NUGUSU Nabukedenetsoori Isiraeelenniha egennaamma manna baala Baabiloone adhe haˈri. Adhe haˈrino manni giddonnino roore xumuullenna egennaamma ikkitinore doori. Dooramino manni giddonni shoolu kowiichcho misilete aana laˈˈattoreeti. Mittu Daanieeliiti; wolootu sasu kayinni Baabiloonete gosa Sidiraaqi, Misaaqinna Abidinaago yite suˈma fushshitinoreeti.

Nabukedenetsoori wedellootu gashshootu minesi soqqantasira insa qajeelsara hasiˈrino. Sase diro qajeeltu gedensaanni, mitiinsannosire tirtanno gede egennaamma ikkitinore calla gatisiˈranno. Isino tini ooso qajeelsha adhitanno yannara jawaatootanna fayyuulle ikkitara hasiˈrino. Konni daafira tenne ooso baalantera isinna maatesi ittannota duuchchu dani sagalenna woyinete agatto uyitannonsa gede soqqamaanosi hajaji.

Wedellichcha Daanieeli lai. Isi Nabukedenetsooriha qara soqqamaancho Asifaaneezi mayyaanni nooro afootto? Nugusaho shiqqannota duuchchu dani sagale ita hasiˈrannokkita kulanni noosi. Asifaaneezi kayinni dadille, ‘Nugusu ita hasiissannoˈne sagalenna agginannire balaxe kule kainoe. Qoleno kiˈne wole ooso gede misa hoogginiro, ane shaannoe’ yii.

Konni daafira Daanieeli, Asifaaneezi insa shoolenka towaatanno gede doorinoha mare, ‘Eeggatena hanni 10 barra fonqolte lainke’ yii. Qoleno togo yiisi: ‘Inteemmore akaakilte, angeemmore kayinni waa calla uyinke. Hakkiinnino nugusu sagale ittannorenna ninke heewisse lai; ayioo roortannoro afattona.’

Insa towaatanno manchino, Daanieeli yiinore assi. Hakkiinnino 10 barri goofita, Daanieelinna sasu jaallasi wolootu wedellinni roore missu. Konni daafira towaatannonsa manchi nugusu sagale bayichcho akaakilte ittara aguri.

Sasu diri gedensaanni, baalanka wedella Nabukedenetsooriwa massini. Nabukedenetsoori baalunku ledo hasaawi gedensaanni, Daanieelinna sasu jaallasi woloota baala roortino egennaamma ikkitinota afi. Konni daafira, shoolenka gashshootu minesi soqqantara gatisiri. Daanieeli, Sidiraaqi, Misaaqinna Abidinaago nugusu ayee xaˈmo woyi buuto mitiinsannore nafa xaˈminsaro, woloota nugusu kakkalaano woyi egennaamma 10 ero roorte affanno.