TINI gannatete misileeti; togoo gannate Maganu masaalaanchisi Isayyaasira leellishikki digatino. Isayyaasi, Yoonaasi reyihunni shiima yanna gedensaanni heeˈrino manchooti.

Gannatete yaa, “kaashshu baseeti” yaate. Albaanni konni maxaafi giddo ronsummori qulli yiihe? Gannate gudisidhe Maganu Yihowa Addaamiranna Heewanira qixxeessita biifado kaashshu base labbanno; dihattooti? Kayinni woˈma uulla gannate ikkitakka?

Yihowa mannisi konni kaˈa ragiˈranno gannatere borreessanno gede masaalaanchisi Isayyaasira kulino. Yihowa togo yee coyiˈrino: ‘Hiyyeeyyenna gereewu baxame mitteenni heeˈranno. Siittunna doobbiyu qaaqquulli mitteenni bobbahanno; shiimu qaaqqino allaalannonsa. Mittu qaaqqi harfa afiˈrino hamashshi mule godoˈliro nafa, hamashshu digawajjannosi.’

Duuchchu manni togo yaara dandaanno: ‘Kuni horonta diˈˈikkannoreeti. Uullate aana qarru hooge diegennino; konni kaˈano dihooganno.’ Ikkollana hanni hedi: Maganu Addaaminna Heewani hiittoo basera worino?

Maganu Addaaminna Heewani gannatete worino. Biifado qaensanni fushshinoonninsahu, geedhitinohunna reyitinohu Maganoho hajajantinokki daafiraati. Maganu iso baxanno mannira Addaaminna Heewani hooggure baala aansara qaale eino.

Konni kaˈa dagganno gannatera gawajjannori mitturino diheeˈranno. Woˈmunni woˈma keeru heeˈranno. Baalunku manni fayyonna hagiirraamo ikkanno. Duuchchunkuri Maganu umi qara ikkara hasiˈrino gede ikkanno. Maganu konne hiitto asse assannoro albaange ronseemmo.