NUGUSU Iyyoorbaami reyihu gedensaanni, 10 gare amadinohu aliyye gashshootira mookkino nugussa baalanti bushuulle ikkitu. Baalunku giddo rooru bushi kayinni Akiaabi yinanni nugusaati. Isi mayira roore busha ikkinoro afootto? Roorenka togo ikkanno gede assitinositi galtesiiti; iseno Elzaabeeli yinannite busha mootitteeti.

Elzaabeeli Isiraeelete mancho diˈˈikkitino. Ise Sidooni gobba nugusi beettooti. Kaphphu magano Baˈˈaali magansidhanno; qolteno Akiaabinna haammata Isiraeelete mannano Baˈˈaali magaˈnanno gede assitino. Elzaabeeli Yihowa gibbanno; qolteno haammata Yihowa masaalaano shitino. Wolootu kayinni shitannonsakki gede goddate maaxantanni heedhino. Elzaabeeli mittore hasidhuro, hakkonne coye afiˈrate manna shaate geeshsha iillitanno.

Mitto barra nugusu Akiaabi lowo geeshsha dadilli. Konni daafira Elzaabeeli, ‘Techcho mayira dadillootto?’ yite xaˈmitusi.

Akiaabino togo yee qolise: ‘Naabute yiinoeri dadillisinoe. Woyinete kaashshi basesi hidhammora hasiˈroommo; isi kayinni dihireemmohe yiie.’

Elzaabeelino qolte, ‘Mittore yaaddooti; ani afiˈratto gede asseemmahena’ yitusi.

Hakkiinnino Elzaabeeli Naabute heeˈranno katamira noo mootoollera sokka borreessite sokku. Iseno, ‘Shiima yawaawula manna hassine, Naabute Maganonna nugusa xonino yitanno gede asse. Hakkiinnino Naabute katamu gobbaanni fushshitine kinnate gantine shiiyye’ yite sokku.

Elzaabeeli Naabute shinoonnita affuti hakkawotenni Akiaabi, ‘Xaate hadhe woyinete kaashshi base adhi’ yitusi. Elzaabeeli konne busha coye assitino daafira qorichcha adha hasiissannoseha dilawannohe?

Konni daafira Yihowa ise qorichchishate Iyyu soyi. Elzaabeeli Iyyu daannota macciishshituti, illete kuula buudhite biiffe agartu. Iyyu kayinni daye Elzaabeeli maskootete widoonni laiti, hakko nugusu mine noo manna, ‘Hattee mancho eela qoltine tugge!’ yii. Misilete aana laˈˈattonte gede mannootuno hajajante, Elzaabeeli eela qolte tuggeenna reyitu. Busha mootitte Elzaabeeli goofimarchi konneeti.