KOWIICHCHO loonsanni heeˈnoonni looso baala lai. Isiraeelete gosa Yerusaalamete huxxa jawaatte huxxitanni no. Nugusu Nabukedenetsoori 152 diri albaanni Yerusaalame giiri waro, huxxa diige gudino; qoleno katamu saanquwa giirino. Isiraeelete gosa Baabiloonetenni gobbansa higgu wote, huxxa galagalte dihuxxitino.

Isiraeelete manni kageeshshi diro kataminsara huxxu nookkiha heedhu wote hiitto ikkitinoha lawannohe? Yaaddanni heedhino. Diinnansa mittu qarri nookkiha dagge, qassansara dandiitanno. Xa kayinni Nehimiya yinanni manchi, mannu huxxa galagale huxxanno gede kaaˈlanni no. Ati Nehimiya ayeetiro egennootto?

Nehimiya Isiraeelete manchooti; Isi Suusa yinannite Merdokiyosinna Asteeri heedhanno gobbanni dayinoho. Nehimiya nugusu mine soqqamannoho; konni daafira Merdokiyosiranna Mootitte Asteerira jaala ikkikkinni digatino. Qullaawu Maxaafi kayinni Nehimiya Asteeri ayiddaannira Nugusu Ahashiweroshira soqqamino diyaanno. Isi aantete moohino nugusira, Nugusu Arxekisisira soqqamino.

Arxekisisi, Yihowa mine biifinsanni gede Yerusaalame massara Izirira lowo woxe uyinoho dancha nugusaati; tenne qaagatto? Izira kayinni diigaminoha katamu huxxa dihuxxino. Konni daafira, Nehimiya konne huxxa hiitto asse huxxinoro hanni laˈno.

Arxekisisi Maganu mine biifinsanni gede Izirira woxe uyinkunni 13 diri saino. Hakkawaro Nugusu Arxekisisira qara ikke xajje shiqishannohu Nehimiyaati. Togo yaano nugusaho woyinete xajje xorshe shiqishanno; qoleno mittuno xajjete marze wore nugusa gawajjannokki gede agaranno yaate. Kuni dancha loosooti.

Mitto barra Nehimiya rodii Anaaninna wolu manni Nehimiya laˈara Isiraeelete gobbanni daggu. Insano Isiraeelete iillanni noo qarranna Yerusaalamete huxxi xaa geeshsha diigame noota Nehimiyara kultu. Nehimiya tennenni lowo geeshsha dadille, Yihowa huucciˈri.

Mitto barra Nehimiya dadillinota nugusu afe, ‘Togo dadilloottohu mayiraati?’ yee xaˈmisi. Nehimiyano dadillinohu Yerusaalame qarru aana noohuranna huxxuno diigame bainohura ikkinota kulisi. Nugusuno, ‘Xa ma assinahera hasiˈroottoyya?’ yee xaˈmisi.

Nehimiya qole, ‘Yerusaalame haˈre diigamino huxxa huxxeemmo gede fajjie’ yii. Nugusu Arxekisisi lowo geeshsha dancha manchooti. Isino Nehimiya haˈranno gede fajjisi; qoleno huxxa huxxate ikkitanno haqqe uyinannisi gede assi. Nehimiya Yerusaalame maranni heerenni, assara hedinore mannaho kuli. Insano yiinonsare baxxe mimmito, ‘Amme huxxa huxxinona’ yitu.

Isiraeelete diinna huxxa huxxinanni heeˈnoonnita affuti, ‘Marre insa shine, huxxa huxxitannokki gede assineemmo’ yitu. Nehimiyano tenne macciishshe, huxxa huxxanno mannira bisenna urde uyi. Togono yiinsa: ‘Diinnanke waajjitinoonte. Roduuwiˈnera, oosoˈnera, galteˈneranna qaeˈnera olamme.’

Huxxa huxxanno manni lowo geeshsha worbaho. Olu uduunne barrano hashshano qodhe, huxxa huxxa diagurino. Konni daafira, 52 barrinni huxxu huxxame goofi. Xaate mannu yaadikki katamu giddo heeˈra dandaanno. Nehimiyanna Izira mannaho Maganu seera rosiissu; mannuno hagiidhi.

Ikkollana xaano, heeshsho Isiraeele qafadante Baabiloone hadhara albaanni noote gedeeta diˈˈikkitino. Gashshanni noonsahu Faarsi nugusaati; insano isira soqqantanno. Yihowa kayinni wole nugusa soyeemmoˈne yee qaale eino; qoleno Yihowa hakku nugusi mannaho keere abbannota coyiˈrino. Kuni nugusi ayeeti? Isi uullate aana keere abbannohu hiittoonniiti? Kuni hiitto ikke ikkannoro anfikki 450 diri sai. Hakkiinnino mittu baxxino qaaqqi ilami. Tini kayinni wole xaggeeti.