KOYE ikkanni nooha masisanno coye lai! Yesuusi reyaanni no. Mannootu iso hossi yiino haqqira suttinosi. Angasinna lekkasi misimaaretenni haqqaho qolte gantino. Yesuusa suntoonnihu mayiraati?

Suntoonnisihu iso gibbannori noo daafiraati. Hakkuri ayeeootiro afootto? Insa giddo mittu, busha sokkaancho Sheexaane Daawuloosiiti. Addaaminna Heewani Yihowara hajajantannokki gede assinohu isooti. Qoleno Yesuusi diinna tenne masissanno jaddo loossanno gede assinohuno Sheexaaneho.

Yesuusa diinnasi koye haqqaho suttara albaanni nafa, lowo qarra iillishshinosi. Geetesemaani yinanni bayichcho martu garanna Yesuusa haadhe hadhu gara qaagatto? Hatti diinna ayeooti? Ammaˈnote cimeeyyeeti. Haadhe hadhu gedensaanni hiitto assitinosiro hanni laˈno.

Ammaˈnote cimeeyye Yesuusa haadhe hadhuta, hawaariyaatesi xooqqu. Hawaariyaatesi waajjitino daafira, Yesuusa callichchosi diinnasi anga agurte xooqqu. Hawaariyaate Pheexiroosinna Yohaannisi kayinni lowo geeshsha faffe dixooqqino. Insa Yesuusa hiitto assinanniro affara hoode hadhu.

Kakkalaano Yesuusa bashshoora kakkalaanote biilo ikkinohu Hanna yinanni geerchi qae massitu. Kuri haammatu mannooti hakko lowo geeshsha dikeeshshitino. Hakkiinni fulte Yesuusa kakkalaanote biilo ikke noohuwa Qeyyaafi qae massitu. Haammatu ammaˈnote cimeeyye isi qaera gamba yitu.

Qeyyaafi qaera, Yesuusi bunshe assinoronna teˈee buuxxe firde aate ofoltu. Hakkiichchira Yesuusi aana kaphpho farcidhanno mannootano abbinoonni. Ammaˈnote cimeeyye baalunku, ‘Yesuusi reya hasiissannosi’ yitu. Hakkiinnino albisira anja tuffusi; qolteno tuntuˈmotenni gantusi.

Mannootu konne baala assitanno wote, Pheexiroosi hoowete giddoonni no. Hakko hashsha qiidu noo daafira, mannootu giira giidhite no. Insa giira doyissite giwaadhanni heedheenna, mitte soqqamaancho beetto Pheexiroosi laˈe togo yitu: ‘Kuni manchino Yesuusi ledo nooho.’

Pheexiroosino, ‘Deeˈni, ani ledosi dinoommo!’ yee qoli.

Mannootu Pheexiroosi sase higge Yesuusi ledo nootto yitusi. Isi kayinni hatto yitusi kiiro deeˈni yee moromi. Pheexiroosi sayikkimeeshsho hatto yiita, Yesuusi alba isiwa hige lai. Kaphphino daafira Pheexiroosi lowo geeshsha dadilli; hakkiinnino fule haˈre wiˈli.

Arbete soodo arrishsho fultuta, kakkalaano Yesuusa Sanihediriini yinannita lowo hoowe massitusi. Hakkiichcho Yesuusa hiissitannoro amaalantu. Hakkiinnino Phenxenaawichchu Philaaxoosi yinannihuwa, Yihudu awuraajji gashshaanchiwa massitusi.

Kakkalaano Philaaxoosira togo yite kultu: ‘Kuni busha manchooti. Isi reya hasiissannosi.’ Philaaxoosi Yesuusa xaˈmo xaˈmihu gedensaanni, ‘Assino bunshe mitteno dileeltinoe’ yiinsa. Hakkiinnino Philaaxoosi Yesuusa, Heroodiisi Antiphphaasi yinannihuwa soyi. Heroodiisi Galiilu gashshaanchooti; hakkawote kayinni Yerusaalamete no. Isino Yesuusi mitte bunshe assinokkita buuxino daafira, galagale Philaaxoosiwa soyi.

Philaaxoosi Yesuusa haˈrisara hasiˈrino. Yesuusi diinna kayinni isi bayichcho wole usuranynya tirara hasidhino. Hakku usuranynyi Barbaani [Barinabaasi] yinanni mulqiraanchooti. Hawarrita Philaaxoosi Yesuusa gobbara haare fuli. Mannootano, ‘Kuneeti nugusiˈne!’ yiinsa. Qara kakkalaano kayinni qoonqonsa gotti assite, ‘Kaˈa qoli! Shii! Shii!’ yitu. Hakkiinnino Philaaxoosi Barbaani tire haˈrisi; Yesuusa kayinni shitara haadhe hadhu.

Arbete barra Yesuusa hossi yiino haqqira suttusi. Qolteno bunshe assitinore lame mannoota Yesuusira guranna qiniiteenni haqqete suttu; insa kayinni koye misilete aana dino. Yesuusi reyara shiimuri gate heeˈreenna, sutanturi giddo mittu, ‘Mangistekkira moohatto wote qaagie’ yiisi. Yesuusi togo yee qaale eisi: ‘Ane ledo Gannatete heeˈratto.’

Yesuusi eino qaali didanchaho? Isi yii gannate hiitteetiro afootto? Maganu umo gannate kalaqinohu hiikkooti? Uullate aanaati. Hattono Yesuusi iima nugusa ikke moohanno wote, uullate aana haaro Gannatera heeˈre hagiidhanno gede konne mancho reyotenni kayisanno. Kuni coyi dihagiirsiisannonke?