BAABILOONETE kae seeda doogo haˈre Yerusaalame iillino manni lowo kume ikkanno. Ikkollana kuni manni maranno wote, Yerusaalame gudisante giirantino daafira, lowo geeshsha ontino. Hakko mittu manchino diheeˈranno. Isiraeelete gosa duuchchankare galagalte biddi assa hasiissannonsa.

Isiraeelete gosa balaxxe seekkitinori giddo mittu kakkalote bayichchooti. Kakkalote bayichchi insa Yihowara saada gorrite kakkaltanno baseeti. Agannate gedensaanni, Isiraeelete manni Maganu mine mina hanafi. Ikkollana qooxeessinsara noo gobbara heedhanno diinna insa Maganu mine mintannota dibaxxino. Konni daafira mine mintannota hooltara insa waajjishiisha hanaffu. Gedensaannino tini diinna Faarsiha haaro nugusa minu minama uurrara seera fushshanno gede assitu.

Xa lowo diri saino. Isiraeelete manni Baabiloonetenni dayinku 17 diro ikkino. Yihowa Isiraeelete gosa mine galagalte mintanno gede kultara masaalaanosi Hagenna Zakkaariyasi soyi. Mannuno Maganu kaaˈlo addaxxe masaalaanote hajajami. Fushshinoonni seeri minnannita hoolannoha ikkirono, mannu kayinni galagale mina hanafi.

Konni daafira Tentinayi yinannihu Faarsi gashshaanchi daye, Maganu mine ayi minne yiinonsaro Isiraeele xaˈmi. Isiraeeleno insa Baabiloonete noo waro Nugusu Qiroosi, ‘Xa Yerusaalame hadhine, Maganiˈneha Yihowa mine minne’ yiinonke yite kultusi.

Tentinayi, Qiroosi lubbote noo waro addinta togo yiinoronna yiinokkiro afara Baabiloonete gobba sokka soyi. Faarsihu haaru nugusi sokka mulenni qole soyi. Soyino sokka Qiroosi mine minne yiinota kultannote. Nugusu qoleno togo yee soyi: ‘Isiraeele Maganinsa mine mintona aguri. Atino kaaˈlinsa yee hajajoommohe.’ Shoolu dirinni Maganu mini miname goofi; Isiraeeleno lowo geeshsha hagiidhitu.

Xaano lowo diri sai. Maganu mine minne gundinku 48 diro ikkino. Yerusaalamete noo manni buxanete; katamuno ikko Maganu mini hakkeeshshi geeshsha dixuˈmino. Baabiloonete gobbara gatinohu Isiraeelete manchi Izira, Maganu mine biifisa hasiissinota afi. Konni daafira maa assinoro afootto?

Izira Faarsi nugusa Arxekisisi coyishiishara haˈri; hakkiinnino kuni danchu nugusi Izira Yerusaalame haare haˈranno gede lowo elto uyi. Izirano Baabiloonete nooha Isiraeelete manna konne uduunne Yerusaalame massa kaaˈleˈˈe yii. Mito 6,000 ikkanno manni kaaˈlineemmo yii. Insa Yerusaalame haadhe hadhannohu lowo birri, worqenna wolu muxxe ikkinori no.

Doogote bushuullu manni noo daafira, Izira dadilli. Kuni manni birransanna worqensa mulqiˈre, insano shaara dandaanno. Konni daafira, misilete aana laˈˈattonte gede Izira manna gamba assi. Hakkiinnino Yerusaalame hadhanno wote Yihowa gawajjotenni agarannonsa gede huuccatto assidhu.

Yihowano gawajjotenni agarinsa. Insano shoole agana hadhanni keeshshitu gedensaanni, Yerusaalame keerunni iillitu. Yihowa kaaˈlannonsa gede iso addaxxitannore agara dandaannota tini xagge dileellishshanno?