WAYI giddo noo mancho lai. Kuni manchi dilowo qarri giddo no? Qulxuˈmichcho iso egemmitaraati! Isi ayeetiro afootto? Suˈmisi Yoonaasiiti. Isi togoo qarri aana uwinohu hiitto ikkeetiro hanni laˈno.

Yoonaasi Yihowa masaalaanchooti. Masaalaanchu Elsai reyihunni shiima yanna gedensaanni, Yihowa Yoonaasi togo yiisi: ‘Nennewete katama haˈri. Hakko noo manni bunshe batidhino daafira, marte bunshensa kulinsa.’

Yoonaasi kayinni Yihowa soyinosiwa haˈra dibaxino. Konni daafira Nennewe agure wole raga hadhanno yowolo gidde xooqi. Yihowa, Yoonaasi xooqinohura dihagiidhino. Konni daafira baaru aana dambalu kaˈˈanno gede assi. Wayi yowolo itara kaino daafira coyi bushanni haˈri. Yowolote aana loossannori lowo geeshsha waajjitino daafira, kaaˈlitannonsa gede magannansawa raartu.

Gedensaanni Yoonaasi mannootaho, ‘Ani iimanna uulla kalaqino Magano Yihowa magansiˈreemmoho. Xa Yihowa assi yiinoere giwe xooqanni noommo’ yee kulinsa. Insano, ‘Dambalu uurranno gede hiissinoheyya?’ yite xaˈmitusi.

Yoonaasino, ‘Baaru giddora tuggeˈˈe; baaruno sammi yaannona’ yiinsa. Yowolote aana loossannori Yoonaasi baaru giddora tuga dihasidhino; dambalu lexxanni haˈrita kayinni fushshite tuggusi. Hakkawotenni dambalu uurri; baaruno sammi yii.

Yoonaasi wayi giddora lixanni heeˈreenna, jawa qulxuˈmichcho egemmitusi. Ikkeennano Yoonaasi direyino. Sase barranna sase hashsha hatte qulxuˈmichcho godowira keeshshi. Yoonaasi Yihowara hajajame Nennewe haˈra hoogasinni lowo geeshsha dadilli. Konni daafira maa assinoro afootto?

Yoonaasi Yihowa kaaˈlannosi gede huucciˈri. Hakkiinnino Yihowa, qulxuˈmichcho Yoonaasi waaho gobbaanni fushshite tuffanno gede assi. Hakkunni gedensaanni Yoonaasi Nennewe haˈri. Tini xagge Yihowa asse yaannonkere baala assa hasiissannonketa dileellishshanno?