KUNI manni ayeootironna maa assanni nooro afootto? Olu bayichchira haˈranni noo mannaati; albaa haˈranni noo manni faarsanni no. ‘Faarsanni noo manni olamanno bisenna qalacco amadinokkihu mayiraati?’ yite xaˈmittokki digatootto. Mayiraatiro hanni laˈno.

Iyyoosaafixi lame Isiraeelete gaˈre gashshooti nugusaati. Isino 10 gaˈre amadinohu aliyye gashshooti nugusi Akiaabinna Elzaabeeli waro heeˈrinoho. Ikkollana Iyyoosaafixi dancha nugusaati; annisi Asano danchaho. Konni daafira lame gaˈre amadinohu wodiidi gashshootira heeˈranno manni seeda diro dancha heeshsho heeˈri.

Hakkunni gedensaanni kayinni manna masisannori kalaqami. Iyyoosaafixira, ‘Moaabi, Amooninna Seyiri Ilaali gobbanni lowo wottaaddari qasaˈnera daanni no’ yitanno sokka iillitusi. Lowohu Isiraeelete manni Yihowa kaaˈlo xaˈmirara Yerusaalamete gamba yii. Mannuno Maganu minira marita, Iyyoosaafixi togo yee huuccatto assi: ‘Maganonke Yihowa, ikkineemmori bainonke. Konne lowo wottaaddara qasate kaaˈlannonkehu dino. Kaaˈlattonke gede ate agadhineemmo.’

Yihowano huuccatto macciishshi. Isino soqqamaanosi giddonni mitto mannunniwa soye, ‘Olu kiˈneha diˈˈikkino; Maganunniho. Kiˈne olama dihasiissannoˈne. Sammi yitine uurre; Yihowa gatisannoˈne gara calla laˈe’ yiinsa.

Layinki soodo Iyyoosaafixi manna, ‘Yihowa addaxxe!’ yii. Hakkiinnino Iyyoosaafixi wottaaddarisira albaanni faarsanno manna wori; doogoteno Yihowara galatu faarso faarsitanni hadhu. Olu base iilla rakkuta mayi ikkiro afootto? Yihowa diinu wottaaddari insa insaneewa qasantanno gede assi. Isiraeele martanno wote woˈmunku diinu wottaaddari ree goofino!

Iyyoosaafixi Yihowa addaxxasinni hayyichcha diˈˈikkino? Ninkeno Yihowa addaxxinummoro hayyoota ikkineemmo.