SAAOOLI xaano Daawiti shaara hasiˈranni no. Dooramino wottaaddarisi giddo 3,000 adhe iso hasanni haˈri. Daawiti tenne afiti, Saaoolinna mannisi hashsha hiikko fooliishshidhinoro qotanno gede manna soyi. Hakkiinnino mannisi giddo lame, ‘Kiˈne giddo ane ledo Saaooli noowa haˈrannohu ayeeti?’ yee xaˈmi.

Abiisa, ‘Ani haˈreemmo’ yee qoli. Abiisa Daawiti rodoo Tsiruya beettooti. Saaoolinna wottaaddarisi goxxe heedheenna, Daawitinna Abiisa sunuutunni ikkite insa noowa martu. Insano Saaooli qalacconna umosiinni nooha wayi finiincho haadhu. Baalunku takki yite goxxino daafira, tenne lainonohu woyi macciishshinohu dino.

Kuneeti Daawitinna Abiisa lai. Lamunku Saaooliuu noowiinni higge, ilaalaho geˈe no. Daawitino qoonqosi gotti asse, Isiraeelete wottaaddari roorrichcha woshshe togo yii: ‘Abeneeri, nugusa mootichchakki agarattokkihu mayiraati? Kuneeti lai! Qalaccosinna wayi finiinchisi hiikko no?’

Saaoolino goxinowiinni baqqi yii. Daawiti qaale ikkinota huwate, ‘Ati Daawitiitini?’ yee xaˈmi. Woroonni uurritinore Saaoolinna Abeneeri laitto?

Daawitino, ‘Ee aneeti, nugusa mootichchaˈya’ yee qoli. Daawiti qoleno, ‘Nugusa, shorrattoehu mayiraati? Mayi bunshe assoommo? Qalaccokki kuneeti. Mannikki giddo mittu daye haarona’ yii.

Saaoolino, ‘Soˈroommo. Gowwu assannore assoommo’ yee soˈrosi ammani. Hakkiinnino Daawiti agure haˈri; Saaoolino minira higi. Ikkollana Daawiti togo yee hedi: ‘Saaooli mitto barra shiiekki digatanno. Filisxeemete gobba xooqa hasiissannoe.’ Hakkiinnino yiinonte gede haˈri. Filisxeemete manna doge xa insa garo ikkinoha lawi.

Shiima yanna gedensaanni, Filisxeeme Isiraeele qassara hadhu. Hakko olira Saaoolinna Yoonaataani reyitu. Insa reyo Daawiti lowo geeshsha dadillissusi; konni daafira mitte dancha faarso borreessino. Tenne faarso giddo, ‘Rodooˈya Yoonaataani, ani atera lowo geeshsha xissiisirummo. Ati anera muxxete!’ yaanni faarsino.

Hakkunni gedensaanni, Daawiti Keebirooni yinanni Isiraeelete katama dayi. Saaooli beetti Iyyaabuste moohara hasiˈranno manninna Daawiti moohara hasiˈranno manni mereero olu kai. Gedensaanni kayinni Daawiti manni qeeli. Daawiti nugusa ikki wote 30 diro ikkinosi. Isino Keebirooni katamira lamala dironna darate moohino. Hakko heeˈre ilino ooso Aminooni, Abeseloominna Adooniyaasiiti.

Yannate gedensaanni Daawitinna mannisi Yerusaalamete yinanniha biifado katama amaddara hadhu. Daawiti rodoo Tsiruyahu wolu beetti Iyyoaabi, hakkonne ola massagino. Konni daafira Daawiti Iyyoaabi wottaaddarisira roorrichcha assisi. Hakkiinnino Daawiti Yerusaalamete katamira heeˈre gashsha hanafi.