IYYOOSIYAASI lame wodiidi Isiraeelete gaˈrera moohi wote sette dirolla ikkinosi. Settu diri nugusa ikkate lowo geeshsha shiimaho. Konni daafira Iyyoosiyaasi umi qara gosa gashshanno gede jajjabbu manni kaaˈlinosi.

Iyyoosiyaasi nugusa ikkihunni lamalu dirinni kayise Yihowa seera harunsa hanafi. Isino Daawiti, Iyyoosaafixinna Hiziqiyaasiha dancha lawishsha haˈrunsino. Hakkiinnino shiima beetto ikke heeˈrenni, worbimmate coye assi.

Seeda yanna rooriidihu Isiraeelete manni bunshe assanni keeshshino. Kaphphu maganna magaˈnino; misillateno sagadino. Konni daafira Iyyoosiyaasi mannasi adhe haˈre, kaphphu magaˈna gobbatenni huna hanafi. Batinynyu manni kaphpho magaˈnanno daafira tenne assa lowo loosooti. Iyyoosiyaasinna mannisi kowiichcho misilla cancantanna lai.

Hakkunni gedensaanni Iyyoosiyaasi sase manna Yihowa mine gatamartanno gede doori. Mannuno woxe fushshe konni sasu mannira oyeenna, insano loonsanni loosira baattu. Maganu mine gatamarranni heeˈneenna, kakkalaanote biili Kelqiyaasi hakkiichcho mitto muxxe ikkinore afi. Hakkuno Yihowa seeda yanna albaanni seerasi Muse borreessanno gede assi maxaafaati. Kuni maxaafi bae seeda diro keeshshino.

Hakko maxaafano Iyyoosiyaasiwa massini; isino nabbabbeˈˈe yii. Iyyoosiyaasi nabbambanna macciishshiti, mannu Yihowa seera ayirrisikki heeˈrinota afi. Konni daafira lowo geeshsha dadilli; hakkiinnino koye misilete aana laˈˈattonte gede uddanosi dari. Qoleno togo yii: ‘Annuwanke konni maxaafira borreessinoonni seera agadhitinokki daafira, Yihowa ninkera hanqino.’

Iyyoosiyaasi Yihowa insa aana abbannore buuxanno gede kakkalaanote biilo Kelqiyaasi hajaji. Kelqiyaasino masaalaancho ikkitinota Hildaana yinanni mancho xaˈmara haˈri. Iseno Yihowawiinni dagginota togo yitanno sokka Iyyoosiyaasira kulanno gede kultusi: ‘Mannu duuchchunku kaphphu maganna magaˈninohuranna uulla bunshetenni woˈmitinohura Yerusaalamenna manna baalanka qorichchisheemmo. Ati Iyyoosiyaasi kayinni dancha ikkinore assootto daafira, ati lubbote heedheenna konne qorichcha diabbeemmo.’