakkawaro bombu dino; woluri gateenna qawwe nafa dino. Gimbe togo ikkite ubbanni noohu Yihowa assino maalalenniiti! Tini maalale hiitto ikkite ikkitinoro hanni laˈno.

Yihowa Iyyaasu yiinore lai: ‘Atinna wottaaddarikki katama doyitinanni. Lee barra woˈma barrunni mitte higgine doyitinanni. Doyitinanni wote gondooru taawoota dukke. Lamala kakkalaano taawootu albaanni xurumba ufuuffanni hadhona.

‘Lamalki barra katama lamala higgine doyitinanni. Hakkiinnino xurumbaˈne lowo geeshsha ufuuffe; qoleno mittu mittunku lowo geeshsha raarona. Hakkunni gedensaanni gimbe ubbannona!’

Iyyaasunna mannu Yihowa yiino gede assitu. Katama doyitu wote baalunku sammi yite doyitu. Mitto qaale coyiˈrinohu nafa dino. Xurumbunna lekkansa huuro calla macciishshantanno. Iyyaarkote katamira noori Maganu manni diinna waajjitukki digattino. Maskootete rarraˈinota duume siiwo laitto? Hatti ayee maskooteeti? Eewa, Reaabi lamu qotaano assiri yitinosere assidhino. Maatese baalunku ise ledo minese no.

Gedensaannino lamalki barra, katama lamala higge doyitu gedensaanni, xurumba ufuuffu; wottaaddaruno raari; hakkiinnino gimbe ubbu. Hakkunni gedensaanni Iyyaasu togo yii: ‘Katamu giddo nooha baala shiiyye; katamanna hakko noore baala giirre. Birra, worqe, camonna siwiila calla gatissine, Yihowa dunkaani giddo woxe gamba assinanniwa worre.’

Iyyaasu taagare lame qotaano, ‘Reaabi minira martine isenna maatese baala fushshitine abbe’ yiinsa. Qotaano qaale eˈinose garinni, Reaabinna maatese reyotenni gattino.