KUNI manchi uddanosi mayira daddaranni nooro afootto? Yihowa daddari yeennasi daddaranni no. Manchu suˈmi Akiyaati; isi Maganu masaalaanchooti. Masaalaanchoho yaa mayyaatero afootto? Maganu albillitte ikkannore balaxe kulannosi manchooti.

Akiya Iyyoorbaami coyishiishanni no. Iyyoorbaami, Salamooni gimbete loosira roorrichcha asse moohisino manchooti. Akiya doogote Iyyoorbaaminni xaaditi, xagge ikkannore assi. Uddire noota haaro uddano fushshe, tonaalamewa daddari. Hakkiinnino, ‘Tonne hocco ateneera adhi’ yee Iyyoorbaamira uyisi. Akiya 10 hocco Iyyoorbaamira uyinohu mayiraatiro afootto?

Akiya Yihowa gashshoote Salamooniwiinni haare hoolara kainota kulisi. Qoleno Yihowa 10 gaˈre Iyyoorbaamira aara kainotano coyiˈri. Hatto ikkiro Salamooni beetti Roobiaami gashshannoti lame gaˈre calla gattanno yaate.

Salamooni, Akiya Iyyoorbaamira kulinore macciishshiti, lowo geeshsha hanqi. Isino Iyyoorbaami shaara hasiˈri. Iyyoorbaami kayinni Gibitse xooqi. Hakkunni gedensaanni Salamooni reyi. Salamooni 40 diro moohino; isi reyita kayinni beettisi Roobiaami nugusa ikki. Iyyoorbaami Gibitsete heeˈre Salamooni reyinota macciishshe, Isiraeelete gobba higi.

Roobiaami dancha nugusa diˈˈikkino. Annisi Salamooninni roore mannaho kaajjado ikki. Iyyoorbaaminna wolu ayirradu manni Roobiaamiwa marte, mannaho shaqqado ikkanno gede xaˈmitusi. Roobiaami kayinni insa yitinore macciishsha giwi. Isinni bashshonni roore kaajjado ikki. Konni daafira, mannu Iyyoorbaami 10 gaˈrera nugusa assi; lame gaˈre kayinni yaano Biiniyaamitinna Yihudati Roobiaami nugusa assidhu.

Iyyoorbaami, mannisi Yihowa mine mare magansiˈrate Yerusaalame haˈrannota dibaxino. Konni daafira, lame worqete siitta seekke 10 gare gashshooti giddo noo manni hattee siitta magansiˈranno gede assi. Mulenni Isiraeelete gobbara jaddonna finqille woˈmitu.

Lame gaˈre gashshooti giddono qarru no. Roobiaami nugusa ikkihunni onte diro woˈmikki, Gibitsete nugusi Yerusaalame qasi. Kuni nugusi Yihowa mininni lowo jajja adhino. Konni daafira Maganu mini, minni wari gede ikke shiima yannalla keeshshino.