DAAWITI Goliyaadi shii gedensaanni, Isiraeelete wottaaddari roorrichchi Abeneeri Daawiti Saaooliwa massi. Saaoolino Daawiti lowo geeshsha baxi. Wottaaddarisira roorrichcha assisi; qoleno hakkiichcho nugusu mine heeˈrara haarisi.

Gedensaanni wottaaddaru Filisxeemete ledo olame higanna meentu, ‘Saaooli kume shii; Daawiti kayinni tonne kume shii’ yaanni faarsi. Togo yaansa Saaooli hinaasanno gede assitusi; korkaatuno meentu Saaoolinni roorse Daawitira ayirrinynye uyinohuraati. Saaooli beetti Yoonaataani kayinni dihinaasino. Isi Daawiti lowo geeshsha baxanno; Daawitino iso hattonni baxanno. Konni daafira lamunku ayeewoteno jaalla ikkate mimmitu ledo qaale eˈu.

Daawiti gingilaate dancha gede asse godoˈlanno; Saaoolino isi godoˈlanno muuziiqa macciishsha baxanno. Ikkollana mitto barra Saaooli hinaase masisanno coye assi. Daawiti gingilaate godoˈlanni heeˈreenna, Saaooli, ‘Daawiti girgiddu ledo xaadiseemmo!’ yee qalacco oli. Daawiti miliqita qalacco sodhu. Wole yannarano Saaooli Daawiti qalaccotenni ole soˈrino. Konni daafira Daawiti xaate qorophpha hasiissannosita huwati.

Saaooli eino qaale qaagatto? Goliyaadi shaanno manchira galte ikkitanno gede beettosi aara qaale eino. Gedensaannino Saaooli beettosi Melkooli aannosita Daawitira kulisi; ikkollana Daawiti balaxe 100 Filisxeemete manna shaa hasiissannosita kulisi. Hanni hedi! Saaooli Filisxeemete manni Daawiti shaanno yee hedino. Ikkollana dishiinosi; konni daafira Saaooli beettosi Daawitira galte ikkitasira uyi.

Mitto barra Saaooli Yoonaataaniranna soqqamaanosi baalantera Daawiti shaara hasiˈrinota kulinsa. Yoonaataani kayinni annasi togo yii: ‘Daawiti hanni shii. Isi atera mittono busha coye diassino. Roorenkanni isi assinori lowo geeshsha kaaˈlinohe. Goliyaadi shii wote, heeshshosi qarru aana tugino; atino tenne laittoti hakkawaro hagiidhootto.’

Saaooli beettisi yiinota macciishshe, Daawiti disheemmo yee qaale ei. Hakkiinnino Daawiti Saaooli minira abbineenna bashshonte gede Saaoolira soqqami. Mitto barra kayinni, Daawiti muuziiqa godoˈlanni heeˈreenna, Saaooli qalaccosi Daawiti aana oli. Daawiti miliqita qalacco girgidda qassu. Saaooli ole soˈranna tini sayikkite! Daawitino xa xooqa hasiissannosita huwati!

Daawiti hakko hashsha minisira haˈri. Saaooli kayinni iso shitara manna soyi. Melkooli annise ma assara mixirinoro affino. Konni daafira ayiddaannisera, ‘Konni hashshinni fulte baˈˈa hoogittoro, gaˈa shinannihe’ yite kultusi. Melkooli hakko hashsha Daawiti maskootete widoonni fushshite xooqanno gede assitusi. Daawiti Saaooli afannosikki gede lamalu diri geeshsha bayichchunni bayichcho sae maaxamanni keeshshi.